2026 ވަނަ އަހަރުގެ ވޯލްޑް ކަޕްގައި ދެކުނު އެފްރިކާ ތަމްސީލުކުރިތާ މަދު ހަފުތާތަކެއްގެ ތެރޭގައި، އެ ގައުމުގެ ހުނަރުވެރި މިޑްފީލްޑަރު ޖޭޑަން އެޑަމްސް އުމުރުން އެންމެ 25 އަހަރުގައި ކުއްލި ގޮތަކަށް ނިޔާވުމާ ގުޅިގެން މުޅި ފުޓްބޯޅަ އާއިލާއަށް ބޮޑު ސިހުމެއް ލިބިއްޖެއެވެ.
ވޯލްޑް ކަޕްގައި މެކްސިކޯ އާއި ޗެކިއާ ދެކޮޅަށް ކުޅުނު ފުރަތަމަ ދެ މެޗުގައި ވެސް ފެނިގެންދިޔަ އެޑަމްސް ނިޔާވި ޚަބަރު ފެތުރުމުގެ 24 ގަޑިއިރުވެސް ނުވަނީސް، އޭނާ ވަނީ އޭނާގެ ލޯބިވެރިޔާއާއެކު ނަގާފައިވާ ފޮޓޯއެއް އިންސްޓަގްރާމްގައި ހިއްސާކޮށްފައެވެ.
މަމެލޯޑީ ސަންޑައުންސްއަށް ކުޅެމުންދިޔަ އެޑަމްސް ނިޔާވެފައި އޮއްވާ ފެނުނީ ކޭޕް ޓައުންގެ ހޮޓަލަކުން ކަމަށް ބެލެވުނު ނަމަވެސް، އޭނާ ނިޔާވި ސަބަބެއް މިހާތަނަށް ކަމާބެހޭ ފަރާތްތަކުން ކަށަވަރުކޮށްދީފައެއް ނުވެއެވެ.
ވޯލްޑް ކަޕްގެ ދުވަސްވަރަކީ އެޑަމްސްއަށް އަމިއްލަ ދިރިއުޅުމުގައި ވަރަށް ހިތާމަވެރި ދުވަސްވަރެކެވެ. މުބާރާތް ފެށުމުގެ ދެ ހަފުތާ ކުރިން އޭނާގެ މާމަ، މަރިއާނާ އެޑަމްސް ނިޔާވިއިރު، މާމަގެ ޖަނާޒާ ކުރިއަށްދިޔަ ދުވަހުވެސް އޭނާ ހުރީ ގައުމީ ވާޖިބުގައި އެމެރިކާގައެވެ. މީގެ އިތުރުން، މީގެ ތިން އަހަރު ކުރިން މަރާލި އޭނާގެ ގާތް އެކުވެރިޔާ އަދި ޒުވާން ފުޓްބޯޅަ ކުޅުންތެރިޔާ އޮޝްވިން އެންޑްރީސްގެ ވަކިވުމުގެ ހިތާމަވެސް އޭނާ ދިޔައީ ތަހައްމަލު ކުރަމުންނެވެ.
އެޑަމްސްގެ މަރާ ގުޅިގެން ދެކުނު އެފްރިކާގެ ފުޓްބޯޅަ ކުޅުންތެރިންގެ ޔޫނިއަން (SAFPU) އިން ނެރުނު ބަޔާނެއްގައި ބުނެފައިވަނީ، މަމެލޯޑީ ސަންޑައުންސް އަދި ގައުމީ ޓީމުގެ މިޑްފީލްޑަރުގެ ކުއްލި ވަކިވުމަކީ ލިބުނު ފުން ހިތާމައެއް ކަމަށެވެ. އަދި އޭނާއަކީ ގައުމީ އުންމީދުތަކާ އެކު ފަޚުރުވެރިކަމާއެކު ގައުމު ތަމްސީލުކުރި ނަމޫނާ ކުޅުންތެރިއެއް ކަމަށްވެސް އެ ބަޔާނުގައި ފާހަގަކޮށްފައިވެއެވެ.
ދެކުނު އެފްރިކާގެ ކުޅިވަރާ ބެހޭ ވަޒީރު ގޭޓަން މެކެންޒީ ވެސް ވަނީ ސޯޝަލް މީޑިއާގައި އެޑަމްސްއަށް ތައުޒިޔާ ފޮނުއްވާފައެވެ.
އެޑަމްސްގެ ކުޅިވަރު ހަޔާތަށް ބަލާއިރު، އޭނާ ފުރަތަމަ ފެނިގެންދިޔައީ ސްޓެލަންބޮޝް އެފްސީންނެވެ. އޭގެ ފަހުން 2025 ވަނަ އަހަރުގެ ޖެނުއަރީ މަހު އޭނާ ވަނީ މަމެލޯޑީ ސަންޑައުންސްއަށް ބަދަލުވެފައެވެ. ދަނޑުމަތީގައި އޭނާ ދައްކަމުންދިޔަ ހުނަރުވެރި ކުޅުމުގެ ސަބަބުން އޭނާ ބެލެވިފައިވަނީ ދެކުނު އެފްރިކާގެ ފުޓްބޯޅައިގެ މުސްތަގުބަލާ ގުޅިފައިވާ މުހިންމު ކުޅުންތެރިއެއްގެ ގޮތުގައެވެ.
އެޑަމްސްގެ ލޯބިވެރިޔާ އަގީލާ އަޑެންޑޯފް، ވޯލްޑް ކަޕްގެ ފުރަތަމަ މެޗުގެ ކުރިން އޭނާއަށް ފޮނުވި މެސެޖެއްގައި ބުނެފައިވަނީ، އެޑަމްސް އެ ހިސާބަށް ދިއުމަށްޓަކައި ކުރި ބުރަ މަސައްކަތާއި، ވީ ގުރުބާނީތަކަށްޓަކައި އިންތިހާއަށް ފަޚުރުވެރިވާ ކަމަށެވެ. އެޑަމްސް އާއި އަގީލާގެ ފަސް އަހަރުގެ އަންހެން ދަރިއަކު ހުރެއެވެ.
ރިއެކްޓް އަދި ކޮމެންޓް ކުރެއްވުމަށް
