ލަލީގާ ތަށީގެ ރޭހުގައި ދެމިއޮތުމަށް ރެއާލް މެޑްރިޑުން ކުރަމުންދާ މަސައްކަތުގައި، މެޗުގެ އިތުރު ވަގުތުގެ ތެރޭގައި ފެޑެރީކޯ ވަލްވާޑޭ ކާމިޔާބުކޮށްދިން ލަނޑާއެކު 2-1 އިން ސެލްޓަ ވިގޯގެ މައްޗަށް ކުރިހޯދައިފިއެވެ.
މެޗުގެ ފުރިހަމަ ވަގުތު ހަމަވެގެން ދެއްކި އިތުރު ވަގުތުގެ ހަތަރުވަނަ މިނެޓުގައި ވަލްވާޑޭ ފޮނުވާލި ބޯޅަ، ޑިފެންޑަރެއްގެ ގައިގައި ޖެހިފައި ގޯލުގެ ތެރެއަށް ވަނުމާއެކު ރެއާލަށް ވަނީ އުނދަގޫ މޮޅެއް ލިބިފައެވެ. މިއީ ޖެހިޖެހިގެން ދެ މެޗުން ބަލިވެފައި އޮތުމަށްފަހު ރެއާލުން ހޯދި މުހިންމު ތިން ޕޮއިންޓެވެ.
މެޗުގެ 11 ވަނަ މިނެޓުގައި އޮރެލިއަން ޗުއަމެނީގެ ލަނޑުން ރެއާލުން ލީޑު ނެގި ނަމަވެސް، 25 ވަނަ މިނެޓުގައި ބޯހާ އިގްލޭސިއަސް ވަނީ ސެލްޓަ އަށް ނަތީޖާ ހަމަހަމަކޮށްދީފައެވެ. މި ލަނޑު ޖެހުމަށް ފުރުސަތު ތަނަވަސްވީ ވިލިއޮޓް ސްވެޑްބާގް އަރިމަތިން ހުރަސްކޮށްލި ބޯޅައަކުންނެވެ.
މި ލަނޑުގައި ޓްރެންޓް އެލެގްޒެންޑާ އާނޯލްޑަށް ހެދުނު ގޯހެއް ފާހަގަކުރެވުނެވެ. އޭނާގެ އަތުން ބޯޅަ ގެއްލުމުގެ ފައިދާ ނަގައި، ސެލްޓަގެ ކުޅުންތެރިޔާ ވަނީ ވަރަށް ފުރިހަމަ ފުރުސަތެއް ތަނަވަސްކޮށްދީފައެވެ.
އަނިޔާ އާއި ސަސްޕެންޝަނުގެ ސަބަބުން މުހިންމު 9 ކުޅުންތެރިން ނުލައި ކުޅުނު ރެއާލުން މެޗުގެ ދެވަނަ ހާފުގެ ބޮޑު ބައެއް ކޮންޓްރޯލް ކުރި ނަމަވެސް، ލަނޑު ޖަހާނެ މާ ހުސް ފުރުސަތުތަކެއް ތަނަވަހެއް ނުކުރެވުނެވެ. މެޗުގެ 57 ވަނަ މިނެޓުގައި ވިނީޝިއަސް ޖޫނިއާ އޭރިއާ ބޭރުން ފޮނުވާލި ހަމަލާއަކީ ދެވަނަ ހާފުގައި ރެއާލަށް އުފެއްދުންތެރިކޮށް ފެނުނު ފުރަތަމަ ހަމަލާއެވެ.
މެޗުގެ 88 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ސެލްޓަގެ އިއާގޯ އަސްޕާސް ފޮނުވާލި ބޯޅަ ގޯލުގެ ދަނޑީގައި ޖެހުނެވެ. އޭގެ ކުޑައިރުކޮޅެއް ފަހުން ވަލްވާޑޭ ދުރުން ފޮނުވާލި ބޯޅަ ޑިފެންޑަރެއްގެ ގައިގައި ޖެހިފައި މިސްރާބު ބަދަލުވެގެން ގޯލަށް ވަނީ ކީޕަރަށް އެއްވެސް ފުރުސަތެއް ނުލިބިއެވެ.
ލަނޑަށްފަހު ރެއާލްގެ ކުޅުންތެރިން އުފާފާޅުކުރަމުން ދަނިކޮށް، ލަނޑު ޖެހުމުގެ ކުރިން ފައުލެއް ހިނގާފައިވޭތޯ ރެފްރީ ވީއޭއާރު މެދުވެރިކޮށް ބަލައިފާނެތީ ކުޑަވަގުތުކޮޅަކަށް ނުތަނަވަސްކަން އުފެދުނެވެ. ނަމަވެސް ރެފްރީ އެގޮތަށް ނިންމާފައި ނުވުމުން، މެޗު ނިމުނުއިރު ރެއާލަށް ވަނީ ބޮޑު ހިތްހަމަޖެހުމެއް ލިބިފައެވެ. ސެލްޓަގެ ކުޅުންތެރިން ތިބީ މެޗުގެ ފަހު ސިކުންތުކޮޅުގައި ލަނޑެއް ވަނުމުން ވަރަށް ބޮޑަށް މާޔޫސްވެފައެވެ.
"މިއީ ވަރަށް ހިތްދަތި ކަމެއް. މެޗު ނިމެން އުޅެނިކޮށް މިހެންވުމުން ވަރަށް ބޮޑަށް މާޔޫސްވެއްޖެ،" ސެލްޓަގެ ފޯވާޑް އިގްލޭސިއަސް ބުންޏެވެ.
ތާވަލުގެ އެއްވަނައިގައި ބާސެލޯނާ އޮތީ 64 ޕޮއިންޓާއެކުގައެވެ. ރެއާލް މެޑްރިޑަށް މިހާރު ވަނީ 63 ޕޮއިންޓް ލިބިފައެވެ. ބާސެލޯނާއިން ހޮނިހިރު ދުވަހު އެތުލެޓިކް ބިލްބާއޯއާ ދެކޮޅަށް ނުކުންނާނެއެވެ.
ރިއެކްޓް އަދި ކޮމެންޓް ކުރެއްވުމަށް
