ފޯރިގަދަ ކުޅުމަކަށްފަހު ނިމިގެންދިޔަ ވޯލްޑް ކަޕް ފުޓްބޯޅަ މުބާރާތުގެ ފައިނަލް މެޗަށްފަހު ހިނގައިދިޔަ ހިތާމަވެރި ހަމަނުޖެހުންތަކާ ގުޅިގެން، އާޖެންޓީނާގެ ގައުމީ ޓީމުގެ މުހިންމު ކުޅުންތެރިންތަކަކަށާއި އޮފިޝަލުންނަށް ބޮޑެތި އަދަބުތަކެއް ދީފިއެވެ. މި މުބާރާތުގެ ފައިނަލް މެޗުގައި ސްޕެއިނުން ވަނީ 1-0 ގެ ނަތީޖާއަކުން އާޖެންޓީނާގެ މައްޗަށް ކުރިހޯދައި ޗެމްޕިއަންކަން ހޯދާފައެވެ.
ނަމަވެސް، މެޗު ނިމުމާއެކު ދެ ޓީމުގެ ދެމެދުގައި ވަނީ ބޮޑު ހަމަނުޖެހުމެއް ހިނގާފައެވެ.
މި ހަމަނުޖެހުމާ ގުޅިގެން ދުނިޔޭގެ ފުޓްބޯޅައިގެ މައި އިދާރާ (ފީފާ) އިން އެޅި ފިޔަވަޅުތަކުގެ ތެރޭގައި، އާޖެންޓީނާގެ މިޑްފީލްޑަރު ލިއަންޑްރޯ ޕެރެޑޭސް ވަނީ ބައިނަލްއަގުވާމީ 10 މެޗަށް ސަސްޕެންޑް ކޮށްފައެވެ. އަދި އެ ޓީމުގެ ޑިފެންޑަރު ނަހުއެލް މޮލީނާ ވަނީ 7 މެޗަށް ސަސްޕެންޑް ކޮށްފައެވެ. ސަސްޕެންޝަންގެ އިތުރުން މި ދެ ކުޅުންތެރިންކުރެ ކޮންމެ ކުޅުންތެރިއަކު ވަނީ 66،000 ޕައުންޑުން ޖޫރިމަނާވެސް ކޮށްފައެވެ.
މެޗަށްފަހު ދަނޑުމަތީގައި ހިނގި ހަމަނުޖެހުމުގެ ތެރޭގައި ޕެރެޑޭސް ވަނީ ސްޕެއިންގެ ޑިފެންޑަރު އެރިކް ގާސިއާގެ ކަރުގައި ހިފައި، ޒުވާން މިޑްފީލްޑަރު ގަވީ ބިންމައްޗަށް ވައްޓާލާފައެވެ. އަދި އާޖެންޓީނާގެ ކޯޗިން ސްޓާފުންގެ ތެރޭގައި ހިމެނޭ ރޮބާޓޯ އަޔާލާ، ސްޕެއިންގެ ޑެނީ އޮލްމޯގެ މޫނުމަތީގައި ޖެހި މައްސަލައިގައި އޭނާ ވަނީ 3 މެޗަށް ސަސްޕެންޑްކޮށް، 30،000 ޑޮލަރުން ޖޫރިމަނާކޮށްފައެވެ.
ހަމައެއާއެކު، މި ހާދިސާއާ ގުޅިގެން ސްޕެއިންގެ ގަވީއަށްވެސް ވަނީ ފިޔަވަޅު އަޅާފައެވެ. އެގޮތުން ގަވީ ވަނީ އެއް މެޗަށް ސަސްޕެންޑްކޮށް، 22،000 ޕައުންޑުން ޖޫރިމަނާކޮށްފައެވެ. އެހެންނަމަވެސް، މެޗަށްފަހު ވާހަކަދައްކަމުން ގަވީ ވަނީ ޕެރެޑޭސްގެ ދިފާއުގައި ވާހަކަދައްކައި، އެ ހާދިސާއާ ގުޅިގެން ޕެރެޑޭސްއަށް އެވަރުގެ ބޮޑު ފިޔަވަޅެއް އަޅަންޖެހޭ ކަމަށް ގަބޫލުނުކުރާ ކަމަށް ބުނެފައެވެ.
މި މައްސަލައިގައި އާޖެންޓީނާގެ ފުޓްބޯލް އެސޯސިއޭޝަން (އޭއެފްއޭ) ވެސް ވަނީ 235،000 ޕައުންޑުން ޖޫރިމަނާކޮށްފައެވެ. އޭއެފްއޭ ޖޫރިމަނާކުރި މައިގަނޑު ސަބަބަކީ، ކުޅިވަރުގެ މައިދާނެއްގައި ކުޅިވަރުގެ ރޫހާ ހިލާފު އަމަލުތަކެއް ހިންގުމާއި ސަޕޯޓަރުންގެ ފަރާތުން ފެނިގެންދިޔަ ނޭދެވޭ އަދި ބަލައިނުގަނެވޭފަދަ އަމަލުތަކާ ގުޅިގެންނެވެ.
މިދިޔަ މަހު ފީފާ އިން ވަނީ މި ފައިނަލް މެޗަށްފަހު ހިނގި ހުރިހާ ކަމެއް ވަރަށް ސީރިއަސްކޮށް ބަލައި ތަހުގީގުކުރުމަށް ޑިސިޕްލިނަރީ އަދި އެތިކްސް ޕްރޮސެކިޔުޓާއެއް އައްޔަންކޮށް، ފުރިހަމަ ތަހުގީގެއް ހިންގާފައެވެ. މި ތަހުގީގަށްފަހު އެޅި މި ފިޔަވަޅުތަކުގެ ދަށުން ސަސްޕެންޑްކުރި ހުރިހާ ކުޅުންތެރިންނާއި އޮފިޝަލުންގެ ސަސްޕެންޝަން ހިނގާނީ ހަމައެކަނި ބައިނަލްއަގުވާމީ މެޗުތަކަށް ކަމަށް ފީފާއިން ވަނީ ކަށަވަރުކޮށްދީފައެވެ.
ރިއެކްޓް އަދި ކޮމެންޓް ކުރެއްވުމަށް
