ނޮވެމްބަރު މަސް ނިމުނުއިރު ޗެލްސީ އޮތީ ތާވަލުގެ ތިންވަނައިގައި، އުއްމީދީ ފެށުމެއްގައެވެ. ވަކިން ހާއްސަކޮށް، ޗެމްޕިއަންސް ލީގުގައި ބާސެލޯނާގެ މައްޗަށް ހޯދި ކާމިޔާބީއާއެކު ޓީމުގެ ރޫހު ވަރުގަދަވެ، ކުޅުންތެރިންގެ އިތުބާރު ބޮޑުވިއެވެ. ނަމަވެސް، ޑިސެމްބަރު މަސް ވެގެންދިޔައީ ޓީމުގެ ކުޅުން ދަށްވެ، ލީގުގައި އެންމެ މޮޅަކުން ފުއްދާލަން ޖެހުނު އުނދަގޫ މަހަކަށެވެ.
ކޯޗު އެންޒޯ މަރެސްކާއަށް ކުރިމަތިވި ގޮންޖެހުންތަކަކީ ހަމައެކަނި ދަނޑުމަތީގެ ނަތީޖާތަކެއް ނޫނެވެ. ކްލަބުގެ މެނޭޖްމަންޓާއި އޭނާއާ ދެމެދު އުފެދުނު ނުތަނަވަސްކަން މި މުއްދަތުގައި ބޮޑުވެގެންދިޔައެވެ. އެވަޓަންއާ ދެކޮޅަށް ކުޅުނު މެޗުން 2-0 އިން މޮޅުވުމަށްފަހު، މަރެސްކާ ދެއްކި ވާހަކަތަކުން ކްލަބުގެ އިސްވެރިންނާއި އޭނާގެ އެހީތެރިންވެސް ތިބީ ހައިރާންވެފައެވެ. އެގޮތުން "ގިނަ ބައެއްގެ" އަމަލުތަކުގެ ސަބަބުން، ވޭތުވެދިޔަ 48 ގަޑިއިރަކީ އޭނާގެ ކޯޗިންގ ކެރިއަރުގައި އެންމެ ތަހައްމަލުކުރަން އުނދަގޫވި ވަގުތުކޮޅު ކަމަށް އޭނާ ބުންޏެވެ.
މި ވާހަކަތަކަކީ ސީދާ ކްލަބުގެ މެނޭޖްމަންޓަށް އަމާޒުކުރި ބަސްތަކެއް ކަމަށް ބެލެވޭތީ، މެނޭޖްމަންޓުން އެކަމާ ނުރުހުން ފާޅުކުރިއެވެ. އެހެންނަމަވެސް، ކްލަބުން ނިންމާފައިވަނީ ވަގުތުން ފިޔަވަޅެއް އެޅުމުގެ ބަދަލުގައި، ސީޒަން ނިމުމުން ކަންކަން މުރާޖައާކޮށް ގޮތެއް ނިންމުމަށެވެ.
ފަހަކަށް އައިސް ކުޅުނު ހަތް މެޗުން އެންމެ މޮޅެއް ލިބުމަކީ މަރެސްކާގެ މަގާމަށް އޮތް ބޮޑު ބިރެކެވެ. ތާވަލުގެ ތިންވަނައަށްވުރެ މިހާރު ޗެލްސީ ގާތީ 15 ވަނައާއެވެ. މީގެ އިތުރުން، ކުރިއަށް އޮތް އުނދަގޫ މެޗުތަކުގައި މުހިންމު މިޑްފީލްޑަރު މޮއިސަސް ކައިސޭޑޯ ނުލައި ކުޅެން ޖެހުމަކީވެސް އިތުރު ގޮންޖެހުމެކެވެ.
ޖެނުއަރީ މަހުގެ ތެރޭގައި މެންޗެސްޓަރ ސިޓީ، އާސެނަލް އަދި ނަޕޯލީ ފަދަ ވަރުގަދަ ޓީމުތަކާ ދެކޮޅަށް ކުޅެން ޖެހޭއިރު، މިއީ މަރެސްކާގެ މުސްތަގުބަލު ކަނޑައެޅޭނެ މުހިންމު ދުވަސްވަރެކެވެ.
ޗެލްސީގެ މައިގަނޑު އަމާޒަކީ ޗެމްޕިއަންސް ލީގުގެ ޖާގައެއް ކަށަވަރުކުރުން ކަމަށްވާއިރު، މިވަގުތު އޮތް ފަސްވަނަ މަގާމާއެކު އެ ފުރުސަތު އަދިވެސް އެބައޮތެވެ. އަދި ކަރަބާއޯ ކަޕްގެ ސެމީ ފައިނަލަށް ދަތުރުކޮށްފައި އޮތުމަކީ މި ސީޒަނުގައި ތައްޓެއް ހޯދުމަށް އޮތް އުއްމީދެކެވެ.
ރިއެކްޓް އަދި ކޮމެންޓް ކުރެއްވުމަށް
