އައްޑޫ މީދޫ ކައުންސިލާއި އައްޑޫ ހުޅުދޫ ކައުންސިލާއި ބޭންކް އޮފް މޯލްޑިވްސް (ބީ.އެމް.އެލް) ހުޅުމީދޫ ބްރާންޗްގެ އިސް ބޭފުޅުންނާ ދެމެދު ރަސްމީ ބައްދަލުވުމެއް ބާއްވައިފިއެވެ. ދެރަށުގެ ކައުންސިލާއި ވަކުވަކިން ބޭއްވުނު މި ބައްދަލުވުމުގެ މައިގަނޑު މަޤްޞަދަކީ ދެ މުއައްސަސާގެ ދެމެދުގައި އޮންނަ ގުޅުން ހަރުދަނާކޮށް، ދެރަށުގެ ތަރައްޤީއަށްޓަކައި ގުޅިގެން މަސައްކަތް ކުރެވޭނެ ގޮތްތަކާ މެދު މަޝްވަރާކުރުމެވެ.
ބައްދަލުވުން ފެއްޓެވުމުގެ ގޮތުން، ބޭންކް އޮފް މޯލްޑިވްސް ހުޅުމީދޫ ބްރާންޗްގެ އިސް ބޭފުޅުން ވަނީ ކައުންސިލަށާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއު.ޑީ.ސީ) އަށް އަލަށް އިންތިޚާބުވި މެންބަރުންނާ ތަޢާރަފްވެފައެވެ. އަދި ހުރިހާ މެންބަރުންނަށް ބޭންކުގެ ފަރާތުން ހޫނު މަރުޙަބާއެއް ދަންނަވައި، ކާމިޔާބު ދައުރަކަށް އެދިވަޑައިގެންނެވިއެވެ.
މި ބައްދަލުވުމުގައި ބޭންކް އޮފް މޯލްޑިވްސް އާއި އައްޑޫ މީދޫ ކައުންސިލާއި ހުޅުދޫ ކައުންސިލާއި ދެމެދު އޮންނަ ގުޅުން މިހާރަށްވުރެ ބަދަހިކުރުމުގެ މުހިންމުކަމާ ގުޅޭގޮތުން ފުޅާދާއިރާއެއްގައި ވާހަކަދެކެވުނެވެ. ދެ ފަރާތުގެ މެދުގައި އޮންނަ އިތުބާރު ދަމަހައްޓައި، ޚިދުމަތްތައް ހޯދުމުގައި ހުރި ދަތިތަކަށް ލުއިފަސޭހަ ގޮތްތަކެއް ހޯދުމަށް މަޝްވަރާކުރެވުނެވެ.
މިބައްދަލުވުމުގައި ދެރަށުގެ އިޖުތިމާޢީ އަދި އިޤްތިޞާދީ ތަރައްޤީއަށް މަގުފަހިވާނެ ކަންކަމުގައި ބޭންކުގެ އެހީތެރިކަމާއި އެއްބާރުލުން ލިބޭނެ ދާއިރާތަކާ ގުޅޭގޮތުން މަޝްވަރާކުރެވުނެވެ. މީގެ ތެރޭގައި ރަށުގެ ވިޔަފާރިވެރިންނަށް ހުރި ފުރުޞަތުތަކާއި، ކައުންސިލުން ހިންގާ ތަރައްޤީގެ މަސައްކަތްތަކުގައި ބޭންކުގެ 'ކޯޕަރޭޓް ސޯޝަލް ރެސްޕޮންސިބިލިޓީ' (ސީ.އެސް.އާރް) ގެ ދަށުން އެހީތެރިކަން ފޯރުކޮށްދެވޭނެ ގޮތްތައް ހިމެނެއެވެ.
މި ބައްދަލުވުމަކީ ވަރަށް އުއްމީދީ އަދި ނަތީޖާ ނެރެވޭނެ ފަދަ ބައްދަލުވުމެއްގެ ގޮތުގައި ދެ ފަރާތުންވެސް ފާހަގަކުރެއްވިއެވެ. މި ބައްދަލުވުމުގެ ސަބަބުން ބޭންކާއި ކައުންސިލާ ދެމެދު އޮތް ގުޅުން އިތުރަށް ވަރުގަދަވެ، މީދޫގެ ތަރައްޤީއަށް ކުރެވޭ މަސައްކަތްތަކަށް އައު ދިރުމެއް ލިބިގެންދާނެ ކަމަށް ބެލެވެއެވެ.
ރިއެކްޓް އަދި ކޮމެންޓް ކުރެއްވުމަށް
