މި އަހަރުގެ ރަމަޟާން މަހުގެ ފަހު ފަނަރައިގެ ރޭތައް ފެށުމާ ގުޅިގެން، މީދޫގައި ހުކުރު ނަމާދުކުރާ މިސްކިތްތަކުގެ ތެރެއިން ދެ މިސްކިތެއްގައި މިރެއިން ފެށިގެން ދަމުނަމާދު ކުރުމުގެ އިންތިޒާމު ހަމަޖައްސައިފިއެވެ.
މީދޫ އަވަށު އޮފީހުގެ ރަސްމީ ފޭސްބުކް ޕޭޖުގައި ޝާއިޢުކޮށްފައިވާ މައުލޫމާތަށް ބަލާއިރު، ދަމުނަމާދު ކުރުމަށް ހަމަޖެހިފައިވަނީ މަސްޖިދުލް ހުސައިން އަލީ އާއި މީދޫ މާމިސްކިތުގައެވެ. މި ދެ މިސްކިތުގައިވެސް ދަމުނަމާދު އިމާމުވެ ކުރައްވާނީ މިހާރުވެސް އެ މިސްކިތްތަކުގައި ތަރާވީސް ނަމާދު އިމާމުވެ ކުރައްވަމުން ގެންދަވާ ބޭރުގެ ހާފިޒުންނެވެ.
އެގޮތުން، މަސްޖިދުލް ހުސައިން އަލީގައި ދަމުނަމާދު އިމާމުވެ ކުރައްވާނީ ޕާކިސްތާނުގެ އަލްހާފިޒު މުގުސިދެވެ. އަދި މީދޫ މާމިސްކިތުގައި ދަމުނަމާދު ކުރައްވާނީ އިންޑިއާގެ އަލްހާފިޒު އަބްދުލް މާޖިދެވެ.
ރަމަޟާން މަހުގެ ފަހު ދިހައެއްގެ ރޭތަކުގައި ދަމުނަމާދު ކުރުމަކީ ރާއްޖޭގެ ގިނަ ރަށްތަކެއްގައި ވަރަށް ފޯރިއާއެކު ކުރަމުން އަންނަ އަޅުކަމެކެވެ.
މީދޫގެ މި ދެ މިސްކިތުގައި ދަމުނަމާދު ކުރުމުގެ އިންތިޒާމު ހަމަޖެހިގެން ދިއުމަކީ، އެ އަވަށުގެ ގިނަ ބަޔަކަށް ރޭ އަޅުކަމުގައި ބައިވެރިވުމަށް ލިބިގެންދާނެ ބޮޑު ފުރުސަތެކެވެ.
ރިއެކްޓް އަދި ކޮމެންޓް ކުރެއްވުމަށް
