މާލޭގެ ބޮޑުތަކުރުފާނު މަގު، ބްރިޖް ކައިރީގައި ހުންނަ ޓްރެފިކް ލައިޓް ކައިރިން ބާރު ސްޕީޑްގައި ދުއްވި ސައިކަލެއް ކޮންޓްރޯލުން ނެއްޓި ޕޭމެންޓް މައްޗަށް އަރައި ހިނގި ނުރައްކާތެރި އެކްސިޑެންޓެއްގައި 16 އަހަރުގެ ފިރިހެން ކުއްޖަކު ނިޔާވެއްޖެއެވެ.
ފުލުހުންގެ އިދާރާއިން މައުލޫމާތު ދެއްވި ގޮތުގައި މި ހާދިސާ ހިނގައިގެން ފުލުހުންނަށް ރިޕޯޓްކޮށްފައި ވަނީ ރޭ ދަންވަރު 1:39 އެހައިކަންހާއިރުއެވެ.
މި އެކްސިޑެންޓް ހިނގިއިރު ސައިކަލު ދުއްވަން އިނީ 19 އަހަރުގެ ދިވެހި ފިރިހެނެކެވެ. އަދި ސައިކަލުގެ ފަހަތުގައި އިނީ ނިޔާވި 16 އަހަރުގެ ދިވެހި ފިރިހެން ކުއްޖާއެވެ. މި ހާދިސާގައި ދެ މީހުންނަށްވެސް އެކިވަރުގެ އަނިޔާ ލިބިގެން ވަގުތުން ހޮސްޕިޓަލަށް ގެންގޮސް ފަރުވާ ދޭން ފަށާފައިވެއެވެ. ނަމަވެސް، ސައިކަލު ފަހަތުގައި އިން 16 އަހަރުގެ ކުއްޖާ ނިޔާވެފައިވަނީ ހޮސްޕިޓަލުގައި ފަރުވާ ދެމުން ދަނިކޮށް ކަމަށް ފުލުހުން ވިދާޅުވިއެވެ.
ފުލުހުން އިތުރަށް ހާމަކުރެއްވި ގޮތުގައި، އެކްސިޑެންޓުވި ސައިކަލު ދުއްވަން އިން 19 އަހަރުގެ މީހާއަކީ އެ އުޅަނދު ދުއްވުމުގެ ގާނޫނީ ލައިސެންސް އޮންނަ މީހެއް ނޫނެވެ.
މި ހިތާމަވެރި ހާދިސާއާ ގުޅިގެން ބަލަންޖެހޭ އިތުރު ކަންކަން ފުލުހުން ދަނީ ތަހުގީގު ކުރަމުންނެވެ. މަގުމަތީގެ ސަލާމަތާއި ރައްކާތެރިކަމަށް ސަމާލުކަން ދިނުމަކީ މިފަދަ ހާދިސާތައް މަދުކުރުމަށް އެންމެންގެ އެއްބާރުލުން ބޭނުންވާ ކަމެކެވެ.
ރިއެކްޓް އަދި ކޮމެންޓް ކުރެއްވުމަށް
