އައްޑޫސިޓީ މީދޫގައި ކުރިއަށްދާ ޕޮލިސް ފުޓްސަލް މުބާރާތް 2025 ގެ ބުރާސްފަތި ދުވަހުގެރޭ ކުޅުނު ސެމީފައިނަލް މެޗުގައި ގަން ޕޮލިސްއާ ބައްދަލުކޮށް ހުޅުމީދޫ ޕޮލިސް 2-0 ގެ ނަތީޖާއަކުން މޮޅުވެ، މުބާރާތުގެ ފައިނަލަށް ދަތުރުކޮށްފިއެވެ.
މީދޫ ޓާފް ދަނޑުގައި ކުޅުނު މިމެޗްގައި ހުޅުމީދޫ ޕޮލިސްގެ ފުރަތަމަ ލަނޑު ޖަހައިދިނީ ފައިސަލެވެ. އަދި އެޓީމްގެ ދެވަނަ ލަނޑު ޖަހައިދިނީ އަލީ މުޙައްމަދެވެ.
މި މެޗުގައި ހުޅުމީދޫ ޕޮލިސްގެ ޑިފެންސް ވަރަށް ވަރުގަދަކޮށް ބެލެހެއްޓުމުގެ ސަބަބުން ގަން ޕޮލިސްއަށް އެއްވެސް ލަނޑެއް ޖެހޭ ގޮތެއް ނުވިއެވެ.
"މި މެޗަކީ ވަރަށް ބޮޑަށް ތައްޔާރުވެގެން ކުޅުނު މެޗެއް. ގަން ޕޮލިސްއަކީ ވަރަށް ވަރުގަދަ ޓީމެއް. އެހެންނަމަވެސް އަޅުގަނޑުމެންގެ ކުޅުންތެރިން ވަރަށް ހަރުދަނާ ކުޅުމެއް ދައްކައި، މެޗް ކުރިން ރޭވި ގޭމްޕްލޭން ރަނގަޅަށް ތަންފީޒުކޮށް، އަޅުގަނޑުމެންނަށް މި ކާމިޔާބު ހޯދުނީ،"
ހުޅުމީދޫ ޓީމްގެ ޔާސީން ވީއޯއެމްއަށް މައުލޫމާތު ދެމުން ބުނެފައިވެއެވެ.
މިމެޗުގެ އެންމެ މޮޅު ކުޅުންތެރިޔާގެ މަގާމް ހޯދީ ހުޅުމީދޫ ޕޮލިސްގެ ފައިސަލެވެ. ފައިސަލް ވަނީ މެޗުގައި ހުޅުމީދޫ ޓީމަށް ފުރަތަމަ ލަނޑު ޖެހުމުގެ އިތުރުން، ގަން ޕޮލިސްގެ ހަމަލާތައް ޑިފެންސް ކުރުމުގައި މުހިއްމު ދައުރެއް އަދާކޮށްފައެވެ.
މުބާރާތުގެ ފައިނަލްގައި ހުޅުމީދޫ ޕޮލިސްއާ ބައްދަލުކުރާނީ ކޮންބައިން ފުޓްބޯޅަ ކުލަބެވެ. ކޮންބައިން ފުޓްބޯޅަ ކުލަބަކީ މިހާތަނަށް މުބާރާތުގައި އެންމެ ގިނަ ލަނޑު ޖަހާފައިވާ ޓީމެވެ. މިޓީމް ހުޅުމީދޫއާއި އެކު ކުޅުނު މެޗްފިޔަވައި މިހާތަނަށް ކުޅުނު ހުރިހާ މެޗެއްގައިވެސް މޮޅުވެފައިވެއެވެ. އަދި މި ޓީމަކީ މުބާރާތުގެ ފެވަރިޓް ޓީމުގެ ގޮތުގައި މިހާރުވަނީ ބެލެވިފައިވާ ޓީމެވެ.
"ފައިނަލްގައި ބައްދަލުކުރަނީ ވަރަށް ވަރުގަދަ ޓީމަކާ. އެހެންނަމަވެސް އަޅުގަނޑުމެން ރަނގަޅަށް ތައްޔާރުވެގެން ކުޅެފިނަމަ، އިރާދަކުރެއްވިއްޔާ ޗެމްޕިއަންކަން ހޯދޭނެ،" ހުޅުމީދޫ ޓީމްގެ ޔާސީން ވީއޯއެމްއަށް މައުލޫމާތު ދެމުން ބުނެފައިވެއެވެ.
ޕޮލިސް ފުޓްސަލް މުބާރާތް 2025 އަކީ އައްޑޫސިޓީގެ އެކި ޕޮލިސް ސްޓޭޝަންތަކާއި ޕޮލިސް ސްޓޭޝަންތަކުގެ ބައެއް ކުޅިވަރު ކުލަބުތައް ބައިވެރިކޮށްގެން ކުރިއަށް ގެންދާ މުބާރާތެކެވެ.
މުބާރާތުގެ ފައިނަލް މެޗް ކުޅޭނީ އާދީތައް ދުވަހުގެރޭ 9:00 ގައި މީދޫ ޓާފް ދަނޑުގައެވެ.
މި މުބާރާތް މީދޫގައި ކުރިއަށް ދާއިރި މީދޫ ރައްޔިތުންގެ މެދުގައި މިމުބާރާތަށް ވަރަށް ބޮޑު ޝައުޤުވެރިކަމެއް އުފެދިފައިވާ ކަން ފާހަކަ ކުރެވެއެވެ. އެއީ ކޮންމެ މެޗެއްގައިވެސް ގިނަ އަދަދެއްގެ ކުޅިވަރު ލޯބިކުރާ ފަރާތްތަކުން ދަނޑަށް ހާޒިރުވެ ޓީމުތަކަށް ހިތްވަރުދެމުން ގެންދާތީއެވެ.
ރިއެކްޓް އަދި ކޮމެންޓް ކުރެއްވުމަށް
