އިނގިރޭސި ޕްރިމިއާ ލީގުގައި ރޭ ކުޅުނު ފޯރިގަދަ މެޗުގައި، އެއް ކުޅުންތެރިއަކު މަދުކޮށް ކުޅެމުންދިޔަ ނިއުކާސަލް ޔުނައިޓެޑުން މެންޗެސްޓާ ޔުނައިޓެޑްގެ މައްޗަށް ކުރިހޯދައިފިއެވެ. ނިއުކާސަލްގެ ސެއިންޓް ޖޭމްސް ޕާކުގައި ކުޅުނު މި މެޗު އެ ޓީމުން ކާމިޔާބުކުރީ 1-2 ގެ ނަތީޖާއަކުންނެވެ.
މެޗުގެ ކުރިން ވާހަކަދައްކަމުން، ނިއުކާސަލްގެ ސަޕޯޓަރެއްގެ ގޮތުގައި ބޮޑުވި މައިކަލް ކެރިކް ވަނީ، އަމިއްލަ ދަނޑުގައި ނިއުކާސަލްއާ ދެކޮޅަށް ކުޅުމަކީ ފަސޭހަ ކަމަކަށް ނުވާނެ ކަމަށް ބުނެފައެވެ. މެޗުގެ ކަންތައްތައް ހިނގައިދިޔަ ގޮތުން އޭނާގެ މި ބުނުމުގެ ތެދުކަން ވަނީ ސާބިތުވެފައެވެ.
މެޗުގެ ފުރަތަމަ ހާފު ނިމުމުގެ ކުރިން ނިއުކާސަލްއަށް ބޮޑު ގޮންޖެހުމަކާ ކުރިމަތިލާން ޖެހުނެވެ. އެއީ އެ ޓީމުގެ މިޑްފީލްޑަރު ޖޭކޮބް ރަމްސީއަށް ރެފްރީ ޕީޓާ ބޭންކްސް ރަތް ކާޑު ދައްކާ ދަނޑުން ފޮނުވާލުމެވެ. މެންޗެސްޓާގެ ކީޕަރު ސެން ލަމެންސްއާ ކުރިމަތިލި ވަގުތު ޕެނަލްޓީއެއް ހޯދުމަށް "ޑައިވް" ކުރި ކަމަށް ބަލައި ރެފްރީ ދެއްކި މި ރަތް ކާޑާއެކު ނިއުކާސަލްއަށް މެޗުގެ ބާކީ ބައި ފުރިހަމަކުރަން ޖެހުނީ 10 ކުޅުންތެރިންނާއެކުގައެވެ.
މި ނިންމުމާއެކުވެސް ހިތްވަރު އެލުވާނުލައި ކުޅެމުންދިޔަ ނިއުކާސަލްއަށް ޕެނަލްޓީއެއް ލިބުނެވެ. މިއީ މެންޗެސްޓާގެ ބްރޫނޯ ފެނާންޑޭޒް، ނިއުކާސަލްގެ އެންތަނީ ގޯޑަންއަށް އޭރިއާ ތެރެއިން ކުރި ފައުލަކާ ގުޅިގެން ލިބުނު ޕެނަލްޓީއެކެވެ. މި ޕެނަލްޓީ ކާމިޔާބުކޮށް ގޯޑަން ވަނީ މި ސީޒަނުގައި އޭނާ ޖެހި 15 ވަނަ ލަނޑާއެކު ނިއުކާސަލްއަށް ލީޑު ނަގައިދީފައެވެ.
އެހެންނަމަވެސް، ފުރަތަމަ ހާފުގެ އިތުރު ވަގުތުގެ ތެރޭގައި މެންޗެސްޓާ ޔުނައިޓެޑުން ނަތީޖާ އެއްވަރުކުރިއެވެ. ބްރޫނޯ ފެނާންޑޭޒް ފޮނުވާލި ހިލޭ ޖެހުމެއް، ތަޖުރިބާކާރު މިޑްފީލްޑަރު ކަސެމީރޯ ވަނީ ބޮލުން ޖަހައި ގޯލުގެ ތެރެއަށް ފޮނުވާލާފައެވެ.
ދެވަނަ ހާފުގައި ދެ ޓީމުގެ ފަރާތުންވެސް ނުރައްކާތެރި ހަމަލާތަކެއް ފެނިގެންދިޔައެވެ. ނިއުކާސަލްގެ ގޯޑަންއަށް ލިބުނު ރަނގަޅު ފުރުސަތެއް ބޭކާރުވިއިރު، މެންޗެސްޓާގެ ލެނީ ޔޯރޯ އަދި ޖޯޝުއާ ޒިރްކްޒީ ފޮނުވާލި ހަމަލާތައް ނިއުކާސަލްގެ ކީޕަރު އެރޮން ރަމްސްޑޭލް ވަނީ ހުޝިޔާރުކަމާއެކު ދިފާއުކޮށްފައެވެ.
މެޗުގެ ނަތީޖާ ނިއުކާސަލް ކޮޅަށް އެނބުރިގެންދިޔައީ 90 ވަނަ މިނެޓުގައެވެ. ބަދަލު ކުޅުންތެރިއެއްގެ ގޮތުގައި ކުޅެން އެރި ވިލިއަމް އޮސޫލާ، އޭރިއާ ތެރެއަށް ވަދެ ފޮނުވާލި ބާރު ހަމަލާ ގޯލުގެ އަރިމަތީ ދާގަނޑަށް އަމާޒުވިއިރު، މެންޗެސްޓާގެ ކީޕަރު ލަމެންސްއަށް އެ ބޯޅަ ހުއްޓުވުމުގެ އެއްވެސް ފުރުސަތެއް ނުލިބުނެވެ.
މި މޮޅާއެކު ނިއުކާސަލްއިން ވަނީ އެކަކު މަދުކޮށް ކުޅެމުންވެސް ތާރީޚީ މޮޅެއް ހޯދައި، ސަޕޯޓަރުން އުފާކޮށްދީފައެވެ.
ރިއެކްޓް އަދި ކޮމެންޓް ކުރެއްވުމަށް
