މިއަދުގެ ދުނިޔޭގައި މުސްލިމުންނާ ދެކޮޅަށް ހުޅަނގުގެ ބާރުގަދަ ޤައުމުތަކުން ހިންގަމުންދާ ލާއިންސާނީ ޢަމަލުތަކަކީ، ތާރީޚުގައި މީގެ ކުރިން ދުވަހަކުވެސް ނުދެކޭ ފަދަ ނުރައްކާތެރި މަރުޙަލާއަކަށް ވާސިލުވެފައިވާ ކަންކަމެވެ. މުސްލިމުންގެ ލޭ އޮހޮރުވައިލުމަށް ހުޅަނގުގެ ބާރުތަކުން ފަށާފައިވާ މި އައު ބާބަކީ ބައިނަލްއަޤުވާމީ މަޞްލަޙަތު ގަޑުބަޑުކޮށް، އިންސާނީ ޙައްޤުތަކުގެ ނިވާފަތްގަނޑުގައި މުސްލިމް އުންމަތް ނިކަމެތިކޮށްލުމަށް ހިންގާ ބޮޑު ޖަރީމާއެކެވެ. މި ނުބައި ރޭވުންތަކުގެ އެންމެ އިސް ސަފުގައި ތިބީ އެމެރިކާއާއި އިސްރާއީލުގެ އިތުރުން އެފަރާތްތަކަށް ވާގިވެރިވާ ހުޅަނގުގެ އެހެން ޤައުމުތަކެވެ.
މިހާރުގެ ޙާލަތަށް ބަލާއިރު، މި ނުބައި ރޭވުންތަކުގެ މައިގަނޑު އަމާޒަކަށް އީރާން ހަދާފައިވާކަން ފާހަގަކުރެވެއެވެ. ކުރިއަށް އޮތް ދުވަސްތަކަކީ މުޅި އިސްލާމީ އުންމަތަށް ނުހަނު ބިރުވެރި އަދި ނުރައްކާތެރި ދުވަސްތަކަކަށް ވެދާނެ ކަމުގެ ބިރު މިއަދު ވަނީ ބޮޑުވެފައެވެ. އެތައް ހާސް މައުޞޫމު ފިރިހެނުންނާއި، އަންހެނުންނާއި، ދޮށީ އުމުރުގެ މީހުންގެ އިތުރުން، ކުށެއްނެތް ތުއްތު ކުދިންގެ ލޭ އެ ބާރުތަކުން އެދަނީ އޮހޮރުވައިލަމުންނެވެ.
މި ބިރުވެރި މަންޒަރުތައް ފެންނަމުންދާއިރު، ދުނިޔޭގައި އޮތް ފަންސާހަކަށް އިސްލާމީ ޤައުމާއި 1.8 ބިލިއަނަށް ވުރެ ގިނަ މުސްލިމުންގެ އާބާދީގެ ފަރާތުން ފެންނަނީ ހިތާމަވެރި ހިމޭންކަމެކެވެ. އަމިއްލަ އަޚުންނާއި އުޚުތުން އަނިޔާވެރިކަމާއެކު ޤަތުލުކުރެވެމުންދާއިރު، އެކަމާ ދެކޮޅަށް ހަރުދަނާ ފިޔަވަޅެއް އެޅުމުގެ ބަދަލުގައި ގިނަ ބަޔަކު ތިބީ ނުކުޅެދުންތެރިކަމާއެކު ބަލާށެވެ. މިފަދަ ނުރައްކާތެރި ދަނޑިވަޅެއްގައި، ތިމާގެ ކިބައިގައި ހުރި ޤާބިލިއްޔަތަކުން މުސްލިމުންގެ ދިފާޢުގައި މަސައްކަތް ނުކޮށް، ޒިންމާއިން ރެކިގެން ތިބޭ ފަރާތްތަކަށް މާތްﷲގެ ޢަޛާބު ޙައްޤުވެގެންވެއެވެ.
އަޅުގަނޑުމެންގެ ދުޢާއަކީ، މި ބޮޑު މުޞީބާތުން އިސްލާމީ އުންމަތް ސަލާމަތްކުރައްވައި، މުސްލިމުންނަށް ނަޞްރާއި ނަޞީބު މިންވަރުކުރެއްވުމެވެ. އާމީން.
ރިއެކްޓް އަދި ކޮމެންޓް ކުރެއްވުމަށް
