ދުނިޔޭގެ ކަންފަތުގެ ސިއްހަތާއި އިވުމުގެ ދުވަހަކީ ކޮންމެ އަހަރަކުވެސް މާޗް މަހުގެ 3 ވަނަ ދުވަހު ބައިނަލްއަގުވާމީ ފެންވަރުގައި ފާހަގަކުރާ ސިއްހީ ހަރަކާތެކެވެ. 2007 ވަނަ އަހަރުން ފެށިގެން ޖެނީވާގައި ހުންނަ ދުނިޔޭގެ ސިއްހަތު ޖަމްއިއްޔާގެ މައި މަރުކަޒުން އިސްނަގައިގެން ކުރިއަށްގެންދާ މި ހަރަކާތުގެ މަގްސަދަކީ، އަޑުއިވުމުން މަހުރޫމްވެފައިވާ ފަރާތްތަކަށް އެހީތެރިކަން ފޯރުކޮށްދިނުމާއި، ކަންފަތުގެ ސިއްހަތަށް ހޭލުންތެރިކަން އިތުރުކުރުމެވެ. މީގެ އިތުރުން، އިވުމުގެ މައްސަލަތައް ދެނެގަންނާނެ ގޮތްތަކާއި، ފަރުވާގެ ނިޒާމުތަކާ ގުޅޭގޮތުން މުޖުތަމައު ހޭލުންތެރިކުރުވުން މި ދުވަހުގެ މަގްސަދުތަކުގެ ތެރޭގައި ހިމެނެއެވެ.
ދުނިޔޭގެ އާބާދީގެ 5 އިންސައްތައަށްވުރެ ގިނަ މީހުން (ގާތްގަނޑަކަށް 43 ކްރޯޑު މީހުން) އަކީ އިވުމުން މަހުރޫމްވުމުގެ ސަބަބުން އިތުރު އެހީތެރިކަމާއި ފަރުވާ ބޭނުންވާ މީހުންނެވެ. އަންދާޒާކުރެވޭ ގޮތުގައި 2050 ވަނަ އަހަރާ ހަމައަށް ދާއިރު، ކޮންމެ 10 މީހަކުން އެކަކީ (ޖުމްލަ 70 ކްރޯޑު މީހުން) ބޮޑެތި އިވުމުގެ މައްސަލަތައް ތަހައްމަލު ކުރަންޖެހޭނެ ބައެކެވެ.
އާންމުކޮށް 'ނުކުޅެދުންތެރިކަމެއްގެ' ގޮތުގައި ބެލެވެނީ ރަނގަޅަށް އަޑުއިވޭ ކަންފަތަށް 35 ޑެސިބެލް (dB) އަށްވުރެ ބާރަށް އަޑުއިވޭ ހާލަތްތަކުގައެވެ. އިވުމުގެ މައްސަލަތައް ހުންނަ މީހުންގެ ތެރެއިން ގާތްގަނޑަކަށް 80 އިންސައްތަ މީހުން ދިރިއުޅެނީ އާމްދަނީ މަދުން ލިބޭ ގައުމުތަކުގައެވެ.
2026 ވަނަ އަހަރުގެ ދުނިޔޭގެ ކަންފަތުގެ ސިއްހަތާއި އިވުމުގެ ދުވަހުގެ ޝިއާރު:"މުޖުތަމައުތަކުން ކްލާސްރޫމްތަކަށް: ހުރިހާ ކުޑަކުދިންނަށް ކަންފަތުގެ ފަރުވާ"
މި އަހަރުގެ ޝިއާރު ހާއްސަކޮށްފައިވަނީ ކުޑަކުދިންނަށް ކުރިމަތިވާ އިވުމުގެ މައްސަލަތައް ކުރިއާލާ ދެނެގަނެ، އެކަންކަމަށް ފަރުވާ ހޯދައިދިނުމަށެވެ. މީގެ އިތުރުން، ބާރުގަދަ އަޑުތަކުން ކަންފަތް ރައްކާތެރިކުރުމާއި، ގަވާއިދުން ކަންފަތް ޗެކްކުރުމާއި، އަޑުއިވުމަށް އެހީތެރިވާ އާލާތްތައް ބޭނުންކުރުމަށް މީހުން އަހުލުވެރިކުރުވުން މި ޝިއާރުގެ ތެރޭގައި ހިމެނެއެވެ.
އިވުމުގެ ދުވަހުގެ މުހިންމުކަން:ދުނިޔޭގެ އެކި ކަންކޮޅުތަކުގައި 150 ކްރޯޑަށްވުރެ ގިނަ މީހުންނަށް އިވުމުގެ މައްސަލަތައް ކުރިމަތިވެފައިވާއިރު، މީގެ ތެރެއިން 43 ކްރޯޑު މީހުންނަކީ ބޮޑެތި ނުކުޅެދުންތެރިކަން ތަހައްމަލު ކުރަމުންދާ މީހުންނެވެ. މިކަމާ ގުޅޭ ބައެއް މުހިންމު ހަގީގަތްތަކަކީ:
ގިނަ މީހުން ދިރިއުޅެނީ އެކަށީގެންވާ ސިއްހީ ފަރުވާ ނުލިބޭ ގައުމުތަކުގައެވެ.
ފަރުވާ ނުދެވި ހުންނަ އިވުމުގެ މައްސަލަތަކުގެ ސަބަބުން ދުނިޔޭގެ އިގްތިސާދަށް އަހަރަކު 98,000 ކްރޯޑު ޑޮލަރުގެ ގެއްލުންވެއެވެ.
އަޑުގަދަ މާހައުލުތަކުގައި އުޅުމާއި، ކަންފަތުގެ އިންފެކްޝަންތަކަށް ފަރުވާ ނުކުރުމުގެ ސަބަބުން ކުރިއަށް އޮތް އަހަރުތަކުގައި މި މައްސަލަ އިތުރަށް ގޯސްވާނެ ކަމަށް ބެލެވެއެވެ.
ކުޑަކުދިންނަށް ދިމާވާ އިވުމުގެ މައްސަލަތަކުގެ 60 އިންސައްތައަކީ ކުރިއާލާ ރައްކާތެރިކަމުގެ ފިޔަވަޅު އަޅައިފިނަމަ ހުއްޓުވިދާނެ ކަންކަމެވެ.
ކަންފަތުގެ މައްސަލަތަކުން ރައްކާތެރިވުމަށް ކުރެވިދާނެ ކަންތައްތައް:
ވެކްސިން ޖެހުން.
މާބަނޑު ދުވަސްވަރުން ފެށިގެން ދަރިފުޅަށް ރަނގަޅު އަޅާލުން ދިނުން.
ވިރާސީ ގޮތުން ދިމާވާ މައްސަލަތަކަށް ލަފާ ހޯދުން.
ކަންފަތުގެ އާންމު ބަލިތަކަށް އަވަހަށް ފަރުވާ ހޯދުން.
މަސައްކަތުގެ މާހައުލުގައި ބާރުގަދަ އަޑުތަކާއި ކެމިކަލްތަކުން ރައްކާތެރިވުން.
މި ދުވަސް ފާހަގަކުރުމުގެ އެންމެ ބޮޑު މަގްސަދަކީ ކަންފަތުގެ ސިއްހަތަށް މީހުން ހޭލުންތެރިކޮށް، ކުރިއާލާ ބަލިތައް ދެނެގަނެ، އެކަށީގެންވާ ފަރުވާ ހޯދުމަށް މަގުފަހިކޮށްދިނުމެވެ.
ރިއެކްޓް އަދި ކޮމެންޓް ކުރެއްވުމަށް
