އިންޑިއާ ސަރުކާރުގެ ފުރިހަމަ އެހީގެ ދަށުން ދޭ "އިންޑިއަން ކައުންސިލް ފޯ ކަލްޗަރަލް ރިލޭޝަންސް" (އައި.ސީ.ސީ.އާރު) އަޔޫޝް ސްކޮލަރޝިޕްތަކަށް ކުރިމަތިލުމުގެ ފުރުސަތު ދިވެހި ދަރިވަރުންނަށް ހުޅުވާލައިފިއެވެ. މި ސްކީމަކީ އިންޑިއާގެ މަތީ ފަންތީގެ ޔުނިވަރސިޓީތަކުގައި ތަޢުލީމު ހާސިލުކުރުމަށް ދެވޭ "ފުލީ ފަންޑެޑް" ފުރުސަތުތަކެކެވެ.
ސްކޮލަރޝިޕްގެ ދާއިރާތަކާއި ފެންވަރު:
2026/2027 ވަނަ އަހަރަށް އަމާޒުކޮށް ހުޅުވާލާފައިވާ މި ސްކީމްގެ ދަށުން ކިޔެވުމަށް ހަމަޖެހިފައިވަނީ އަންނަނިވި ދާއިރާތަކުންނެވެ:
ޔޫނާނީ ބޭސްވެރިކަން
އަޔޫރްވެދާ
ހޯމިއޯޕަތީ
ޔޯގާ
ސިއްދާ
މި ދާއިރާތަކުން ފުރަތަމަ ޑިގްރީ (އަންޑަގްރެޖުއޭޓް)، މާސްޓަރސް (ޕޯސްޓް ގްރެޖުއޭޓް) އަދި ޕީ.އެޗް.ޑީ ފެންވަރަށް ކިޔެވުމުގެ ފުރުސަތު ވަނީ ހުޅުވާލެވިފައެވެ.
ކުރިމަތިލުމުގެ ސުންގަޑި އަދި އިޖުރާއާތު:
މި ސްކޮލަރޝިޕްތަކަށް ޝައުޤުވެރިވާ ފަރާތްތަކުން 15 މެއި 2026 ވާ ހުކުރު ދުވަހުގެ ނިޔަލަށް އޮންލައިންކޮށް އެޕްލިކޭޝަން ހުށަހަޅަންޖެހެއެވެ. އެޕްލިކޭޝަން ހުށަހަޅާނީ އައި.ސީ.ސީ.އާރުގެ ޕޯޓަލް https://a2ascholarships.iccr.gov.in މެދުވެރިކޮށެވެ. މި ސްކޮލަރޝިޕަށް ކެންޑިޑޭޓުން ހޮވުމުގެ ހުރިހާ މަރުހަލާއެއް ކުރިއަށް ގެންދާނީ އައި.ސީ.ސީ.އާރުގެ ފަރާތުންނެވެ. ކޯސްތަކާ ގުޅޭ އިތުރު ތަފްސީލާއި ޝަރުތުތައް އެ އިދާރާގެ ވެބްސައިޓުން ލިބެން ހުންނާނެއެވެ.
ސަމާލުކަން ދޭންޖެހޭ މުހިންމު ކަންތައްތައް:
ކޯހަށް ހޮވޭ ދަރިވަރުން ފުރުމުގެ ކުރިން ދެ ކަމަކަށް ޚާއްޞަ ސަމާލުކަމެއް ދޭންޖެހެއެވެ:
ކިޔަވަންދާ މަރުކަޒަކީ އަދި ކޯހަކީ މޯލްޑިވްސް ކޮލިފިކޭޝަންސް އޮތޯރިޓީ (އެމް.ކިޔު.އޭ) އިން ޤަބޫލުކުރާ ތަނެއްކަން ކަށަވަރުކުރުން.
ރާއްޖޭގައި މަސައްކަތްކުރުމަށް ލައިސަންސް ބޭނުންވާ ދާއިރާތަކުން ކިޔަވާނަމަ، އެ ކޯހަކީ ކަމާބެހޭ ސަރުކާރުގެ އިދާރާތަކުން (މިސާލަކަށް ހެލްތު މިނިސްޓްރީ ނުވަތަ ކަމާބެހޭ ކައުންސިލްތައް) ޤަބޫލުކުރާ ކޯހެއްކަން ކަށަވަރުކުރުން.
ދިވެހި ބޭސްވެރިކަމާއި އައްޑޫގެ ގުޅުން:
މި ސްކޮލަރޝިޕަކީ ޔޫނާނީ ބޭސްވެރިކަމާއި އަޔޫރްވެދާ ފަދަ ދާއިރާތަކަށް ޚާއްޞަ ފުރުސަތަކަށް ވާއިރު، މިއީ ރާއްޖޭގެ ސަގާފީ ބޭސްވެރިކަމާ ގުޅުންހުރި ދާއިރާތަކެކެވެ. ޚާއްޞަކޮށް އައްޑޫއަކީ އިހުޒަމާނުންސުރެ ދިވެހި ބޭސްވެރިކަމަށް މަޝްހޫރު ބޭފުޅުން އުޅުއްވި އަތޮޅެކެވެ. މިގޮތުން އައްޑޫ ދޮންބެއްޔާ ލިޔުއްވި ދިވެހި ބޭސް ފޮތަކީ މިއަދުވެސް މި ދާއިރާގައި ނުހަނު މަޤްބޫލު ފޮތެކެވެ. އެހެންކަމުން، އައްޑޫގެ ޒުވާނުން މިފަދަ ފުރުސަތުތަކުގެ ބޭނުން ހިފައި، އިލްމީ ގޮތުން މި ދާއިރާއިން ކުރިއަށް ދިއުމަކީ ރާއްޖޭގެ ބޭސްވެރިކަމުގެ ދާއިރާ އާލާކުރުމަށް ލިބޭނެ މުހިންމު ބާރެކެވެ.
މިއީ ރާއްޖެއަށް ބޭނުންވެފައިވާ ސަގާފީ ބޭސްވެރިކަމުގެ ދާއިރާއިން މީހުން ބިނާކުރުމަށް ލިބިގެންދާ ރަނގަޅު ފުރުސަތެއްކަމުގައި ފާހަގަކުރެވެއެވެ.
ރިއެކްޓް އަދި ކޮމެންޓް ކުރެއްވުމަށް
