އައްޑޫ ސިޓީ މީދޫގެ އަންހެނުންނަށް އަމާޒުކޮށްގެން، މޫދުގެ ހަރަކާތްތަކާއި ޑައިވިންގ އަށް އަހުލުވެރިކުރުވުމުގެ ޕްރޮގްރާމެއް އިއްޔެ ( 5 އޯގަސްޓް 2026 ވަނަ ދުވަހު ) މީދޫގައި ފަށައިފިއެވެ.
މި ޕްރޮގްރާމަކީ މީދޫ 'މުރަކަ ޑައިވިންގ' އާއި މީދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއުޑީސީ) ގުޅިގެން ކުރިއަށްގެންދާ ހަރަކާތެކެވެ. މި ޕްރޮގްރާމްގެ މައިގަނޑު މަޤްޞަދަކީ މީދޫ ޑަބްލިއުޑީސީގެ މެމްބަރުންގެ ތެރެއިން ޑައިވިންގ ކުރުމަށް ޝައުގުވެރިވާ ފަރާތްތަކަށް އެ ފުރުޞަތު ފަހިކޮށްދީ، މި ދާއިރާއިން އަންހެނުން ބާރުވެރިކުރުވުމެވެ.
މިކަމާ ގުޅޭގޮތުން މައުލޫމާތު ދެއްވަމުން މުރަކަ ޑައިވިންގގެ ފަރާތުން އަލީ ޝަހީމު ވިދާޅުވީ، ޕްރޮގްރާމްގެ ތެރެއިން ބައިވެރިންނަށް ޑައިވިންގގެ އަސާސީ ހުނަރުތަކާއި އުކުޅުތައް ދަސްކޮށްދެވޭނެ ކަމަށެވެ. އަދި މި ތަމްރީނުތައް ފުރިހަމަކުރާ ބައިވެރިންގެ ތެރެއިން، މި ދާއިރާއިން ކުރިއަށްދާން ބޭނުންވާ އަދި ބޮޑަށް ޝައުގުވެރިކަން ހުރި ފަރާތްތަކަށް އިތުރު ފުރުޞަތުތައް ފަހިކޮށްދެވޭނެ ކަމަށްވެސް އޭނާ ފާހަގަކުރެއްވިއެވެ.
އަލީ ޝަހީމު އިތުރަށް ވިދާޅުވި ގޮތުގައި، މި ޕްރޮގްރާމްގެ ތެރެއިން އެންމެ ފާހަގަކޮށްލެވޭ ބައިވެރިން ތަމްރީނުކޮށް، ކުރިމަގުގައި ޑައިވިންގ އިންސްޓްރަކްޓަރުންގެ ގޮތުގައި މަސައްކަތް ކުރެވޭނެ ފެންވަރަށް އެ ފަރާތްތައް ތަރައްޤީކޮށްދިނުމަކީ މުރަކަ ޑައިވިންގގެ އަމާޒެކެވެ.
މިފަދަ ޕްރޮގްރާމެއް ހިންގުމުގެ ސަބަބުން، ރާއްޖޭގެ ފަތުރުވެރިކަމުގެ ދާއިރާގައާއި ކަނޑުއަޑީގެ ދިރުންތައް ބެލެހެއްޓުމުގެ މަސައްކަތްތަކުގައި މީދޫގެ އަންހެނުންގެ ދައުރު ފުޅާވެގެންދާނެ ކަމަށް ބެލެވެއެވެ.
މީދޫ މުރަކަ ޑައިވިން ސެންޓަރާއެކު އައްޑޫގެ ކަނޑުއަޑީގެ ރީތިކަން ތަޖުރިބާކޮށްލުން
އައްޑޫ ސިޓީގެ ގުދުރަތީ ރީތިކަމާއި، ކަނޑުއަޑީގެ މުއްސަނދިކަން އެންމެ ފުރިހަމައަށް ތަޖުރިބާކޮށްލުމަށްޓަކައި "މީދޫ މުރަކަ ޑައިވިން ސެންޓަރ" އަކީ ފާހަގަކޮށްލެވޭ ފަދަ މުހިންމު މަރުކަޒެކެވެ. ތަޖުރިބާކާރު ޑައިވަރުންނާއެކު މި ސެންޓަރުން ފޯރުކޮށްދޭ ޚިދުމަތްތަކަކީ ކޮންމެ ފަތުރުވެރިއަކަށްވެސް އަދި ދިވެހިންނަށްވެސް އައު ތަޖުރިބާތަކެއް ކުރުވައިދޭނެ ކަންކަމެވެ.
ކަނޑުމަތީގެ ހިތްގައިމު ދަތުރުތައް
މީދޫ މުރަކަ ޑައިވިން ސެންޓަރާއެކު ކުރެވޭ ކަނޑުމަތީގެ ދަތުރުތަކަކީ ނުހަނު ހިތްގައިމު ދަތުރުތަކެކެވެ. މީގެ ތެރޭގައި އިރުއޮއްސޭ މަންޒަރު ބަލާލުމަށް ކުރެވޭ ދަތުރުތަކާއި، ކަނޑުގެ އޮމާންކަމުގެ ތެރެއިން ކޯމަސް ބަލާލުމަށް ކުރެވޭ ޚާއްޞަ ދަތުރުތައް ހިމެނެއެވެ. މީގެ އިތުރުން، އާދައިގެ މަސްދަތުރުތަކުގައި ބައިވެރިވެ، ރާއްޖޭގެ މަސްވެރިކަމުގެ އުފާވެސް ހޯދިދާނެއެވެ.
ކަނޑުއަޑީގެ އަޖައިބުތައް: ސްނޯކްލިންގ އަދި ސްކޫބާ ޑައިވިންގ
ކަނޑުއަޑީގެ ރީތިކަން ބަލާލުމަށް ލޯބިކުރާ ފަރާތްތަކަށް ސްނޯކްލިންގ އަދި ސްކޫބާ ޑައިވިންގގެ ޚިދުމަތް މި ސެންޓަރުން ފޯރުކޮށްދެއެވެ. އައްޑޫގެ ތަފާތު ޑައިވް ޕޮއިންޓްތަކަކީ ދުނިޔޭގެ ފެންވަރުގައިވެސް ފާހަގަކޮށްލެވޭ ތަންތަނެވެ. އޭގެ ތެރޭގައި:
މަންޓާ ޕޮއިންޓް: އެންމަޑި ބަލާލުމަށް އެންމެ މަޝްހޫރު ސަރަހައްދު.
ޝާކް ޕޮއިންޓް: މިޔަރުގެ ބާވަތްތައް ގިނައިން ފެންނަ ތަން.
ގޮނު ހޮހަޅަ، އަކިރި ހޮހަޅަ އަދި އުމަރުގެ ތަން: ކަނޑުއަޑީގެ ތަފާތު ހޮހަޅަތަކާއި ގަލުގެ އޮނިގަނޑުތައް ބަލާލުމަށް.
ބަޔާނާ ރީފް އަދި ފިހާޅަ ފަރު: ކުލަގަދަ މުރަކަތަކުން ފުރިގެންވާ ސަރަހައްދުތައް.
ރިއެކްޓް އަދި ކޮމެންޓް ކުރެއްވުމަށް
