އިރާނާ ދެކޮޅަށް އެމެރިކާ އާއި އިސްރާއީލުން ކުރަމުންދާ ހަނގުރާމައަށް 100 ދުވަސް

އިރާނާ ދެކޮޅަށް އެމެރިކާ އާއި އިސްރާއީލުން ކުރަމުންދާ ހަނގުރާމައަށް 100 ދުވަސް ފުރުނުއިރުވެސް، ހަނގުރާމަ ހުއްޓާލެވޭނެ ފުރުސަތެއް އަދިވެސް ނުފެނެއެވެ. މި ހަމަނުޖެހުންތަކުގައި އެ ސަރަހައްދުގެ އާންމު ރައްޔިތުންގެ ގިނަ ފުރާނަތަކެއް ދަނީ ގެއްލެމުންނެވެ.

އެމެރިކާގެ ރައީސް ޑޮނަލްޑް ޓްރަމްޕް ކުރިން ވައުދުވެވަޑައިގެންނެވި "ވަރަށް އަވަސް" ކާމިޔާބީއާ ޚިލާފަށް، މި ހަނގުރާމަ މިހާރު ވަނީ އުންމީދު ނުކުރެވޭ ފަދަ ނުރައްކާތެރި މަރުހަލާއަކަށް ގޮސްފައެވެ.

ޕާކިސްތާނުން މެދުވެރިވެގެން އޭޕްރީލް 8 ގައި އިއުލާންކުރި ހަނގުރާމަ ހުއްޓާލުމުގެ އެއްބަސްވުމުން ލޭއޮހޮރުވުން ހުއްޓުވުމަށް މާބޮޑު ބާރެއް ނުލިބުނެވެ. ހޯރްމޫޒް ކަނޑުއޮޅި އަދިވެސް އޮތީ މުދާ އުފުލާ އުޅަނދުފަހަރަށް ބަންދުކޮށްފައެވެ. ސުލްހައިގެ ވާހަކަތައް ނާކާމިޔާބުވުމާ ގާތްވެފައިވާއިރު، އެކި ސަރަހައްދުތަކުގައި ހަމަލާތައް ދަނީ މެދުނުކެނޑި ކުރިއަށެވެ.

އިސްރާއީލުން ވަނީ އިރާނާ ދެކޮޅަށް ކުރާ ހަނގުރާމަ ލުބުނާނަށް ފުޅާކޮށްފައެވެ. އެ ގައުމުގައި މިހާތަނަށް މަދުވެގެން 3،593 މީހުން ޝަހީދުކޮށްލާފައިވާއިރު، އެއް މިލިއަނަށްވުރެ ގިނަ މީހުން ވަނީ ގެދޮރު ދޫކޮށް ދާންޖެހިފައެވެ. ލުބުނާނުގެ ދެކުނުގެ އަވަށްތައް ބިމާ ހަމަކޮށް، އިސްރާއީލުން ދަނީ އެ ސަރަހައްދުތަކަށް ވެރިވެގަންނަމުންނެވެ. ލުބުނާނުގައި މަރުވި މީހުންގެ އަދަދު، މި ހަނގުރާމަ ފެށުނު އިރާނުގައި މަރުވި މީހުންގެ އަދަދަށްވުރެ ވެސް މިހާރު ވަނީ އިތުރުވެފައެވެ. އިރާނުގައި ފެބުރުވަރީ 28 އިން ފެށިގެން މިހާތަނަށް 3،468 މީހުން ވަނީ މަރުވެފައެވެ.

މީގެ އިތުރުން، އިރާނުން ދިން ހަމަލާތަކުގައި ސަރަހައްދުގެ އެހެން ގައުމުތަކުން 150 އަށްވުރެ ގިނަ މީހުން މަރުވެފައިވާއިރު، އިސްރާއީލުން 26 މީހުން އަދި އެމެރިކާގެ 13 ސިފައިން ވަނީ މަރުވެފައެވެ.

ތިރީގައިވާ ފޮޓޯތަކުން ފެންނަނީ އިރާނާއި ލުބުނާނުގެ އިތުރުން މުޅި ސަރަހައްދުގައި ހިނގަމުންދާ 100 ދުވަހުގެ ހަނގުރާމައިގެ ހިތްދަތި މަންޒަރުތަކެވެ. މީގެ ތެރޭގައި ސުންނާފަތިވެފައިވާ އަވަށްތަކާއި، ގިނަ ބަޔަކު ބައިވެރިވާ ޖަނާޒާތަކާއި، މިސައިލް ހަމަލާތައް އެރި އެއާޕޯޓުތަކާއި، ރައްކާތެރިކަން ހޯދަންދާ މީހުންގެ ސަބަބުން ތޮއްޖެހިފައިވާ މަގުތައް ހިމެނެއެވެ. މިއީ ނިމުމެއް ނެތް ހަނގުރާމައެއްގެ ސަބަބުން އިންސާނިއްޔަތަށް ލިބެމުންދާ ބޮޑެތި ގެއްލުންތަކުގެ ހެއްކެކެވެ.

ފޮޓޯ ތަކުން މުހިއްމު ބައެއް ހާދިސާތަކުގެ ތަފްސީލް