ދިވެހިރާއްޖޭގެ ކަނޑުދަތުރުފަތުރުގެ ތާރީޚުގައި ހިނގާދިޔަ އެންމެ ހިތާމަވެރި އަދި އެންމެ ބިރުވެރި އެއް ހާދިސާ ކަމަށްވާ "އެނަމާބޯޓު" ބަންޑުން ޖަހާލި ހާދިސާއަށް މިއަދު މިވަނީ 22 އަހަރު ފުރިފައެވެ. މިއީ މުޅި ގައުމު ރޮއްވާލި، އަދި މިއަދާ ހަމައަށްވެސް ގިނަ ބައެއްގެ ހިތްތަކުން ފިލައިގެން ނުދާ ފުން އަސަރުތަކެއް ކުރުވި ކަޅު ދުވަހެކެވެ.
މި ހިތާމަވެރި ހާދިސާ ހިނގާފައިވަނީ 17 މާރޗް 2004 ވީ ދުވަހުގެ ރޭގަނޑުގެ ވަގުތެއްގައެވެ. ގދ. ތިނަދޫއަށް ނިސްބަތްވާ މި ބޯޓަކީ އޭރު ދެކުނުގެ އަތޮޅުތަކުގައި ދަތުރުފަތުރު ކުރުމުގައި މަޝްހޫރު ބޯޓެކެވެ. ހާދިސާ ހިނގި ރޭ، ބޯޓު ދަތުރުކުރަމުން ދިޔައީ ގދ. ވިލިގިލީގައި އޮތް ފުޓްބޯޅަ މެޗެއް ބަލަން ދިޔަ ގިނަ އަދަދެއްގެ ސަޕޯޓަރުން ގޮވައިގެން އެނބުރި ތިނަދޫއަށް ދިއުމަށެވެ.
ބޯޓު ބަންޑުން ޖަހާލި ވަގުތު އޭގައި ޖުމްލަ 122 މީހުން ދަތުރުކުރަމުން ދިޔައެވެ. މި ހާދިސާގައި 24 މީހުންގެ ފުރާނަ ގެއްލިގެންދިޔައެވެ. އޭގެ ތެރެއިން 22 މީހަކު މަރުވެފައިވާކަން ކަށަވަރު ކުރެވުނުއިރު، 2 މީހަކު ވަނީ ވީނުވީއެއް ނޭނގި ކަނޑުގެ ތެރެއަށް ގެއްލިފައެވެ. މަރުވި މީހުންގެ ތެރޭގައި ކުޑަކުދިންނާއި އަންހެނުން ހިމެނޭކަމީ މި ހާދިސާގެ ހިތާމަ އިންތިހާއަށް އިތުރުވެގެންދިޔަ ސަބަބެކެވެ.
މި ހާދިސާގެ އެންމެ ހިތްދަތި އެއް ވާހަކައަކީ، ބޯޓު ބަންޑުން ޖަހާލި މަންޒަރު އެންމެ ގާތުން ފެނުނު ދާންދޫ "މިޔަރެން" ދޯނީގެ އަމަލުތަކެވެ. ކަނޑުވެފައި ތިބި މީހުން އެހީއަށް އެދި ކުރަމުންދިޔަ އާދޭހުގެ އަޑު އިވޭ ހިސާބުން ދިޔައިރުވެސް، އެ ދޯނިން ވަނީ އެ އާދޭސްތަކަށް ބީރުކަންފަތެއް ދީފައެވެ. މިޔަރެން ދޯނި އެ ސަރަޙައްދު ދޫކޮށް ދިޔައީ، އެ ދޯނިން ބޭނި 12 ޓަނުގެ މަސް ހަލާކުވެދާނެތީ އެ ކިރަން ދިއުމަށެވެ. މިއީ އިންސާނިއްޔަތުކަމުގެ ކަންފުޅެއްވެސް ނެތް އަމަލެއްގެ ގޮތުގައި މިއަދުވެސް ގިނަބަޔަކު ސިފަކުރެއެވެ.
ނަމަވެސް، ކަނޑުވެފައި ތިބި މީހުންނަށް އުންމީދުގެ ދޯއްޖެއް ދިއްކޮށްލީ ގއ. ދެއްވަދޫ "އަރުތަ" ދޯންޏެވެ. އެ ދޯނިން މީހުން ސަލާމަތްކުރުމަށް ފެށި މަސައްކަތުގައި އެތައް ބަޔަކު ސަލާމަތް ކުރެވުނެވެ.
މީހުން ސަލާމަތްކުރުމުގެ މަސައްކަތުގައި ރޭގަނޑުގެ އަނދިރިކަން ވެގެންދިޔައީ ބޮޑު ގޮންޖެހުމަކަށެވެ. އަދި އޭރުގެ ވަސީލަތްތައް ހުރި ގޮތުން އަވަސް އެހީތެރިކަން ފޯރުކޮށްދިނުމުގައި ލަސްތަކެއް ކުރިމަތިވިއެވެ. ސަރޗް އެންޑް ރެސްކިއުގެ ހަރުދަނާ މަސައްކަތްތަކެއް ފެށުނީ މާލެއިން އެކަމަށް ޚާއްޞަ ޓީމެއް އެ ސަރަޙައްދަށް ދިއުމުންނެވެ.
މިއަދު މި ހާދިސާއަށް 22 އަހަރު ފުރިގެންދާއިރު، މިއީ ރާއްޖޭގެ ކަނޑުދަތުރުފަތުރުގެ ސަލާމަތާއި ރައްކާތެރިކަމުގެ މުހިންމުކަން ހަނދާންކޮށްދޭ ބޮޑު ފިލާވަޅެކެވެ. އެ ހާދިސާގައި ވަކިވެދިޔަ އެންމެހައި އަޚުންނާއި އުޚުތުންގެ ފުރާނައަށް މާތްﷲ ރަޙުމަތް ލައްވައި، އެ އާއިލާތަކަށް ކެތްތެރިކަން މިންވަރު ކުރައްވާށިއެވެ. އާމީން.
ރިއެކްޓް އަދި ކޮމެންޓް ކުރެއްވުމަށް
