ޕްރެމިއަރ ލީގުގެ ތަށި ހޯދުމަށް ކުރާ މަސައްކަތުގައި މެންޗެސްޓަރ ސިޓީއަށް އޮތް ބާރު ކެނޑިއްޖެ ކަމަށް ގާޑިއޯލާ ބުނެފި

އެވަޓަންއާ ދެކޮޅަށް ސިޓީ ކުޅުނު ފޯރިގަދަ މެޗު 3-3 އިން އެއްވަރުވުމާ ގުޅިގެން، ޕްރެމިއަރ ލީގުގެ ތަށި ކާމިޔާބުކުރުމަށް އެޓީމަށް ލިބިފައިވާ އަމިއްލަ ބާރު ގެއްލިފައިވާ ކަމަށް މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނެފިއެވެ.

"މިހާރު މިއީ އަހަރެމެންގެ އަތްމަތީގައި އޮތް ކަމެއް ނޫން. ކުރިން އެ ފުރުސަތު އޮތް ނަމަވެސް، މިހާރު އެކަން ބަދަލުވެއްޖެ، އަދި ލީގުގައި ބާކީ އޮތް ހަތަރު މެޗުވެސް މިކަހަލަ ގޮތަކަށް ދާނެ ކަމަށް ބެލެވޭއިރު، ދެން ވާނެ ގޮތެއް ބަލަން ތިބެމާ ހިނގާ "

ހޯމަ ދުވަހުގެރޭގެ މެޗަށްފަހު ވާހަކަދައްކަމުން ގާޑިއޯލާ ބުނެފައިވެއެވެ.

ހޯމަދުވަހުގެރޭ  އެވަޓަންއާ ދެކޮޅަށް ކުޅުނު މެޗާއި، އޭގެ ފަހުން ބްރެންޓްފޯޑާ ދެކޮޅަށް ކުޅޭ މެޗުން މޮޅުވެގެން، ތާވަލުގެ އެއްވަނައިގައި އޮތް އާސެނަލްއާ ޕޮއިންޓުގެ ގޮތުން ހަމަހަމަ ކުރުމުގެ ފުރުސަތު ސިޓީއަށް އޮތެވެ. ނަމަވެސް، އެވަޓަންއާއިއެކު ކުޅުނުމެޗްގެ ނަތީޖާއާއެކު ސިޓީ މިހާރު އޮތީ އާސެނަލްއަށްވުރެ ފަސް ޕޮއިންޓް ފަހަތުގައެވެ.

ސިޓީއަށް އަތުގައި އެއް މެޗު އިތުރަށް އޮތް ނަމަވެސް، ތަށި ހޯދުމަށްޓަކައި މިހާރު އާސެނަލްގެ ނަތީޖާއަކަށް ބަލަން ތިބުން ވަނީ މަޖުބޫރުވެފައެވެ.

ހިލް ޑިކިންސަން ސްޓޭޑިއަމްގައި ކުޅުނު މި މެޗާ ގުޅޭގޮތުން   ގާޑިއޯލާ އިތުރަށް ބުނީ، ތިން ޕޮއިންޓް ނުލިބުނު ނަމަވެސް ބަލިނުވެ ސަލާމަތްވުމަކީވެސް ލިބުނު ކުރިއެރުމެއް ކަމަށެވެ.

"އަހަރެމެން ބޭނުންވީ މޮޅުވާން. އެކަމަށް މަސައްކަތްވެސް ކުރިން. އަހަރެމެންނަކީ ކިހާ ވަރުގަދަ ޓީމެއްކަން މިމެޗުން ދައްކައިދީފިން. ކުޅުންތެރިން ވަރަށް ހިތްވަރާއެކު ކުޅުނު،"

އޭނާ ފާހަގަކުރިއެވެ.

މެޗުގެ 97 ވަނަ މިނެޓުގައި ސިޓީއަށް ނަތީޖާ ހަމަހަމަކޮށްދިން ޖެރެމީ ޑޯކޫ ބުނީ، މި ނަތީޖާއަކީ ހިތްދަތި ނަތީޖާއެއް ނަމަވެސް، ބާކީ ހުރި މެޗުތަކުގައި ކޮންމެ ފަދަ ބަދަލެއްވެސް އަތުވެދާނެ ކަމަށެވެ. އަދި ޓީމުގެ ސަޕޯޓަރުންނަށްޓަކައިވެސް ފަހު ވަގުތާ ހަމައަށް ޗެމްޕިއަންކަން ލިބޭތޯ މަސައްކަތް ކުރާނެ ކަމުގެ ޔަގީންކަން އޭނާ ދިނެވެ. މެޗުގެ 83 ވަނަ މިނެޓުގައި ލަނޑު ޖެހި އާލިން ހާލަންޑްވެސް މެޗަށްފަހު ބުނެފައިވަނީ، "އަދިވެސް އަހަރެމެން މި ތިބީ ވާދަވެރިކަމުގެ ތެރޭގައި" ކަމަށެވެ.

ސިޓީއަށް ކުރިއަށް އޮތީ ބްރެންޓްފޯޑް، ކްރިސްޓަލް ޕެލަސް، ބޯންމައުތު އަދި އެސްޓަން ވިލާއާ ދެކޮޅަށް ކުޅޭ މެޗުތަކެވެ. އަނެއްކޮޅުން އާސެނަލްއަށް އޮތީ ނިސްބަތުން ފަސޭހަ މެޗުތަކެކެވެ. އެއީ ވެސްޓް ހޭމް ޔުނައިޓެޑް، ބާންލީ އަދި ކްރިސްޓަލް ޕެލަސްއާ ދެކޮޅަށް ކުޅޭ މެޗުތަކެވެ.

ލީގު ތަށީގެ އުއްމީދު ކުޑަވި ނަމަވެސް، އިނގިރޭސި ތިން މުބާރާތް (ޓްރެބަލް) ކާމިޔާބުކުރުމުގެ ފުރުސަތު ސިޓީއަށް އަދިވެސް އެބައޮތެވެ. އެ ޓީމުން ވަނީ މާރިޗު މަހު އާސެނަލް ބަލިކޮށް ލީގު ކަޕް ކާމިޔާބުކޮށްފައެވެ. އަދި އަންނަ މެއި މަހުގެ 16 ވަނަ ދުވަހު އެފް.އޭ ކަޕް ފައިނަލްގައި އެ ޓީމު ނުކުންނާނީ ޗެލްސީއާ ދެކޮޅަށެވެ.