ނޭޕާލްގައި ފެންބޮޑުވުމުގެ ހާދިސާ : 390 މީހުން މަރުވެ 1500 އަށްވުރެ ގިނަ މީހުން ގެއްލިއްޖެ

ނޭޕާލާއި ޓިބެޓަށް ކުރިމަތިވި ނުރައްކާތެރި ފެންބޮޑުވުމުގެ ހާދިސާގައި 1,500 އަށްވުރެ ގިނަ މީހުން ގެއްލިއްޖެ

ގްލޭޝިއާއެއް ގޮވުމުގެ ސަބަބުން ނޭޕާލާއި ޗައިނާގެ ބޯޑަރު ސަރަހައްދުގައި ފެންބޮޑުވެ، މަދުވެގެން 390 މީހުން މަރުވެ، 1,500 އަށްވުރެ ގިނަ މީހުން ގެއްލިއްޖެއެވެ.

ނޭޕާލާއި ޗައިނާ ގުޅޭ ބޯޑަރު ސަރަހައްދުގައި ބުދަ ދުވަހު ކުއްލިއަކަށް އައި ނުރައްކާތެރި ބިރުވެރި ފެންބޮޑުވުމުގެ ހާދިސާގައި  ގެއްލުނު އެތައް ސަތޭކަ ބަޔަކު ހޯދުމުގެ މަސައްކަތް ރެސްކިއު ޓީމުތަކުން ދަނީ ކުރަމުންނެވެ.

މި ކާރިސާގައި މިހާތަނަށް 390 މީހުން މަރުވެފައިވާއިރު، ގެއްލުނު 1,500 އަށްވުރެ ގިނަ މީހުންގެ ތެރޭގައި ބޭރު ގައުމުތަކުގެ މީހުން ހިމެނެއެވެ. އަދި ހިމާލަޔަން ސަރަހައްދުގެ އެތައް ސަތޭކަ ބަޔަކު ގެދޮރު ދޫކޮށް ދާންޖެހިފައިވާ ކަމަށް ކަމާބެހޭ ފަރާތްތަކުން ބުނެއެވެ.

މިކާރިސާ ހިގާފައިވަނީ ހިމާލިޔާ ފަރުބަދަ ތަކުގެ މަތީ ސަރަހައްދަކުން ބިޔަ ގަނޑު ފެންގަޑަކާއެކު ހިލަތަކެއް ކަނޑައިގެންދިއުމާއި ގުޅިގެން އުފެދު ބާރުގަދަ ފެނާއި ކިސަޑުގެ އޮއިވަރު ސުނާމީއެއް ފަދައިން ފަރުބަދަތަކުން ތިރިއަށް ފައިބައިގެންގޮސް ކައިރީގައިވާ އަވަށްތަކާއި ގެދޮރުތަކާއި ފާލަންތަކާއި މަގުތަކުގެ އިތުރުން މުހިއްމު އެތައް ވަސީލަތްތަކެއްވަނީ ސުންނާފަތިކޮށްލާފައެވެ.

ނޭޕާލްގެ އޮފިޝަލުން ހާމަކުރި ގޮތުގައި، ގިނަ އަދަދެއްގެ ފާލަންތައް ހަލާކުވެ، ގާތްގަނޑަކަށް 40 ކިލޯމީޓަރުގެ މަގުތަކަށް ގެއްލުން ލިބިފައިވުމުގެ ސަބަބުން މީހުން ހޯދުމުގެ މަސައްކަތަށް ވަނީ ބޮޑެތި ހުރަސްތަކެއް ކުރިމަތިވެފައެވެ.

ނޭޕާލް ސިފައިންގެ ތަރުޖަމާނު ބްރިގޭޑިއާ ޖެނެރަލް ރާޖާ ރާމް ބާސްނެތު ވިދާޅުވި ގޮތުގައި، ބުރާސްފަތި ދުވަހު ސިފައިންގެ ހެލިކޮޕްޓަރުތައް ބޭނުންކޮށްގެން ފެންބޮޑުވި ސަރަހައްދުތަކުން 100 އަށްވުރެ ގިނަ މީހުން ވަނީ ސަލާމަތްކޮށްފައެވެ.

އޭނާ އިތުރަށް ވިދާޅުވީ، ބޭރު ގައުމުތަކުގެ މަދުވެގެން އަށް މީހަކު ވައިގެ މަގުން ވެރިރަށް ކަތަމަންޑޫއަށް ގެންގޮސްފައިވާ ކަމަށާއި، ތްރިޝޫލީ ހައިޑްރޯޕަވަރ މަޝްރޫއާ ގުޅުންހުރި ތަންތަނުގައި ތާށިވެފައި ތިބި މީހުން ސިފައިންގެ ޓީމުތަކުން ރައްކާތެރި ސަރަހައްދުތަކަށް ބަދަލުކޮށްފައިވާ ކަމަށެވެ.

ކާރިސާ ހިނގި ސަރަހައްދާ 100 ކިލޯމީޓަރު ދުރުގައި އޮންނަ ޗިތުވާން ޑިސްޓްރިކްޓުން ފެންގަނޑާއެކު އޮޔާދިޔަ ބައެއް މީހުންގެ ހަށިތައް ވަނީ ފެނިފައެވެ. އަދި އަނިޔާވި އެތައް ބަޔަކު އިތުރު ފަރުވާއަށް ކަތަމަންޑޫއަށް ވަނީ ގެންގޮސްފައެވެ.

ނޭޕާލް ރެޑް ކްރޮސް ސޮސައިޓީގެ ޗެއާޕާސަން ބިޝާލް ކުމާރު ބަންޑާރީ ވިދާޅުވީ، މިހާރު އިސްކަންދެނީ މީހުން ސަލާމަތްކުރުމުގެ ބަދަލުގައި ފެންބޮޑުވި ސަރަހައްދުތަކަށް ބޭނުންވާ އެހީ ފޯރުކޮށްދިނުމުގެ ބޮޑު އޮޕަރޭޝަނަކަށެވެ. މަދުވެގެން ތިން އަވަށަކުން 1,200 އެއްހާ މީހުން ގެދޮރު ދޫކޮށް ގޮސްފައިވާ ކަމަށްވެސް އޭނާ ވިދާޅުވިއެވެ.

ޓިބެޓުގައި ބުދަ ދުވަހު ގީރޮންގް ބޯޑަރު ސަރަހައްދަށް ކުރިމަތިވި މިހާދިސާގައި  އެ ސަރަހައްދުގައި އެވްރެޖްކޮށް 1.5 މީޓަރުގެ އުސްމިނަށް ކިސަޑު ޖަމާވެފައިވާ ކަމަށާއި، ބައެއް މަގުތަކުގައި 2 މީޓަރަށްވުރެ އުސްކޮށް ކިސަޑު ހުރި ކަމަށް ޗައިނާގެ ދައުލަތުގެ މީޑިއާ ސީސީޓީވީން ރިޕޯޓުކޮށްފައިވެއެވެ.

ރިއެކްޓް އަދި ކޮމެންޓް ކުރެއްވުމަށް