ވެނެޒުއޭލާއަށް ބާރުގަދަ ދެ ބިންހެލުމެއް އައިސް ބޮޑެތި ގެއްލުންތަކެއް ލިބިއްޖެ

ވެނެޒުއޭލާއަށް ބާރުގަދަ ދެ ބިންހެލުމެއް އައިސް ބޮޑެތި ގެއްލުންތަކެއް ލިބިއްޖެއެވެ. މި ހާދިސާއާ ގުޅިގެން ކަރަކަސް އެއާޕޯޓް ބަންދުކޮށް، މެޓްރޯގެ ޚިދުމަތް މެދުކަނޑާލާފައިވާއިރު، ގައުމުގެ އެކި ސަރަހައްދުތަކުން ކަރަންޓުގެ ޚިދުމަތް ވެސް ވަނީ މެދުކެނޑިފައެވެ.

ކަމާބެހޭ އިދާރާތަކުން ހާމަކޮށްފައިވާ ގޮތުގައި، މި ނުރައްކާތެރި ބިންހެލުންތަކުގައި މިހާތަނަށް މަދުވެގެން 32 މީހުން މަރުވެ، 700 އަށްވުރެ ގިނަ މީހުން ވަނީ ޒަޚަމްވެފައެވެ. މި ބިންހެލުންތަކުގެ ސަބަބުން ގިނަ އަދަދެއްގެ އިމާރާތްތައް ބިމާހަމަވެފައިވާއިރު، ސަލާމަތްތެރިކަން ހޯދުމަށްޓަކައި ގިނަ ބަޔަކު ވަނީ މަގުތަކަށް ނުކުމެފައެވެ.

ވެނެޒުއޭލާގެ އެކްޓިންގް ޕްރެޒިޑެންޓް ޑެލްސީ ރޮޑްރިގޭޒް ވަނީ ބުދަ ދުވަހުގެ ރޭ ގައުމުގައި ކުއްލި ނުރައްކަލުގެ ހާލަތު އިޢުލާނު ކުރައްވާފައެވެ. ރެކްޓާ މިންގަނޑުން 7.2 އަދި 7.5 ގެ ބާރުމިނުގައި އައި މި ދެ ބިންހެލުން އައީ އެއް މިނެޓުގެ ތެރޭގައެވެ. މި ހާދިސާ ހިނގާފައިވަނީ ވެރިރަށް ކަރަކަސްއާ ގާތްގަނޑަކަށް 170 ކިލޯމީޓަރު ހުޅަނގުގައި އޮންނަ އައްސޭރިފަށުގެ ރަށެއް ކަމަށްވާ މޮރޯން ކައިރިއަށެވެ. ރޮޑްރިގޭޒް ވިދާޅުވި ގޮތުގައި، އިމާރާތްތަކުގެ ދަށުން މީހުން ހޯދުމުގެ މަސައްކަތް ކުރަމުންދާއިރު، މަރުވި މީހުންގެ އަދަދު އިތުރުވުމަކީ އެކަށީގެންވާ ކަމެކެވެ.

މިއީ ފާއިތުވި 100 އަހަރަށްވުރެ ގިނަ ދުވަހުގެ ތެރޭގައި ވެނެޒުއޭލާއަށް އައި އެންމެ ބާރުގަދަ ބިންހެލުންތަކެވެ. ލެޓިން އެމެރިކާގެ އެހެން ގައުމުތަކާ އަޅާބަލާއިރު، ވެނެޒުއޭލާއަކީ އާންމުކޮށް މިފަދަ ބޮޑެތި ބިންހެލުންތައް އަންނަ ގައުމެއް ނޫނެވެ.

ރިއެކްޓް އަދި ކޮމެންޓް ކުރެއްވުމަށް