ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ ލެގުގައި، ބަޔާން މިއުނިކުން ރެއާލް މެޑްރިޑްގެ މައްޗަށް 2-1 އިން ކުރި ހޯދައިފިއެވެ.
މި މެޗުގައި ބަޔާންގެ ލަނޑުތައް ކާމިޔާބުކޮށްދިނީ ލުއިސް ޑިއާޒް އަދި ހެރީ ކޭންއެވެ. މެޗު ނިމެން 16 މިނިޓަށް ވެފައި ވަނިކޮށް ކީލިއަން އެމްބާޕޭ ކާމިޔާބުކޮށްދިން ލަނޑާއެކު، އަންނަ ހަފުތާގައި މިއުނިކްގައި ކުޅޭ ދެވަނަ ލެގުގެ ކުރިން ރެއާލަށް ވަނީ އުއްމީދެއް ލިބިފައެވެ.
ޔޫރަޕްގެ އެންމެ ވަރުގަދަ ދެ ޓީމުގެ ކުރިމަތިލުމުގައި، ވިންސެންޓް ކޮމްޕެނީގެ އިރުޝާދުގެ ދަށުން ކުޅޭ ބަޔާން މިއުނިކުން ފުރަތަމަ ހާފުގައި މޮޅު ކުޅުމެއް ދައްކައި މެޗު ކޮންޓްރޯލް ކުރިއެވެ. ބަޔާންއިން މެޗުގެ ލީޑު ނެގީ 41 ވަނަ މިނިޓުގައި ލުއިސް ޑިއާޒް ކާމިޔާބުކޮށްދިން ލަނޑުންނެވެ. އަދި ދެވަނަ ހާފު ފެށިގެން ފުރަތަމަ މިނިޓުގައި ހެރީ ކޭން ވަނީ އިތުރު ލަނޑެއް ޖަހައި ލީޑު ފުޅާކޮށްދީފައެވެ. މިއީ މި ސީޒަނުގެ ޗެމްޕިއަންސް ލީގުގައި ކޭން ކާމިޔާބުކުރި 11 ވަނަ ލަނޑެވެ.
ރެއާލް މެޑްރިޑުން މެޗުގެ ތެރެއަށް އެނބުރި އައުމަށް ކުރި މަސައްކަތް ކާމިޔާބުވީ 74 ވަނަ މިނިޓުގައެވެ. މިލަނޑަކީ ޓްރެންޓް އެލެގްޒެންޑާ އާނޯލްޑް ތަނަވަސްކޮށްދިން ފުރުސަތަކުން އެމްބާޕޭ ކާމިޔާބުކޮށް ދިން ލަނޑެކެވެ.
ބަޔާންގެ ކީޕަރު ނޯޔާ ވަނީ މިމެޗުގައި އެމްބާޕޭ އާއި ވިނީޝިއަސް ޖޫނިއާ ފޮނުވާލި ނުރައްކާތެރި ހަމަލާތަކެއް ދިފާއުކޮށްފައެވެ.
މެޗަށްފަހު ވާހަކަދައްކަމުން ހެރީ ކޭން ބުނީ ޓީމުގެ ކުޅުމާ މެދު ވަރަށް ބޮޑަށް ހިތްހަމަޖެހޭ ކަމަށާއި، މިއީ މުހިންމު މޮޅެއް ކަމަށެވެ.
ރެއާލްގެ ޑިފެންޑަރު އެންޓޯނިއޯ ރޫޑިގާ ފާހަގަކުރި ގޮތުގައި، އެމްބާޕޭގެ ލަނޑާއެކު އަދިވެސް ރެއާލަށް ފުރުސަތު އެބައޮތެވެ. ނަމަވެސް، ބަޔާންއިން ޖެހި ދެ ލަނޑަކީވެސް ރެއާލްގެ ޑިފެންޑަރުންނަށް ހެދުނު ގޯސްތަކަކުން ލިބުނު ފުރުސަތުތަކެއް ކަމަށް އޭނާ އެއްބަސްވިއެވެ.
ދެ ޓީމުގެ މެދުގައި ކުޅެވޭ ކުއާޓާ ފައިނަލްގެ ދެވަނަ ލެގު އޮންނާނީ އަންނަ ބުދަ ދުވަހުގެ ރޭ ބަޔާންގެ ދަނޑުގައެވެ.
ރިއެކްޓް އަދި ކޮމެންޓް ކުރެއްވުމަށް
