ރާއްޖޭގެ ކުޅިވަރުގެ ދާއިރާގައި ފާހަގަކޮށްލެވޭ އެންމެ މަތީ ޝަރަފު ކަމުގައިވާ "ލައިފްޓައިމް އެޗީވްމަންޓް އެވޯޑް" ދިވެހި ފުޓްބޯޅައިގެ ލެޖެންޑް މޫސާ މަނިކު (ކުޑަމޫސަ) އާއި އޭނާގެ ކޮއްކޮ، ކުޅިވަރުގެ ތަރި މުހައްމަދު ނަދީމަށް ރޭ އަރުވައިފިއެވެ.
ޒުވާނުންގެ މަރުކަޒުގައި ރޭ ބޭއްވި "މޯލްޑިވްސް ސްޕޯޓްސް އެވޯޑްސް" ގެ ކުލަގަދަ ހަފުލާގައި މި ދެބެއިންނަށް އެވޯޑް ހަވާލުކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއެވެ. މި އެވޯޑަކީ ދިގު މުއްދަތެއްގައި ދިވެހި ކުޅިވަރަށް މި ދެ ބޭފުޅުން ކޮށްދެއްވާފައިވާ އަގުހުރި ހިދުމަތްތަކުގެ އަގުވަޒަންކުރުމުގެ ގޮތުން އެރުވުނު އިނާމެކެވެ.
މޫސާ މަނިކު (ކުޑަމޫސަ) އަކީ ދިވެހި ފުޓްބޯޅައިގެ އިތުރުން ވޮލީބޯޅަ އާއި ބައިސިކަލް ރޭސް ފަދަ ގިނަ ކުޅިވަރުތަކެއްގައި ބައިވެރިވެ، ފާހަގަކޮށްލެވޭ ކާމިޔާބީތަކެއް ހޯއްދަވާފައިވާ ބޭފުޅެކެވެ. ކުޑަމޫސަގެ ފުޓްބޯޅަ ކެރިއަރު ނިއު ރޭޑިއަންޓުން ފެށި ނަމަވެސް، 1992 ވަނަ އަހަރު އޭނާ ވަނީ ކްލަބް ވެލެންސިއާއަށް ބަދަލުވެފައެވެ. ފާހަގަކޮށްލެވޭ ގޮތުގައި ކުޑަމޫސަ އަކީ ރާއްޖޭގައި މުސާރައެއް ލިބޭގޮތަށް ޕްރޮފެޝަނަލް އުސޫލުން ކުޅުނު ފުރަތަމަ ކުޅުންތެރިޔާއެވެ. އޭނާ ވަނީ ހުއްރިއްޔާ ސްޕޯޓްސް ކްލަބަށް ކުޅުމުގެ އިތުރުން އެ ޓީމަށް ކޯޗުކަން ވެސް ކޮށްދެއްވާފައެވެ. އަދި 1991 ވަނަ އަހަރުގެ ސާފް ގޭމްސްއިން ރާއްޖެއަށް ފުރަތަމަ ފަހަރަށް ފުޓްބޯޅައިން ރިހި މެޑަލް ލިބުނުއިރު، އޭނާއަކީ ގައުމީ ޓީމުގެ އެންމެ މުހިއްމު އެއް ތަނބެވެ.
މޫސަގެ ކޮއްކޮ މުހައްމަދު ނަދީމަކީ ވެސް ކުޅިވަރުގެ ތަފާތު ރޮނގުތަކުން ފާހަގަކޮށްލެވޭ ޝަހުސިއްޔަތެކެވެ. ފުޓްބޯޅައިގެ އިތުރުން ވޮލީބޯޅަ އާއި އެތުލެޓިކްސްގައި ވެސް ނަދީމް ވަނީ އޭނާގެ ހުނަރު ދައްކާލާފައެވެ. ފުޓްބޯޅައިގައި ވެލެންސިއާ، ނިއު ރޭޑިއަންޓް، އޯކިޑް، އަދި ހުއްރިއްޔާގެ މެދުތެރޭގައި އޭނާ ވަނީ މޮޅު ކުޅުމެއް ދައްކާފައެވެ. މީގެ އިތުރުން، އެތުލެޓިކްސްގެ ފީލްޑް އިވެންޓްތަކުގައި ގިނަ ދުވަސްތަކެއް ވަންދެން ރެކޯޑްތައް ދެމެހެއްޓި އެތުލީޓެއްގެ ގޮތުގައި ވެސް ނަދީމް ފާހަގަކުރެވެއެވެ.
ދިވެހި ކުޅިވަރުގެ އުދަރެހުގައި މި ދެބެއިންނަކީ އެތައް ޖީލަކަށް ނަމޫނާ ދައްކަމުންދާ، ކުޅިވަރުގެ ރޫހު ދިރުވައި އާލާކުރުމުގައި އިސްދައުރެއް އަދާކުރައްވާފައިވާ ދެ ބޭފުޅުންނެވެ. މި އެވޯޑާއެކު، އެ ބޭފުޅުންގެ ހިދުމަތްތަކަށް ގައުމީ ފެންވަރުގައި ހައްގު މިންވަރުގެ އިހުތިރާމާއި ގަދަރު ލިބިގެން ގޮސްފައިވެއެވެ.
ރިއެކްޓް އަދި ކޮމެންޓް ކުރެއްވުމަށް
