ޗެލްސީއަށް މާރިޗު މަހުގެ ތާވަލު ބުރަކޮށް އޮތްއިރު، ލިއަމް ރޮސެނިއޯގެ ޓީމަށް އަނިޔާގެ ގިނަ މައްސަލަތަކަކާ ވަނީ ކުރިމަތިލާން ޖެހިފައެވެ.
މި ހަފްތާ ބަންދުގައި ޕްރިމިއާ ލީގުގައި އާސެނަލްއާ ދެކޮޅަށް ކުޅޭ މުހިންމު މެޗާ ކުރިމަތިލާއިރު، ޗެލްސީއަށް އަދިވެސް ވަނީ އަނިޔާގެ ގިނަ މައްސަލަތަކެއް ކުރިމަތިވެފައެވެ.
ކަރަބާއޯ ކަޕްގެ ސެމީ ފައިނަލުން ކެޓިތާ މަހެއްވެސް ނުވަނީސް، ޗެލްސީން އާދިއްތަ ދުވަހު އެމިރޭޓްސް ސްޓޭޑިއަމްގައި ލީގުގެ އެއްވަނައިގައި އޮތް އާސެނަލްއާ ދެކޮޅަށް ނުކުންނާނެއެވެ.
ފެބްރުއަރީ މަހުގެ ތެރޭގައި ޗެލްސީގެ ނަތީޖާތައް އެއްވަރެއްގައި ހިފެހެއްޓިފައި ނުވާއިރު، ވުލްވްސް އަދި ހަލް ސިޓީ އަތުން މޮޅުވި ނަމަވެސް، ލީގުގެ ފުލުގައި އޮތް ލީޑްސް އަދި ބާންލީއާ ދެކޮޅަށް ކުޅުނު މެޗުތައް އެއްވަރުވުމުން ވަނީ މާޔޫސްކަމެއް ކުރިމަތިވެފައެވެ.
ބާންލީއާ ދެކޮޅަށް ކުޅުނު މެޗުގައި އިތުރު ވަގުތުގެ ތެރޭގައި ލަނޑެއް ވަދެ އެއްވަރުވުމުން، ކޯޗު ރޮސެނިއޯ ވަނީ ވަރަށް ބޮޑަށް ހިތްހަމަނުޖެހުން ފާޅުކޮށްފައެވެ. މީގެ އިތުރުން، ޓީމުގެ ޑިސިޕްލިންގެ މައްސަލައަކީވެސް ޗެލްސީއަށް އޮތް ބޮޑު ގޮންޖެހުމެކެވެ. އެގޮތުން މިދިޔަ ހަފްތާގައި ވެސްލީ ފޮފާނާއަށް ރަތް ކާޑު ދެއްކުމުން، އާސެނަލް މެޗުގައި އޭނާއަށް ނުކުޅެވޭނެއެވެ.
ލީގުގެ ފަސްވަނައިގައި މިވަގުތު އޮތް ޗެލްސީއަށް ކުރިއަށް އޮތީ އުނދަގޫ ތާވަލެކެވެ. އާސެނަލް މެޗަށްފަހު އެސްޓަން ވިލާ، ނިއުކާސަލް، މެންޗެސްޓާ ސިޓީ އަދި މެންޗެސްޓާ ޔުނައިޓެޑާ ދެކޮޅަށް އެޓީމު ކުޅެން ޖެހޭނެއެވެ.
އަނިޔާގެ ތަފްސީލު:
އެސްޓެވާއޯ
ބްރެޒިލްގެ ޒުވާން ތަރި އެސްޓެވާއޯއަށް ބާންލީ މެޗުގައި ނުކުޅެވުނީ ފަރިތަކުރުންތަކުގެ ތެރޭގައި ހަމްސްޓްރިންގަށް ލިބުނު އަނިޔާއަކާ ގުޅިގެންނެވެ. އޭނާގެ އަނިޔާގެ ސީރިއަސްމިނެއް އެނގޭނީ ސްކޭންތަކަށް ފަހުގައެވެ.
ރީސް ޖޭމްސް
ކެޕްޓަން ރީސް ޖޭމްސް ބާންލީ މެޗުގެ ފަހުކޮޅު ބޭލީ ވަރުބަލިކަން ފާހަގަވުމުން ރައްކާތެރިކަމުގެ ފިޔަވަޅެއްގެ ގޮތުންނެވެ. އާސެނަލް މެޗަށް އޭނާ ފިޓްވާނެ ކަމަށް ބެލެވެއެވެ.
ރޯމިއޯ ލާވިއާލާވިއާ
މިހާރު އަންނަނީ 21 އަހަރުން ދަށުގެ ޓީމާއެކު ކުޅެ ފިޓްނަސް ވަރުގަދަ ކުރަމުންނެވެ. އާސެނަލް މެޗުގައި އޭނާ ބެންޗުން ފެނުމުގެ ފުރުސަތު ބޮޑެވެ.
މާކް ކުކުރެއްލާ
ހަމްސްޓްރިންގަށް ލިބުނު އަނިޔާއަކާ ގުޅިގެން ކުކުރެއްލާ ކުޅުމާ ދުރުގައި ހުންނަތާ ދުވަސްކޮޅެއް ވެއްޖެއެވެ. އޭނާ އެނބުރި އަންނާނެ ކަމަށް ބެލެވެނީ މާރިޗު މަހުގެ މެދުތެރޭގައެވެ.
ޖޭމީ ގިޓެންސް
ވެސްޓް ހޭމް މެޗުގައި ހަމްސްޓްރިންގަށް ލިބުނު އަނިޔާއަކާ ގުޅިގެން ގިޓެންސް ހުރީ ކުޅުމާ ދުރުގައެވެ. އޭނާ އެނބުރި އަންނާނެ ވަކި ތާރީޚެއް އަދި ކްލަބުން ހާމައެއް ނުކުރެއެވެ.
ޑާރިއޯ އެސޫގޯ
ގިނަ ދުވަސްތަކެއް ވަންދެން އަނިޔާގައި ހުރުމަށްފަހު، އެސޫގޯ މިހާރު ވަނީ ފަރިތަކުރުންތަކަށް އެނބުރި އައިސްފައެވެ. މި ހަފްތާގެ މެޗުގެ ސްކޮޑުގައި އޭނާ ހިމެނުމުގެ ފުރުސަތު އެބައޮތެވެ.
ފިލިޕް ޖޯގެންސަން
ޗެލްސީގެ ދެވަނަ ގޯލްކީޕަރު ޖޯގެންސަން ޖެނުއަރީ މަހުން ފެށިގެން ހުރީ އަނިޔާގައެވެ. އޭނާ މާރިޗު މަހުގެ ތެރޭގައި އެނބުރި އަންނާނެ ކަމަށް ބެލެވެއެވެ.
ލެވީ ކޮލްވިލް
ކަކުލަށް ލިބުނު ސީރިއަސް އަނިޔާއަކާ ގުޅިގެން ކޮލްވިލް މި ސީޒަނުގައި އަދި މެޗެއް ނުކުޅެއެވެ. އޭނާ އެނބުރި އަންނާނެ ވަކި ތާރީޚެއް ނޭނގުނު ނަމަވެސް، ސީޒަން ނިމުމުގެ ކުރިން އޭނާ ފެންނާނެ ކަމުގެ އުންމީދު ކޯޗު ރޮސެނިއޯ ކުރެއެވެ.
ރިއެކްޓް އަދި ކޮމެންޓް ކުރެއްވުމަށް
