ލަންޑަނުގައި ބޭއްވި ބެލޮންޑޯ ހަފުލާގައި ބާސެލޯނާގެ ފޯވާޑް ލަމީން ޔަމާލް ޖެހިޖެހިގެން ތިންވަނަ ފަހަރަށް ކޮޕާ ޓްރޮފީ ކާމިޔާބުކޮށް ތާރީޚީ ކާމިޔާބީއެއް ހޯދައިފިއެވެ.
އުމުރުން 19 އަހަރުގެ މި ކުޅުންތެރިޔާ އަކީ، ދުނިޔޭގެ 21 އަހަރުން ދަށުގެ އެންމެ މޮޅު ފިރިހެން ކުޅުންތެރިޔާއަށް ދޭ މި ޝަރަފުވެރި އެވޯޑު ތިން ފަހަރު ހޯދި ފުރަތަމަ ފުޓްބޯޅަ ކުޅުންތެރިޔާއެވެ. އޭނާ މީގެ ކުރިން މި އެވޯޑު ހޯދާފައިވަނީ 2024 އަދި 2025 ވަނަ އަހަރުއެވެ.
ޔަމާލް މި ތާރީޚީ ކާމިޔާބީ ހޯދާފައިވަނީ ބާސެލޯނާއިން ޖެހިޖެހިގެން ދެވަނަ ފަހަރަށް ލަލީގާ ކާމިޔާބުކުރި ސީޒަނުގައި 16 ލަނޑު ޖަހައި، ލީގުގައި އެންމެ ގިނަ އެސިސްޓް (11 އެސިސްޓް) ހެދި ކުޅުންތެރިޔާގެ ޝަރަފާއެކު، ސީޒަނުގެ އެންމެ މޮޅު ކުޅުންތެރިޔާގެ މަގާމުވެސް ހޯދައިގެންނެވެ. މީގެ އިތުރުން ޗެމްޕިއަންސް ލީގުގެ ކުއާޓާ ފައިނަލާ ހަމައަށް ބާސެލޯނާ ދަތުރުކުރިއިރު އޭނާ ހަ ލަނޑު ޖަހައިދީފައިވެއެވެ. އަދި 2026 ވަނަ އަހަރުގެ ފީފާ ވޯލްޑް ކަޕް ސްޕެއިން ކާމިޔާބުކުރުމުގައި އޭނާ ވަނީ މުހިންމު ދައުރެއް އަދާކޮށްފައެވެ.
ސީޒަނުގެ ފަހުކޮޅު ފައިގެ ފަލަމަސްގަނޑަށް ލިބުނު އަނިޔާއަކާ ގުޅިގެން ކުޅުމާ ދުރުގައި ހުންނަން ޖެހުނު ނަމަވެސް، ޔަމާލް އަލުން އެނބުރި އައިސް ސްޕެއިނަށް ދެވަނަ ފަހަރަށް ވޯލްޑް ކަޕް ކާމިޔާބުކޮށްދިނުމުގައި އެހީތެރިވެދިނެވެ. އެގޮތުން ސައުދީ އަރަބިއްޔާ ކޮޅަށް ލަނޑު ޖެހުމުގެ އިތުރުން، ސެމީ ފައިނަލުގައި ފްރާންސާ ދެކޮޅަށް ކުޅުނު މެޗުގައި މުހިންމު ޕެނަލްޓީއެއްވެސް އޭނާ ހޯދައިދިނެވެ.
އެވޯޑާ ހަވާލުވުމަށްފަހު ދެއްކި ވާހަކައިގައި، އަމިއްލަ ކާމިޔާބީއަށްވުރެ ބޮޑަށް ޔަމާލް އަލިއަޅުވާލީ ބާސެލޯނާ އަދި ގައުމީ ޓީމުގައި އޭނާއާއެކު ކުޅޭ ޕާއު ކުބާސީގެ ހުނަރަށެވެ. މި އެވޯޑުގެ ދެވަނަ ހޯދި ކުބާސީ އަކީ، މިއަހަރުގެ ވޯލްޑް ކަޕްގައި ސްޕެއިން ކުޅުނު އަށް މެޗުން ބައިކޮޅަށް އެންމެ ލަނޑެއް ވަންއިރު، ޑިފެންސް ބެލެހެއްޓުމުގައި ދެއްކި މޮޅު ކުޅުމުގެ ސަބަބުން މުބާރާތުގެ އެންމެ މޮޅު ޒުވާން ކުޅުންތެރިޔާގެ މަގާމު ހޯދި ކުޅުންތެރިޔާއެވެ.
އެވޯޑް ގަބޫލުކުރަމުން ޔަމާލް ބުނީ، "އަހަރެން ދެކޭގޮތުގައި މި އެވޯޑު ލިބެންޖެހޭނީ ޕާއު ކުބާސީއަށް. އޭނާއަކީ މި އެވޯޑަށް އެންމެ ހައްގުވެގެންވާ ކުޅުންތެރިޔާ." އަދި "ކުބާސީ މިތަނުން ފެނުމަކީ އަހަރެން ވަރަށް ބޭނުންވި ކަމެއް، ސަބަބަކީ އޭނާ ވަރަށް ދިގު މުއްދަތަކަށް ވަރަށް މަތީ ފެންވަރެއްގައި ކުޅެމުންދާތީ،" ކަމަށްވެސް އޭނާ ބުންޏެވެ.
ރިއެކްޓް އަދި ކޮމެންޓް ކުރެއްވުމަށް
