ފީފާ ވޯލްޑް ކަޕުގައި ރޭ ކުޅުނު މެޗުގައި 1-0 ގެ ނަތީޖާއަކުން ދެކުނު ކޮރެއާގެ މައްޗަށް ކުރިހޯދައި، މެކްސިކޯ އިން ދެވަނަ ބުރުގެ ފުރަތަމަ ޖާގަ ކަށަވަރުކޮށްފިއެވެ.
މި ދެ ޓީމަކީވެސް މުބާރާތުގައި ކުޅުނު ފުރަތަމަ މެޗު ކާމިޔާބުކޮށް، ރަނގަޅު ފޯމެއްގައި އޮތް ދެ ޓީމެވެ. އެގޮތުން، މެކްސިކޯ އިން ފުރަތަމަ މެޗުގައި ދެކުނު އެފްރިކާ ބަލިކުރިއިރު، ދެކުނު ކޮރެއާ އިން ވަނީ ޗެކް ރިޕަބްލިކްގެ މައްޗަށް ކުރިހޯދާފައެވެ.
ރޭގެ މެޗުން ލިބުނު މުހިންމު ތިން ޕޮއިންޓާއެކު، މެކްސިކޯ އިން ވަނީ ގުރޫޕުގެ އެއްވަނައިގައި ހަ ޕޮއިންޓު ހަމަކޮށްފައެވެ. ދެކުނު ކޮރެއާ އަށް ތިން ޕޮއިންޓު ލިބިފައިވާއިރު، މި ގުރޫޕުގައި ހިމެނޭ އަނެއް ދެ ޓީމަށް މިހާތަނަށް ލިބިފައިވަނީ އެއް ޕޮއިންޓެވެ.
މެކްސިކޯގައި ކުޅުނު މި މެޗުގެ ފުރަތަމަ ހާފުގައި އެ ޓީމުގެ ފަރާތުން އެދެވޭ ކުޅުމެއް ފެނިގެން ގޮސްފައި ނުވާތީ، އެ ގައުމުގެ ސަޕޯޓަރުން ވަނީ ނުރުހުން ފާޅުކޮށްފައެވެ. ނަމަވެސް، ދެވަނަ ހާފުގެ ފަސްވަނަ މިނެޓުގައި ލަނޑެއް ޖަހައި، މެކްސިކޯ އިން ވަނީ ކުޅުން ރަނގަޅުކޮށްފައެވެ. މެޗުގެ ހަމައެކަނި ލަނޑު އެ ޓީމަށް ކާމިޔާބުކޮށްދިނީ ލުއިސް ރޫމޯ އެވެ.
މެޗުގެ ފަހު ވަގުތުކޮޅުގެ ތެރޭގައި ނަތީޖާ އެއްވަރުކުރުމަށް ދެކުނު ކޮރެއާ އަށް ރަނގަޅު ފުރުސަތުތަކެއް ލިބުނެވެ. އެގޮތުން މެޗު ނިމެން ތިން މިނެޓަށް ވެފައި ވަނިކޮށް، ދެކުނު ކޮރެއާގެ ކުޅުންތެރިން ފޮނުވާލި ނުރައްކާތެރި ދެ ހަމަލާއެއް މެކްސިކޯގެ ކީޕަރު ވަނީ ހުށިޔާރުކަމާއެކު ދިފާއުކޮށްފައެވެ.
ގުރޫޕް ސްޓޭޖުގެ ފަހު މެޗުގައި މެކްސިކޯ އިން ޗެކް ރިޕަބްލިކާ ދެކޮޅަށް ނިކުންނައިރު، ދެކުނު ކޮރެއާ ބައްދަލުކުރާނީ ދެކުނު އެފްރިކާއާއެވެ.
ރިއެކްޓް އަދި ކޮމެންޓް ކުރެއްވުމަށް
