އައްޑޫ މީދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއު.ޑީ.ސީ) އާއި މެރިން ޓައިމްސް ޓްރެއިނިންގ ސެންޓަރު ގުޅިގެން، ކަނޑުދަތުރުފަތުރުގެ ދާއިރާއިން މީހުން ބިނާކުރުމަށް ޚާއްޞަ ތަމްރީނު ޕްރޮގްރާމެއް ހިންގުމަށް ވަނީ ހަމަޖައްސަވައިފިއެވެ.
މިގޮތުން "ނިޔަމިކަމުގެ ސެޓްފިކެޓް 2" ގެ ކޯހެއް 5 ޖުލައި 2026 ގައި މީދޫގައި ބޭއްވުމަށް މިހާރު ވަނީ ތާވަލުކުރެވިފައެވެ.
ކޯހުގެ މަޤްޞަދުކީ ކަނޑު އުޅަނދުފަހަރު ދުއްވުމުގެ ހުނަރާއި އިލްމު އުނގަންނައިދީ، ކެޓަގަރީ ބީ، ސީ އަދި ޑީގެ އުޅަނދު ފަހަރުގެ ކެޕްޓަންކަމުގެ ލައިސަންސް ހޯދުމަށް ބޭނުންވާ ތަމްރީނު ފޯރުކޮށްދިނުމަށް ހިންގާ ކޯހެކެވެ. މީގެ ސަބަބުން ކަނޑުދަތުރުފަތުރުގެ ދާއިރާގައި މަސައްކަތްކުރާ ފަރާތްތަކަށް ރަސްމީ ސެޓްފިކެޓެއް ހޯދުމުގެ ފުރުޞަތު ފަހިވެގެންދާނެއެވެ.
ކޯހުގައި ބައިވެރިވުމުގެ ޝަރުޠުތައް: މި ކޯހުގައި ބައިވެރިވުމަށް ކަނޑައެޅިފައިވާ މައިގަނޑު ޝަރުޠުތަކުގެ ތެރޭގައި ހިމެނެނީ:
ކޯހުގައި ކިޔަވައިދޭ މާއްދާތައް ފަހުމުވާވަރުގެ ޤާބިލުކަން ހުރުން.
ދިވެހިބަހުން ނުވަތަ އިނގިރޭސިބަހުން މުޢާމަލާތްކުރަން އެނގުން.
އަސާސީ ހިސާބު (ބޭސިކް މެތަމެޓިކްސް) ހަދަން އެނގުން.
ކޯހުގައި ކިޔަވައިދޭނެ މައިގަނޑު ބައިތައް: މި ތަމްރީނު ޕްރޮގްރާމްގެ ތެރޭގައި އަމަލީ އަދި ނަޒަރީ ގޮތުން ގިނަ ކަންތައްތަކެއް އުނގަންނައިދެވޭނެއެވެ. އޭގެ ތެރޭގައި:
ކަނޑުމަތީގެ ގަވާއިދުތައް: ބައިނަލްއަޤްވާމީ އަދި ރާއްޖޭގެ ކަނޑުދަތުރުފަތުރުގެ ޤަވާޢިދުތައް.
މުވާސަލާތީ ވަސީލަތްތައް: ކަނޑުމަތީގައި ބޭނުންކުރާ މުވާސަލާތީ ސާމާނު ބޭނުންކުރާނެ ގޮތް.
ނެވިގޭޝަން: މިސްރާބު ބެލުމާއި ދަތުރުކުރާނެ މަގު ދެނެގަތުން.
ސޭފްޓީ: ކަނޑުމަތީގެ ސަލާމަތާއި ރައްކާތެރިކަމަށް އަޅަން ޖެހޭ ފިޔަވަޅުތައް.
އިތުރު މަޢުލޫމާތާއި ރަޖިސްޓްރީވުންމި ކޯހުގައި ބައިވެރިވުމަށް ޝައުޤުވެރިވާ ފަރާތްތަކުން ނަން ނޯޓުކުރުމަށާއި، ކޯހާ ގުޅޭ އިތުރު މަޢުލޫމާތު ސާފުކުރުމަށް 7782572 ނަމްބަރު ފޯނާ ގުޅުއްވުމަށް މީދޫ ޑަބްލިއު.ޑީ.ސީ އިން އިލްތިމާސްކުރެއެވެ.
މި ކޯހަކީ އައްޑޫ މީދޫ ޒުވާނުންނަށާއި ކަނޑުދަތުރުފަތުރުގެ ދާއިރާގައި މަސައްކަތްކުރާ ފަރާތްތަކަށް ހުޅުވިގެންދާ ވަރަށް ރަނގަޅު ފުރުޞަތެކެވެ.
ރިއެކްޓް އަދި ކޮމެންޓް ކުރެއްވުމަށް
