ލަލީގާގެ އައު ސީޒަންގައި ބާސެލޯނާއިން ކުޅުނު ފުރަތަމަ ދެ މެޗުން ރަފީނިއާ އޭނާގެ ތިންވަނަ ލަނޑު ކާމިޔާބުކޮށް، 2-0 ގެ ނަތީޖާއަކުން އެތުލެޓިކް ކްލަބް ބަލިކޮށްފިއެވެ.
މި ސީޒަންގައި ބާސެލޯނާގެ އަމިއްލަ ދަނޑު ކަމަށްވާ ކޭމްޕް ނޯގައި ކުޅުނު ފުރަތަމަ މެޗުގައި އެތުލެޓިކް ބިލްބާއޯގެ މައްޗަށް އެޓީމުން ކުރިހޯދީ ރަފީނިއާ އާއި ފާމިން ލޮޕޭޒް ކާމިޔާބުކޮށްދިން ލަނޑުތަކުންނެވެ.
މެޗުގެ 37 ވަނަ މިނެޓުގައި ޕެޑްރީ ތަނަވަސްކޮށްދިން ފުރުސަތަކުން، އެތުލެޓިކްގެ ޑިފެންސްލައިން ފޫއަޅުވާލުމަށްފަހު ގޯލްކީޕަރު އުނާއި ސިމޯން ކައިރިން ނައްޓާލާފައި ރަފީނިއާ ވަނީ ބާސެލޯނާއަށް ކުރިހޯދައިދީފައެވެ. އަދި މެޗުގެ 82 ވަނަ މިނެޓުގައި ކަރީމް އަޑެޔެމީ ތިރިތިރިން ނަގައިދިން ހުރަހެއް ދިފާއުކުރަން އުޅުމުގެ ތެރޭގައި އައިމެރިކް ލަޕޯޓަށް ހެދުނު ގޯހެއްގެ ފައިދާ ނަގައި، ފާމިން ވަނީ ބާސެލޯނާގެ ދެވަނަ ލަނޑު ކާމިޔާބުކޮށް މެޗުގެ ނަތީޖާ ކަށަވަރުކޮށްދީފައެވެ.
ބާސެލޯނާގެ ކޯޗު ހަންސީ ފްލިކްގެ އިރުޝާދުގެ ދަށުން ކުޅުނު އެޓީމުން މެޗުގެ ބޮޑުބައި ކޮންޓްރޯލްކޮށް ގިނަ ފުރުސަތުތަކެއް އުފެއްދި ނަމަވެސް، އެތުލެޓިކްގެ ކީޕަރު ސިމޯން ވަނީ މުހިންމު ސޭވްތަކެއްކޮށް އެޓީމު މެޗުގެ ތެރޭގައި ހިފަހައްޓާފައެވެ.
އެލްޗޭ އަތުން 5-0 އިން މޮޅުވި މެޗުގެ ފެށި އެގާރައަށް ފްލިކް ވަނީ ރޭ ވަނީ ތިން ބަދަލެއް ގެނެސްފައެވެ. އެގޮތުން އެންތަނީ ގޯޑަންއަށް ފުރަތަމަ ފަހަރަށް ފުރުސަތު ދިންއިރު، ޕާއު ކުބާސީ އާއި ޕެޑްރީ ވެސް ވަނީ ފުރަތަމަ އެގާރައިގައި ހިމަނާފައެވެ. އަލަށް ސޮއިކުރި ރޮޑްރީ މެޗު ފެށީ ބެންޗުންނެވެ.
ބާސެލޯނާއިން މެޗު ވަރުގަދަކޮށް ފެށިއިރު، 18 ވަނަ މިނެޓުގައި ލަމީން ޔަމާލް ފޮނުވާލި ނުރައްކާތެރި ހަމަލާއެއް ކީޕަރު ސިމޯން ވަނީ ހުށިޔާރުކަމާއެކު ދިފާއުކޮށްފައެވެ.
އޭގެ ހަ މިނެޓު ފަހުން އެކަޑަމީގެ ފުލްބެކް ޒަވީ އެސްޕާޓް ނަގައިދިން ހުރަހަކުން ރަފީނިއާ ބޮލުން ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ. އަދި 29 ވަނަ މިނެޓުގައި ޕެޑްރީ ކާމިޔާބުކުރި ލަނޑެއް އޮފްސައިޑްވުމާ ގުޅިގެން ރެފްރީ ވަނީ ބަލައިނުގަތުމަށް ނިންމާފައެވެ.
ޓްރާންސްފާ ބާޒާރު ބަންދުވުމުގެ ކުރިން ފޯވާޑެއް ހޯދުމުގެ މަސައްކަތް ބާސެލޯނާއިން ކުރަމުންދާއިރު، ސެންޓަ ފޯވާޑެއްގެ މަގާމަށް ކުޅެމުންދާ ރަފީނިއާ ވަނީ މި ސީޒަންގެ ފުރަތަމަ ދެ މެޗުގައި ތިން ލަނޑު ޖަހާފައެވެ.
ފުރަތަމަ ހާފު ނިމުމުގެ ކުރިން ލަމީން ފޮނުވާލި ހަމަލާއެއް ސިމޯން ދިފާއުކުރިއިރު، ލަޕޯޓަށް ކުރި ފައުލަކާ ގުޅިގެން ލަމީންއަށް ރަތް ކާޑެއް ދެއްކުމަށް އެތުލެޓިކްގެ ކުޅުންތެރިން އެދުނު ނަމަވެސް، ރެފްރީ އާއި ވީއޭއާރުން ނިންމީ އެއީ ރަތް ކާޑު ދައްކަންޖެހޭ ވަރުގެ ކަމެއް ނޫން ކަމަށެވެ.
ދެވަނަ ހާފުގައިވެސް ބާސެލޯނާއިން ކުޅުން ކޮންޓްރޯލްކުރިއިރު، 53 ވަނަ މިނެޓުގައި ލަމީން ފޮނުވާލި ބާރު ހަމަލާއެއް ގޯލުގެ ހުރަސް ދަނޑިއަށް ވަނީ އަމާޒުވެފައެވެ.
ސްޕެއިންއާއެކު ވޯލްޑް ކަޕް ކާމިޔާބުކުރުމަށްފަހު މެންޗެސްޓާ ސިޓީން ބާސެލޯނާއާ ގުޅުނު ރޮޑްރީ، މެޗުގެ 62 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ނުކުމެ އެޓީމަށް އޭނާގެ ފުރަތަމަ މެޗު ވަނީ ކުޅެދީފައެވެ.
އެތުލެޓިކުން ނަތީޖާ ހަމަހަމަކުރުމާ ގާތަށް ދިޔައީ 75 ވަނަ މިނެޓުގައި އޮއިހާން ސަންސެޓް ފޮނުވާލި ހަމަލާ ގޯލުގެ ދަނޑިއަށް އަމާޒުވުމުންނެވެ.
މި މޮޅާއެކު ކުޅުނު ދެ މެޗުން ހަ ޕޮއިންޓް ހޯދައިގެން ބާސެލޯނާ އޮތީ ރެއާލް މެޑްރިޑް، ބެޓިސް އަދި ސެވިލާއާއެކު ތާވަލުގެ ކުރީގައެވެ. އެތުލެޓިކް އަދި ރެއާލް ސޮސިއެދާދު އަދި މިހާތަނަށް ޕޮއިންޓެއް ހޯދިފައެއް ނުވެއެވެ.
ރިއެކްޓް އަދި ކޮމެންޓް ކުރެއްވުމަށް
