މި ސީޒަނުގައި ޗެލްސީގެ އަޚުލާގީ މިންގަނޑު ހުރި ގޮތުން، ރަތް ކާޑު ދައްކައިގެން ދަނޑުން ފޮނުވާލި ކުޅުންތެރިންގެ މައްޗަށް އެކުލެވޭ ޓީމެއް ފުރިހަމަވުމަށް މިހާރު މަދުވަނީ އެންމެ މިޑްފީލްޑަރަކާއި ފޯވާޑެކެވެ. މި ޓީމަށް އިރުޝާދު ދޭނެ ހެޑް ކޯޗަކު ވެސް މިހާރު އެބަހުއްޓެވެ.
އާސެނަލް އަތުން 2-1 އިން ރޭ ޗެލްސީ ބަލިވި މެޗުގައި، ޕެޑްރޯ ނެޓޯއަށް ދެއްކި ރަތް ކާޑަކީ މި ސީޒަނުގެ ޕްރިމިއާ ލީގުގައި އެ ޓީމުގެ ކުޅުންތެރިއަކަށް ދެއްކި ހަތްވަނަ ރަތް ކާޑެވެ. މީގެ އިތުރުން، ކަޕް މުބާރާތްތަކުގައި ޔާއޯ ޕެޑްރޯ އާއި ލިއަމް ޑެލަޕް ވެސް ވަނީ ދަނޑުން ފޮނުވާލާފައެވެ. އަދި ކުރީގެ ހެޑް ކޯޗު އެންޒޯ މަރެސްކާއަށް ވެސް ލިވަޕޫލް އަތުން މޮޅުވި މެޗުގައި ދެ ރީނދޫ ކާޑާއެކު ރަތް ކާޑެއް ވަނީ ދައްކާފައެވެ.
މިއީ މިހާރުގެ ކޯޗު ލިއަމް ރޮސީނިއޯގެ ސަބަބުން ކުރިމަތިވި މައްސަލައަކަށް ނުވިޔަސް، މިއީ އޭނާއަށް ވާރުތަވެފައިވާ ބޮޑު ގޮންޖެހުމެކެވެ. ޖެހިޖެހިގެން ދެ މެޗުގައި ނެޓޯ އާއި ވެސްލީ ފޮފާނާއަށް ރަތް ކާޑު ދެއްކުމަކީ މިކަމަށް ވަރަށް ބޮޑަށް ސަމާލުކަން ދޭންޖެހޭ ކަމެއްކަން ހާމަވާ ކަމެކެވެ.
ޗެލްސީއަށް ޗެމްޕިއަންސް ލީގުގެ ޖާގައެއް ނުލިބިއްޖެ ނަމަ، އޭގެ އެންމެ ބޮޑު ސަބަބަކަށް ވާނީ ޓީމުގެ އަޚުލާގީ މައްސަލަތަކެވެ. ބްލޫކޯގެ ދަށުން ޗެލްސީ ހިންގަން ފެށި ފަހުން އަދި އާސެނަލް އަތުން މޮޅެއް ލިބިފައި ނުވާއިރު، މި ސީޒަނުގައި އެ ޓީމާ ދެކޮޅަށް ކުޅުނު ދެ މެޗު ވެސް ޗެލްސީން ނިންމާލީ 10 ކުޅުންތެރިންނާއެކުގައެވެ.
ކުރީގެ ކޯޗު މަރެސްކާ ކުޅުންތެރިން ޖޫރިމަނާކުރުމާ ދެކޮޅު ހަދައި، މިއީ މައްސަލައެއް ކަމަށް ގަބޫލުކުރަން ދެކޮޅު ހެދި ނަމަވެސް، ރޮސީނިއޯ ހުރީ ފިޔަވަޅު އަޅަން ތައްޔާރަށެވެ. ނަމަވެސް އޭނާ އިޝާރާތް ކުރީ އެއީ މާލީ އަދަބަކަށް ނުވެދާނެ ކަމަށެވެ.
"ކުޅުންތެރިން ޖޫރިމަނާ ކުރެވިދާނެ، އެކަމަކު މިއީ ހަމައެކަނި އަދަބު ދިނުމެއް ނޫން. މީގެ އަސްލު ސަބަބު ދެނެގަންނަން ޖެހޭ،" ރޮސީނިއޯ ބުންޏެވެ. "އަހަރެން ގަބޫލެއް ނުކުރަން މިއަދު ނެޓޯ ނުވަތަ މިދިޔަ ހަފްތާގައި ފޮފާނާ ރަތް ކާޑު ހޯދީ ޖޫރިމަނާ ވާނެތީ އެކަމާ ވިސްނައިގެން ތިބެފައޭ. މިއީ ސަމާލުކަން ދިނުމާއި ކަންކަމަށް ފޯކަސް ކުރުމުގެ މައްސަލައެއް."
މި ރަތް ކާޑުގެ ސަބަބުން، ބުދަ ދުވަހުގެ ރޭ އެސްޓަން ވިލާއާ ދެކޮޅަށް ކުޅޭ މުހިންމު މެޗުގައި ނެޓޯއަށް ނުކުޅެވޭނެއެވެ. ވިލާއަކީ ޗެމްޕިއަންސް ލީގުގެ ފަސްވަނަ ޖާގައަށް ޗެލްސީއާ އެންމެ ގާތުން ވާދަކުރާ ޓީމެވެ.
ރޮސީނިއޯ އިތުރަށް ބުނީ، މި މައްސަލައަށް ހައްލެއް ހޯދަން ޖެހޭ ކަމަށާއި، ކުޅުންތެރިންގެ ކިބައިގައި ފަންނީ ގޮތުންނާއި ހުނަރުގެ ގޮތުން ކިތަންމެ މޮޅު ސިފަތަކެއް ހުރި ނަމަވެސް، މިފަދަ ކަންކަން އިސްލާހު ނުކުރެވިއްޖެ ނަމަ އޭގެ ނޭދެވޭ އަސަރު ޓީމަށް ކުރާނެ ކަމަށެވެ.
ޕްރިމިއާ ލީގުގެ ތާރީޚުގައި އެންމެ ގިނަ ރަތް ކާޑު އެއް ސީޒަނެއްގައި ހޯދާފައިވަނީ ސަންޑަލޭންޑް އަދި ކިއުޕީއާރު އެވެ. އެއީ ނުވަ ރަތް ކާޑެވެ. ޗެލްސީ މިހާރު އޮތީ އެ ރެކޯޑާ އެންމެ ދެ ކާޑު ދުރުގައެވެ.
ކެޕްޓަން ރީީސް ޖޭމްސް ބުނި ގޮތުގައި، ދުނިޔޭގެ އެންމެ ވަރުގަދަ ލީގުގައި ކުޅޭއިރު 11 ކުޅުންތެރިންނާއެކު ކުޅުމަކީ ވެސް އުނދަގޫ ކަމެއް ކަމަށާއި، ކޮންމެ މެޗެއްގައި ކުޅުންތެރިއަކު މަދުވުމަކީ ބަލައިގަނެވޭނެ ކަމެއް ނޫން ކަމަށެވެ.
ގިނަ ބަޔަކު މިކަން ޗެލްސީގެ ކުޅުންތެރިންގެ ޒުވާންކަމާ ގުޅުވި ނަމަވެސް، ރަތް ކާޑު ހޯދި ނެޓޯ، ފޮފާނާ، ކުކުރެއްޔާ އަދި ސަންޗޭޒް އަކީ ޓީމުގެ ތަޖުރިބާކާރު ކުޅުންތެރިންނެވެ.
އާސެނަލް މެޗުގައި ނެޓޯއަށް ރަތް ކާޑު ދެއްކީ ވަރަށް އާދައިގެ ކުށެއްގައެވެ. ފުރަތަމަ ރީނދޫ ކާޑު އޭނާއަށް ދެއްކީ ރެފްރީގެ ނިންމުމާ މެދު ހިތްހަމަނުޖެހުން ފާޅުކުރުމުންނެވެ. އޭގެ ހަތަރު މިނެޓު ފަހުން މާޓިނެލީއަށް ކުރި ފައުލަކާ ގުޅިގެން ދެވަނަ ރީނދޫ ކާޑަކާއެކު އޭނާ ދަނޑުން ފޮނުވާލިއެވެ. ދަނޑުން ފޭބުމަށް އިންކާރުކޮށް އިތުރު ވަގުތު ނެގުމުގެ ސަބަބުން ނެޓޯއަށް އިތުރު އަދަބެއް ލިބުމުގެ ފުރުސަތު ވެސް އެބައޮތެވެ.
މީގެ އިތުރުން އެންޒޯ ފެނާންޑޭޒް ވެސް ވަނީ މި މެޗުގައި ހަތްވަނަ ރީނދޫ ކާޑު ހޯދާފައެވެ. ކުރިއަށް އޮތް ހަތަރު މެޗުގެ ތެރޭގައި އެންޒޯ ނުވަތަ ކައިސެޑޯ ދިހަ ރީނދޫ ކާޑު ހަމަކޮށްފި ނަމަ، ދެ މެޗުގެ ސަސްޕެންޝަނެއް އަންނާނެއެވެ.
ޗެލްސީގެ ކުޅުމުގައި ރަނގަޅު ކަންތައްތަކެއް ހުރި ނަމަވެސް، މި އަޚުލާގީ މައްސަލަތަކުގެ ސަބަބުން އެ ޓީމުގެ ކުރިއެރުމަށް ވަނީ ބޮޑެތި ހުރަސްތަކެއް ކުރިމަތިވެފައެވެ.
ރިއެކްޓް އަދި ކޮމެންޓް ކުރެއްވުމަށް
