ޔޫއީއެފް ޗެމްޕިއަންސް ލީގުގެ ފުރަތަމަ ތިން މެޗުން މޮޅުވެ، ތާވަލުގެ ދެވަނައިގައި އޮތް އެސްޓަން ވިލާ، ތިން ޕޮއިންޓް ފަހަތުގައި އޮތް ބާސެލޯނާއާ ދެކޮޅަށް ކުޅެވޭ މެޗް މިރޭ އޮންނާނެއެވެ.
މިއީ ޗެމްޕިއަންސް ލީގުގެ ތާވަލުގައި ވަރަށް މުހިންމު މެޗެކެވެ. އެސްޓަން ވިލާ އަމާޒު ހިފާފައިވަނީ މިހާތަނަށް ދަމަހައްޓަމުން އައި ރަނގަޅު ނަތީޖާ ބާސެލޯނާއާ ދެކޮޅަށްވެސް ދެމެހެއްޓުމަށެވެ. ތަރިން ގިނަ ބާސެލޯނާއަކީ މި މުބާރާތް ކާމިޔާބުކުރާނެ ކަމަށް އެންމެ ބޮޑަށް ބެލެވޭ އެއް ޓީމެވެ. އެޓީމު މިވަގުތު ސްޕެނިޝް ލީގުގެ އެއްވަނައިގައި އޮތް ނަމަވެސް، އެންމެ ފަހުން ޕީއެސްޖީ އަތުން 4-2 އިން ބަލިވުމުގެ ސަބަބުން ޗެމްޕިއަންސް ލީގު ތާވަލުގެ އަށްވަނައިގައި ވަނީ ތާށިވެފައެވެ.
ވިލާ އިން ވަނީ މިހާތަނަށް ކުޅުނު ތިން މެޗުވެސް ކާމިޔާބުކޮށް، ޔޫރަޕްގައި 12 ލަނޑު ޖަހާފައެވެ. މިސްރުގެ މަހުޖަނު ނާސިފް ސާވިރިސް އާއި އެމެރިކާގެ އިންވެސްޓަރު ވެސް އެޑެންސްގެ މިލްކުވެރިކަމުގައި އޮތް މި ކުލަބު، 2019 ވަނަ އަހަރު ޕްރިމިއާ ލީގަށް ޕްރޮމޯޓްވި ފަހުން އަންނަނީ ބޮޑެތި ކުރިއެރުންތަކެއް ހޯދަމުންނެވެ.
މިގޮތުން އުނާއި އެމެރީގެ އިރުޝާދުގެ ދަށުން އެސްޓަން ވިލާ އިން ވަނީ ތާރީޚީ ކާމިޔާބީތަކެއް ހޯދާފައެވެ. 41 އަހަރަށްފަހު ފުރަތަމަ ފަހަރަށް ޗެމްޕިއަންސް ލީގަށް ކޮލިފައިވެ، ބަޔާން މިއުނިކް އަތުން ހޯދި ތާރީޚީ މޮޅަކީ އޭގެ ހެއްކެކެވެ. މީގެ އިތުރުން މިދިޔަ ސީޒަނުގައި އެޓީމުން ވަނީ ޔޫރޮޕާ ކޮންފަރެންސް ލީގުގެ ސެމީ ފައިނަލަށް ދަތުރުކޮށް، ފަހުން ޔޫރޮޕާ ލީގުގެ ތަށިވެސް އުފުލާލާފައެވެ.
ހަންސީ ފްލިކްގެ ބާސެލޯނާ މި މެޗަށް ނުކުންނައިރު، އެޓީމުން އެންމެ ފަހުން ކުޅުނު 18 ޗެމްޕިއަންސް ލީގު މެޗުގައިވެސް ބައިކޮޅަށް ލަނޑެއް ނުވަދެ ސަލާމަތް ކުރެވިފައެއް ނުވެއެވެ. މިއީ ވިލާގެ ފޯވާޑުންނަށް ލިބޭނެ ރަނގަޅު ފުރުސަތެކެވެ.
ބާސެލޯނާގެ މިހާރުގެ ހާލަތު:
ފޭނޫޑް އަދި ގަލަޓަސަރާއި އަތުން ބޮޑު ތަފާތަކުން މޮޅުވި ނަމަވެސް، ޕީއެސްޖީ އަތުން ބަލިވުމަކީ ބާސެލޯނާއަށް ލިބުނު ސިއްސުމެކެވެ. އެއަށްފަހު ރެއާލް މެޑްރިޑް އަތުން ބަލިވި ނަމަވެސް، އެންމެ ފަހުން އަލަވޭސް އަތުން 6-1 އިން މޮޅުވެ، އެޓީމު ވަނީ އަލުން ފޯމަކަށް އަޅާފައެވެ. ޒުވާން ތަރި ލަމީން ޔަމާލް އަންނަނީ މި ސީޒަނުގައި އާދަޔާޚިލާފު ކުޅުމެއް ދައްކަމުންނެވެ.
އެސްޓަން ވިލާގެ މިހާރުގެ ހާލަތު:
ވިލާ މި ސީޒަން ޗެމްޕިއަންސް ލީގުގައި އެޓީމު އޮތީ އަދި އޮތީ ދެވަނައިގައެވެ. ނަމަވެސް އިނގިރޭސި ލީގުގައި އެންމެ ފަހުން ކުޅުނު މެޗުތަކުގައި ނަތީޖާތައް އެހާ ރަނގަޅެއް ނޫނެވެ. މީގެ އިތުރުން، ކުރީގެ ކުޅުންތެރިޔާ ޖޭމީ ކެރެގާ އެޓީމާ ބެހޭގޮތުން ދެއްކި ވާހަކަތަކަކާ ގުޅިގެން ގާނޫނީ ފިޔަވަޅު އަޅާނެ ކަމަށްވެސް އެޓީމުން ވަނީ އިއުލާންކޮށްފައެވެ.
ލަފާކުރުންތައް:
އޮޕްޓާ ސުޕަ ކޮމްޕިއުޓަރުގެ ދިރާސާތަކުން ދައްކާގޮތުގައި މި މެޗުން ބާސެލޯނާ މޮޅުވުމުގެ ފުރުސަތު 72.0% އޮތްއިރު، އެސްޓަން ވިލާ މޮޅުވުމުގެ ފުރުސަތު އޮތީ އެންމެ 12.7% ގައެވެ. އެއްވަރުވުމުގެ ފުރުސަތަކީ 15.3% އެވެ.
ކުރިމަތިލުންތައް:
މިއީ 1983 ވަނަ އަހަރުގެ ފަހުން މި ދެޓީމު ބައްދަލުކުރާ ފުރަތަމަ ފަހަރެވެ. އުނާއި އެމެރީއަކީ ބާސެލޯނާއާ ދެކޮޅަށް ގިނަ މެޗުތަކެއްގައި ކޯޗުކޮށްދީފައިވާ ފަރާތެއް ނަމަވެސް، އެޓީމާ ދެކޮޅަށް އޭނާގެ ރެކޯޑު އެހާ ރަނގަޅެއް ނޫނެވެ.
ރިއެކްޓް އަދި ކޮމެންޓް ކުރެއްވުމަށް
