މި ހިނގާ ރަމަޟާން މަހާ ދިމާކޮށް، ކީރިތި ރަސޫލާ ﷺ ގެ ސިޔަރަތުގެ މައްޗަށް ބިނާކޮށް ތައްޔާރުކޮށްފައިވާ ޚާއްޞަ ސީރީޒްއެއް "އެންމެންގެ ސާހިބާ" ގެ ނަމުގައި ދައްކަން ފަށައިފިއެވެ. މިއީ ވަންކްރީޑް ސްޓޫޑިއޯއާއި ރާއްޖޭގެ މަޝްހޫރު ދީނީ އިލްމުވެރިޔާ ފަޟީލަތުއްޝައިޚް ޑރ. އާދަމް ޝަމީމް ބިން އިބްރާހީމް ގުޅިގެން ގެނެސްދޭ ވަރަށް ފުރިހަމަ މަސައްކަތެކެވެ.
މި ސީރީޒްގެ އެޕިސޯޑުތައް މިހާރު ޔޫޓިއުބް މެދުވެރިކޮށް އާންމުންނަށް ބަލާލެވޭނެ އިންތިޒާމު ވަނީ ހަމަޖައްސާފައެވެ. "އެންމެންގެ ސާހިބާ" ސީރީޒްގެ އެންމެ ފާހަގަކޮށްލެވޭ އެއް ކަމަކީ، ކީރިތި ރަސޫލާ ﷺ ގެ ސިޔަރަތު ކިޔައިދިނުމުގައި ގެންގުޅެފައިވާ ތަފާތު އަދި ޝައުގުވެރި އުސޫލެވެ. ޒަމާނީ ވަސީލަތްތަކުގެ އެހީގައި، ފެންވަރު ރަނގަޅު އަޑާއި މަންޒަރުތައް ހިމަނައިގެން ތައްޔާރުކޮށްފައިވާ މި އެޕިސޯޑުތަކަކީ ހުރިހާ އުމުރުފުރައެއްގެ މީހުންނަށްވެސް ބަލާލަން ފަސޭހަ، ސާފު އިބާރާތުން ގެނެސްދީފައިވާ ސީރީޒްއެކެވެ.
ޚާއްޞަކޮށް، ކިޔަވާ ކުދިންނާއި ކުޑަކުދިންނަށް ސިޔަރަތުގެ މުހިންމު ހާދިސާތައް އޮޅުންފިލާނެހެން، އަދި ހަނދާން ބަހައްޓަން ފަސޭހަވާނެ ފަދަ ޚުލާސާ ގޮތަކަށް މި ސީރީޒް ބިނާކޮށްފައިވެއެވެ. މި ސީރީޒް އެކުލަވާލުމުގައި ބަލާފައިވަނީ ކީރިތި ގުރުއާނާއި ރަސޫލާ ﷺ ގެ ސުންނަތުގެ މައްޗަށެވެ. އަދި ސިޔަރަތު އިލްމުގެ މާހިރުންގެ މެދުގައި އެންމެ އިތުބާރު ހިފޭ، ޞައްޙަ އަދި މަޝްހޫރު ފޮތްތަކަށް ރިޢާޔަތްކޮށްފައިވާތީ، މިއީ މައުލޫމާތުގެ ގޮތުން ނުހަނު މުއްސަނދި މަސައްކަތެކެވެ.
މި ރަމަޟާން މަހު ގެނެސްދިނުމަށް ހަމަޖެހިފައިވަނީ މި ސީރީޒްގެ ފުރަތަމަ ބައެވެ. މި ބައިގައި ބިނާކޮށްފައިވަނީ މައްކާ އާބާދުވުމުގެ ތާރީޚުން ފެށިގެން، ކީރިތި ރަސޫލާ ﷺ އަށް ވަހީ ބާވަލައްވައި، ރަސޫލުކަމައިގެން ފޮނުއްވުމާ ހަމައަށް ހިނގާފައިވާ މުހިންމު ހާދިސާތަކުގެ މައްޗަށެވެ.
މިއީ ދިވެހި އާއިލާތަކަށް، ޚާއްޞަކޮށް މި ބަރަކާތްތެރި ރަމަޟާން މަހު، ކީރިތި ރަސޫލާ ﷺ ގެ ހަޔާތްޕުޅާ ބެހޭ ޞައްޙަ މައުލޫމާތު އުނގެނުމަށް ލިބިގެންދާ ރަން ފުރުސަތެކެވެ.
ރިއެކްޓް އަދި ކޮމެންޓް ކުރެއްވުމަށް
