ދުނިޔޭގެ ފެންވަރުގެ ކުޅުންތެރިއަކު ބާސެލޯނާއާ ގުޅޭނެކަމުގެ އަޑުތައް ފެތުރޭ ކޮންމެ ފަހަރަކު، ސަޕޯޓަރުންގެ ހިތުގައި އުފެދޭ އެންމެ ބޮޑު ސުވާލަކީ "މީގެ ސަބަބުން ކްލަބުގެ ޒުވާން ކުޅުންތެރިންނަށް ވާނީ ކިހިނެއްތޯ؟" މިއެވެ.
މެންޗެސްޓަރ ސިޓީގެ ރޮޑްރީއާ ބެހޭގޮތުން ދެކެވޭ ވާހަކަތަކުގައި ވެސް ކަންތައްވީ މިހެންނެވެ. ދުނިޔޭގެ އެންމެ މޮޅު ހޯލްޑިންގ މިޑްފީލްޑަރުގެ ގޮތުގައި ގިނަ ބަޔަކު ގަބޫލުކުރާ ރޮޑްރީ ބާސެލޯނާއަށް އަތުވެއްޖެނަމަ، ބާނަލްގެ މުސްތަގުބަލަށް ހުރަސް އެޅިދާނެ ކަމުގެ ބިރު ސަޕޯޓަރުންގެ މެދުގައި ވަނީ އުފެދިފައެވެ. ނަމަވެސް، މިއީ ހަގީގަތާ ޚިލާފު ކަންބޮޑުވުމެކެވެ. ރޮޑްރީ ފަދަ ކުޅުންތެރިއަކު ޓީމަށް ގެނައުމަކީ ބާނަލްގެ ކުރިމަގު ބައްޓަންކުރުމަށް ލިބޭނެ ވަރަށް ބޮޑު އެހީއަކަށް ވާނެއެވެ.
ސާޖިއޯ ބުސްކެޓްސްގެ ކުޅުން ދަށްވާން ފެށި ހިސާބުން، އޭނާގެ މަގާމު ފުރާނެ ކުޅުންތެރިއަކު ހޯދުމަށް ބާސެލޯނާއިން ވަނީ ވަރަށް ބޮޑަށް މަސައްކަތް ކޮށްފައެވެ. ތަފާތު ކުޅުންތެރިން އަޖުމަބަލައި، ކުޅުމުގެ ވައްޓަފާޅިއަށް ބަދަލުތައް ގެނެސް، ވަގުތީ ހައްލުތަކެއް ހޯދަން އެތައް އަހަރެއް ހޭދަކުރިއެވެ. ނަމަވެސް، ބުސްކެޓްސްގެ މަގާމަށް އެކަށީގެންވާ ކުޅުންތެރިއަކު ތައްޔާރުކުރުމުގެ ބަދަލުގައި، އެ ކްލަބުން ގިނަ ވަގުތު ހޭދަކުރީ އެ މަގާމަށް ގެންނާނެ މީހަކާ މެދު ސުވާލު އުފެއްދުމުގައެވެ.
އެހެންކަމުން ރޮޑްރީ ގެނައުމަކީ ބާސެލޯނާއިން ނިންމި ރަގަޅު ނިންމުމެކެވެ. ބާސެލޯނާގެ އުމުރުން އެންމެ 19 އަހަރުގެ ބާނަލް، ފުޓްބޯޅައިގެ އެންމެ އުނދަގޫ އެއް މަގާމަށް ކުއްލިއަކަށް ނެރުމުގެ ބަދަލުގައި، ދުނިޔޭގެ ފެންވަރުގެ ތަޖުރިބާކާރު ކުޅުންތެރިއެއްގެ އިރުޝާދުގެ ދަށުން ކުރިއަށްދިޔުމުގެ ފުރުސަތު އޭނާއަށް ރޮޑްރީގެ ފަރާތުން ލިބިގެންދާނެކަމެކެވެ. މިއީ ވަރަށް މަދު ކްލަބަކަށް ނޫނީ ނުލިބޭނެ ފަދަ ރަނގަޅު ފުރުސަތެކެވެ.
ތަޖުރިބާއަކީ އޭގެ ބަދަލުގައި އެހެން އެއްޗެއް ބޭނުންކުރެވޭނެ އެއްޗެއް ނޫނެވެ. ކޮންމެ ދުވަހަކު ރޮޑްރީއާއެކު ތަމްރީނު ހެދުމާއި އޭނާގެ ކުޅުމުގެ އާދަތަކާއި، ދަނޑުމަތީގައި މަގާމު ހިފަހައްޓާ ގޮތާއި، އަދި ނިންމުންތައް ނިންމާ ގޮތް ބާނަލްއަށް ގާތުން ފެނި ދަސްވާނެއެވެ. ޒުވާން މިޑްފީލްޑަރުންނަށް އެންމެ ބޮޑު ކުރިއެރުމެއް މިފަދަ ލިބެނީ ތަމްރީނުތަކުގެ ތެރެއިންނެވެ.
ބޯޅަ ލިބުމުގެ ކުރިން ރޮޑްރީ ވަށައިގެންވާ މާހައުލު ބަލާލާ ގޮތާއި، ޕްރެޝަރުގެ ވަގުތުތަކުގައި ކުޅުމުގެ ސްޕީޑް ކޮންޓްރޯލްކުރާ ގޮތް ބަލައިގެން ދަސްކުރުމަކީ، ބާނަލްގެ ފެންވަރު މަތިކުރުމަށް ލިބޭނެ ބޮޑު ބާރެކެވެ. ޒުވާން ކުޅުންތެރިން ކުރިއަރަނީ ހަމައެކަނި ދަނޑުމަތީގައި ހޭދަކުރާ ވަގުތަކުން ނޫނެވެ. އެކުޅުންތެރިން ހިމެނޭ މާހައުލަކީ ވެސް އެކަމުގައި މުހިންމު ދައުރެއް އަދާކުރާ އެއްޗެކެވެ.
މިކަމުގައި އެންމެ މުހިންމު ނުކުތާއަކީ ރޮޑްރީގެ އުމުރެވެ. އޭނާގެ އުމުރަކީ 30 އަހަރެވެ. ބާސެލޯނާއިން އޭނާ ގެނައި ނަމަވެސް، އެއީ ކުރިއަށް އޮތް ތިން ހަތަރު އަހަރަށް ވާނެ އިންވެސްޓްމަންޓެކެވެ. މި މުއްދަތަކީ ބާނަލްއަށް އެންމެ އެކަށީގެންވާ މުއްދަތެވެ. ރޮޑްރީގެ ކެރިއަރު ނިމުމަކަށް އަންނައިރު، ބާނަލްގެ އުމުރުން ވާނީ 22 ނުވަތަ 23 އަހަރެވެ. އެއިރުން އޭނާ ހުންނާނީ ޖިސްމާނީ ގޮތުންނާއި، ފަންނީ ގޮތުން އަދި ނަފްސާނީ ގޮތުން ވެސް ޓީމުގެ މެދުތެރެ ބެލެހެއްޓުމަށް ފުރިހަމައަށް ތައްޔާރުވެފައެވެ.
ކޮންމެ މަގާމަކަށް ވެސް ފެންވަރު ރަނގަޅު ދެ ކުޅުންތެރިން ތިބުމަކީ ބޮޑެތި ކްލަބުތައް ވަރަށް ބޮޑަށް ފައިދާ ކުރާނެކަމެކެވެ. ހުނަރުވެރި ޒުވާން ކުޅުންތެރިއަކު ހުރި ނަމަވެސް، ދުނިޔޭގެ ފެންވަރުގެ މޮޅު ކުޅުންތެރިއަކު ޓީމަށް ގެނައުމަށް ފަސްޖެހިގެން ނުވާނެއެވެ. ކްލަބުގެ މަގްސަދަކަށް ވާންޖެހޭނީ ވަރުގަދަ ސްކޮޑެއް އޮތުމާއެކު، އަންނަން އޮތް ޖީލު ފުރިހަމައަށް ތައްޔާރުކުރުމެވެ.
ބާނަލް ދެކެންވީ ރޮޑްރީއަކީ އޭނާގެ ކުރިއެރުމަށް އޮތް ހުރަހެއްގެ ގޮތުގައެއް ނޫނެވެ. އޭގެ ބަދަލުގައި، އޭނާއަކީ ލިބޭނެ އެންމެ މޮޅު އެހީތެރިޔާ ނުވަތަ މެންޓާއެއްގެ ގޮތުގައެވެ. ބާސެލޯނާގެ ރަންޒަމާންތައް ބިނާވެފައިވަނީ މިފަދަ ރޭވުންތެރިކަމުގެ މައްޗަށެވެ. އެހެންކަމުން، ރޮޑްރީއަކީ ބާނަލް ބާސެލޯނާގެ މެދުތެރޭގެ ތަނބަކަށް ހެދުމަށް އެޅޭނެ ވަރުގަދަ ފާލަމެކެވެ.
"ރޮޑްރީ އަތުވެއްޖެނަމަ ބާނަލްއަށް ވާނީ ކިހިނެއްތޯ؟" ސުވާލު އުފެއްދުމުގެ ބަދަލުގައި، "ރޮޑްރީއަކީ ބާސެލޯނާގެ ކުރިއަށް އޮތް ޖީލުގެ އެންމެ މޮޅު މިޑްފީލްޑަރު އުފެއްދުމަށް އެހީތެރިވެދޭނެ ކުޅުންތެރިޔާއަށް ވެދާނެތޯ؟" މިއީ މިއަދު އުފައްދަންވީ ސުވާލެވެ.
ރިއެކްޓް އަދި ކޮމެންޓް ކުރެއްވުމަށް
