ކުޅިވަރަކީ ހަމައެކަނި މޮޅުވުމާއި ބަލިވުމެއް ނޫން ކަމަށާއި، އެއީ އަޒުމާއި ކެތްތެރިކަމާއެކު ގަދައަޅައި ކުރާ މަސައްކަތުގެ ނަތީޖާކަން ސާބިތުކޮށްދެމުން، އައްޑޫ މީދޫގެ ކުޅިވަރުގެ ތާރީޚުގައި ފާހަގަކޮށްލެވޭ ފަދަ އައު ޞަފްޙާއެއް މީދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއުޑީސީ) ގެ ނައިބު ރައީސާ އަދި "ސްކީމް" ޖަމްޢިއްޔާގެ ވައިސް ޗެއަރ ލުބުނާ ދައްކުވައިދީފިއެވެ.
މީދޫގައި ކުރިން މާ ބޮޑު މަޤްބޫލުކަމެއް ލިބިފައިނުވާ ހޭންޑްބޯޅަ އެ ރަށުގައި ފުޅާކޮށް، ޒުވާން އަންހެން ކުޅުންތެރިންތަކެއް ބިނާކޮށްގެން ހޯދި މި ކާމިޔާބީއަކީ މާޔޫސްވުމެއް ނެތި، ދެގޮތެއްނުވެ ކުރި ބުރަ މަސައްކަތުގެ ފޮނި ނަތީޖާއެކެވެ. މިއީ މީދޫގެ ޒުވާނުން ބާރުވެރިކުރުވުމަށާއި، ކުޅިވަރުގެ މައިދާނުގައި އަންހެނުންގެ ދައުރު ފުޅާކުރުމަށް އޭނާ ކުރެއްވި މިންނެތް މަސައްކަތުގެ ތެރެއިން ޙާޞިލުކުރެވުނު އަގުހުރި ލަނޑުދަނޑިއެކެވެ.
މީދޫގައި ހޭންޑްބޯޅަ ކުރިއެރުވުމުގެ މި ބުރަ އަދި ތާރީޚީ ދަތުރު ލުބުނާ އެންމެ ފުރަތަމަ ފެއްޓެވީ ސްކީމް ޖަމްޢިއްޔާގެ މީދޫ ފޯކަލް ޕޮއިންޓުގެ މަޤާމުގައި ހުންނެވި ދުވަސްވަރު، ހުޅުމީދޫ ޕޮލިސް ސްޓޭޝަނުން ތަނަވަސްކޮށްދިން ޚާއްޞަ ފުރުޞަތެއްގެ ތެރެއިންނެވެ. މި ފުރުޞަތުގައި މީދޫ ޝަމްސުއާއެކު މި ޙަރަކާތް ފެށުމަށްޓަކައި ސްކީމް ޖަމްޢިއްޔާގެ ނަމުގައި ބައިވެރިވުމުގެ ހުއްދައަށް ލުބުނާ އެދިވަޑައިގަތުމުން، އެ ޖަމްޢިއްޔާގެ ރައީސާ ޝިމްލާ ވަނީ އެކަމަށް ފުރިހަމަ ތާއީދު ދެއްވާފައެވެ. އެގޮތުން ޝިމްލާ އޭރު ވިދާޅުވީ، ލުބުނާއަށް ފެންނަ އެންމެ ރަނގަޅު ގޮތަކަށް، ޤަވާޢިދުގެ އިމުގެ ތެރެއިން މި މަސައްކަތް ކުރިއަށް ގެންދިއުމަށް ފުރިހަމަ އިޚްތިޔާރު އޮތް ކަމަށެވެ. އަދި މިހުއްދަ މިގޮތައް ލިބުމުން ޕޮލިސް މެދުވެރިކޮށް ލިބުނު ޓްރެއިންގ ގައި ސްކީމް ޖަމްއިއްޔާގެ ނަމުގައި ލުބުނާ ބައިވެރިވެ ޓްރެއިން ޕޮރޮގްރާމް ފުރިހަމަކޮށްފައިވެއެވެ.
މިއާއެކު، ރަށުގެ ޒުވާން އަންހެން ކުދިން މި ކުޅިވަރަށް ޝައުޤުވެރިކުރުވުމުގެ އަމާޒުގައި، އެކުދިންނާ ގާތުން ބައްދަލުކޮށް ވާހަކަދައްކައި، މުޅިން އަލަށް ޓީމެއް އެކުލަވާލުމުގެ ބިންގާ އެޅުނެވެ. މި ހިސާބުން ފެށިގެން އެ ކުދިންނަށް ކުޅިވަރުގެ އަސާސީ ހުނަރުތައް ދަސްކޮށްދިނުމުގެ މަސައްކަތް ފެށިގެން ދިޔައީ ގިނަ ގޮންޖެހުންތަކަކާ އެކުގައެވެ.
އެއަށްފަހު ފަރިތަކުރުންތައް ބާރަށް ކުރިއަށް ގެންގޮސް، ކުޅުންތެރިންގެ ފެންވަރު ވަޒަންކުރުމަށާއި، މުބާރާތްތަކުގެ ތަޖުރިބާ ހޯދައިދިނުމުގެ މަޤްޞަދުގައި ޚާއްޞަ އެކުވެރިކަމުގެ މެޗުތަކެއް އިންތިޒާމުކުރެވުނެވެ. މިގޮތުން ހިތަދޫގެ ވަރުގަދަ މައިލޯ ޓީމާއި ފޭދޫގެ ހޭންޑްބޯޅަ ޓީމު މީދޫއަށް ގެނެސްގެން ކުޅުނު މެޗުތަކުގައި ފެނިގެންދިޔައީ ވަރަށް ބޮޑު ފަރަގެކެވެ. މީދޫގެ ޒުވާން ޓީމު އެ މެޗުތައް ބޮޑު ތަފާތަކުން ބަލިވި ނަމަވެސް، އެއިން އެއްވެސް ކަމަކުން ލުބުނާގެ ސާބިތު އަޒުމަކަށް އެއްވެސް ގުޑުމެއް ނޭރިއެވެ. އޭނާ ދެކެވަޑައިގަތީ އެއީ މާޔޫސްވާންޖެހޭ ސަބަބެއް ނޫން ކަމަށާއި، އެއީ އިތުރަށް ހިތްވަރުކޮށް، ކުޅުންތެރިންގެ ފެންވަރު މަތިކުރުމަށް ލިބުނު އަގުހުރި ފިލާވަޅެއް ކަމުގައެވެ. ބަލިވުންތަކުން އިބުރަތް ޙާޞިލުކޮށް، ކުދިންގެ ނަފްސާނީ ހިތްވަރު އާލާކޮށްދިނުމުގައި ލުބުނާ ދެއްކެވި ސާބިތުކަމަކީ މި ދަތުރުގެ އެންމެ މުހިންމު ބިންގަލެވެ.
މި ކުޅިވަރު އިތުރަށް ހަރުދަނާކޮށް، ދެމެހެއްޓެނިވި ގޮތެއްގައި ކުރިއަށް ގެންދިއުމުގެ ބޭނުމުގައި، މީދޫގެ އިތުރުން އަވަށްޓެރި ހުޅުދޫގެ ޒުވާނުންވެސް މި ހަރަކާތުގެ ތެރެއަށް ޝާމިލުކުރެވުނެވެ. އެއާއެކު ދެ ރަށުގެ ކުދިން އެއްކޮށްލައިގެން މެދުކެނޑުމެއްނެތި ތަމްރީނުތައް ކުރިއަށް ގެންދެވުނެވެ.
ކުޅުންތެރިންނަށް ރަސްމީ އަދި ހަރުދަނާ އޮނިގަނޑެއްގެ ތެރެއިން ފުރުޞަތުތައް ފަހިކޮށްދިނުމަށްޓަކައި، ލުބުނާއާއެކު އަބަދުވެސް މި މަސައްކަތުގައި އިސްކޮށް އުޅުއްވި ޝަމްސުއާ ގުޅިގެން "ލެވެންޑާސް" ގެ ނަމުގައި ޖަމްޢިއްޔާއެއް ރަސްމީކޮށް ރަޖިސްޓްރީ ކުރެވުނެވެ. މި ޖަމްޢިއްޔާ އުފެދުމަކީ ދެ ރަށުގެ ޒުވާނުން ހޭންޑް ބޯލްގެ ޒަރީޢާއިން ބާރުވެރިކުރުވުމަށް އެޅުނު ވަރަށް ވަރުގަދަ ފިޔަވަޅެކެވެ. މީގެއިތުރުން، ލުބުނާ ފާހަގަކުރެއްވި ގޮތުގައި މި ދަތުރުގައި އޭނާއަށާއި ޝަމްސުއަށް އެކި ގޮތްގޮތުން އެހީތެރިކަން ފޯރުކޮށްދިނުމުގައި ވަޒުނާގެ ފަރާތުން ލިބުނު އެއްބާރުލުމަކީވެސް ފާހަގަކޮށްލަންޖެހޭ މުހިންމު އެހީތެރިކަމެކެވެ.
މި ބުރަ މަސައްކަތުގެ މައިގަނޑު އަމާޒަކަށްވީ ހަމައެކަނި މެޗުތަކެއް ކުޅުމެއް ނޫނެވެ. އޭގެ ބަދަލުގައި، އަވަށުގެ އަންހެން ކުދިންގެ މެދުގައި ކުޅިވަރުގެ ރޫޙު އާލާކޮށް، ދުޅަހެޔޮ މުޖުތަމަޢެއް ބިނާކުރުމަށްޓަކައި އެ ކުދިންނަށް ބޭނުންވާ ލީޑަޝިޕް ހުނަރުތަކާއި ޓީމުވޯކް ދަސްކޮށްދިނުމެވެ. އެގޮތުން ދަނޑުމަތީގައި ދެއްކި ހިތްވަރާއި، ކުރި ބުރަ މަސައްކަތުގެ ސަބަބުން، ކުރު މުއްދަތެއްގެ ތެރޭގައި އެ ކުދިންގެ ކުޅުމަށް ބޮޑެތި ކުރިއެރުންތަކެއް އައިސް، އިދިކޮޅު ޓީމުތަކަށް ވަރުގަދަ ގޮންޖެހުމަކަށް ވެގެންދާނެ ފެންވަރަށް ކުޅުންތެރިންގެ ހުނަރު ތަރައްޤީވެގެން ދިޔައެވެ. މިއީ އެއްވެސް ޝައްކެއްނެތް ގޮތުގައި، ލުބުނާގެ ލީޑަޝިޕްގެ ދަށުން އެޅުނު ހަރުދަނާ ބިންގަލުގެ ސީދާ ނަތީޖާއެވެ.
މި ބުރަ މަސައްކަތްތަކުގެ ފޮނި މޭވާ ލިބިގެންދިޔައީ ހީކުރި ވަރަށްވުރެވެސް މާ އަވަހަށެވެ. މީދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީން އިންތިޒާމުކޮށްގެން މުޅި އައްޑޫ ސިޓީއަށް ހުޅުވާލައިގެން މީދޫގައި ބޭއްވި ފޯރިގަދަ ހޭންޑްބޯޅަ މުބާރާތަކީ މި ދަތުރުގެ އެންމެ ބޮޑު އިމްތިޙާނެވެ. އެ މުބާރާތުގައި އައްޑޫގެ ތަޖުރިބާކާރު އެތައް ޓީމަކާ ވާދަކޮށް، މީދޫގެ ޒުވާން ޓީމުން ވަނީ މުޅި މުބާރާތުގެ ޗެމްޕިއަންކަން ކުލަގަދަކޮށް ހޯދާފައެވެ. ކުރިން އެކުވެރިކަމުގެ މެޗުތަކުގައި ބޮޑެތި ތަފާތުތަކުން ބަލިވި ޓީމެއް، ކުރު މުއްދަތެއްގެ ތެރޭގައި އެކަތިގަނޑަކަށްވެ، މުޅި އަތޮޅުގެ އެންމެ މޮޅު ޓީމުގެ ޝަރަފު ހޯދައިގަތުމަކީ ލުބުނާގެ ކެތްތެރިކަމާއި ރޭވުންތެރި ލީޑަޝިޕަށް ލިބުނު ވަރަށް އަގުހުރި ކާމިޔާބީއެކެވެ. މިއީ މީދޫގެ ކުޅިވަރުގެ ތާރީޚުގައި ލިޔެވިގެންދިޔަ ރަން ކާމިޔާބީއެކެވެ.
މި ތާރީޚީ ކާމިޔާބީއާއެކު ސާބިތުވެގެން ދިޔައީ، ވަސީލަތްތައް މަދު ނަމަވެސް އިޚްލާޞްތެރި މަސައްކަތާއި ހިތްވަރު ހުރެއްޖެނަމަ ކޮންމެ ކަމެއްވެސް ޙާޞިލުކުރެވިދާނެ ކަމެވެ. މީދޫގައި އަންހެނުންގެ ކުޅިވަރު ކުރިއެރުވުމަށް ލުބުނާ ކޮށްދެއްވި އަގުނުކުރެވޭ ފަދަ ޚިދުމަތަކީ މުޅި ރަށުގެ ފަޚުރެކެވެ. އެއްވެސް ފަސްޖެހުމެއްނެތި، ޒުވާނުންތަކެއް ބިނާކުރައްވައި، މުޖުތަމަޢަށް ފައިދާހުރި ހަރަކާތްތަކެއްގެ ތެރެއަށް އެކުދިން ނެރުމަށް އޭނާ ދެއްކެވި ނަމޫނާއަކީ މުޅި މުޖުތަމަޢަށްވެސް ލިބުނު އަގުހުރި ފިލާވަޅެކެވެ. އަންހެނުން ކުޅިވަރުގެ ދާއިރާއިން ބާރުވެރިކުރުވުމަކީ ހަމައެކަނި ޓްރޮފީއެއް ހޯދުމެއް ނޫން ކަމާއި، އެއީ މުޅި މުޖުތަމަޢުގެ އިޖުތިމާޢީ ފޭރާން ވަރުގަދަކޮށްދޭ ކަމެއްކަން މި މަސައްކަތުން ވަނީ ދައްކުވައިދީފައެވެ.
އެހެންކަމުން، މިފަދަ އަގުހުރި އިޚްލާޞްތެރި ޚިދުމަތްތެރިންގެ މަސައްކަތްތައް ފާހަގަކޮށް، މީދޫގެ ކަމާބެހޭ މުއައްސަސާތަކުންނާއި ވެރިންގެ ފަރާތުން ލުބުނާގެ މި މިންނެތް މަސައްކަތުގެ އަގުވަޒަންކުރުމަކީ ނުހަނު މުހިންމު އަދި ކޮންމެހެން ކުރަންޖެހިފައިވާ ކަމެކެވެ. ރަށުގެ ތަރައްޤީއަށްޓަކައި އަމިއްލަ އެދުމެއްނެތި މަސައްކަތްކުރާ ފަރާތްތަކަށް ހައްޤު ޝުކުރާއި ތަޢުރީފު އަދާކުރުމަކީ، މުސްތަޤުބަލުގައި އިތުރު ޒުވާނުން މިފަދަ އިޖުތިމާޢީ އަދި ކުޅިވަރުގެ ޚިދުމަތްތަކަށް ނުކުތުމަށް ލިބިގެންދާނެ ވަރަށް ބޮޑު ހިތްވަރެކެވެ. އެފަދަ ހިތްވަރު ދިނުންތަކުގެ ސަބަބުން މުޖުތަމަޢުގައި ހެޔޮ ބަދަލުތައް އައުމަށް މަގުފަހިވެގެންދާނެއެވެ.
ނިންމާލަމުން ދަންނަވާނަމަ، މީދޫގައި ހޭންޑްބޯޅަ ކުރިއެރުވުމަށް ލުބުނާއާއި އޭނާގެ ޓީމުން ކުރެއްވި މަސައްކަތަކީ މުޅި އައްޑޫސިޓީގައި ތިބި ޒުވާން ލީޑަރުންނަށް ހުރި ނަމޫނާއެކެވެ. އެއްވެސް ކަމެއް ނެތް ތަނަކުން ފަށައިގަނެ، ގިނަ ގޮންޖެހުންތަކާއި ބޮޑެތި ބަލިވުންތަކާ ކުރިމަތިލުމަށްފަހު، އެންމެ އުހަށް ވާސިލުވެވޭނީ ސާބިތު އަޒުމަކާއެކު މެދުކެނޑުމެއްނެތި މަސައްކަތް ކޮށްގެންކަން ލުބުނާ މިވަނީ ޢަމަލީ ގޮތުން ދައްކުވައިދީފައެވެ. މި ކާމިޔާބީއަކީ މީދޫގެ ކުޅިވަރުގެ ތާރީޚުގައި އަބަދުވެސް ރަންއަކުރުން ފަވާލެވިގެންދާނެ، ފަޚުރުވެރި އަދި އެހާމެ އަގުހުރި ކާމިޔާބެކެވެ.
ރިއެކްޓް އަދި ކޮމެންޓް ކުރެއްވުމަށް
