މިއަހަރުގެ ހޫނު މޫސުމާ ދިމާކޮށް، ސްރީލަންކަން އެއަރލައިންސްއިން ކޮލަމްބޯ އާއި އައްޑޫ ސިޓީ ގަމާ ދެމެދު ކުރަމުންދާ ދަތުރުތައް އިތުރުކުރުމަށް ނިންމައިފިއެވެ. ރާއްޖެއަށް ފަތުރުވެރިން ގެންނަ މަޝްހޫރު ޓުއާ އޮޕަރޭޓަރު، އިނަ މޯލްޑިވްސްއިން ހާމަކޮށްފައިވާ ގޮތުގައި، މި އިތުރު ފްލައިޓްތައް ފެށުމަށް ހަމަޖެހިފައިވަނީ އަންނަ އޭޕްރީލް މަހުގެ 2 ވަނަ ދުވަހުން ފެށިގެންނެވެ.
އިނަ މޯލްޑިވްސްގެ މެނޭޖިން ޑިރެކްޓަރު މުހައްމަދު ފިރާގު އޭނާގެ ފޭސްބުކް ޕޭޖްގައި ޝާއިއުކުރެއްވި ލިއުއްވުމެއްގައި ވިދާޅުވީ، މި ބަދަލާއެކު ކޮލަމްބޯ މެދުވެރިކޮށް އައްޑޫ ގަމާއި ދުނިޔޭގެ އެކި މަންޒިލްތަކާ ދެމެދު އޮންނަ ވައިގެ ދަތުރުފަތުރުގެ ގުޅުން މިހާރަށްވުރެ ބޮޑަށް ހަރުދަނާވެގެންދާނެ ކަމަށެވެ. މީގެ ސަބަބުން ދެކުނުގެ އަތޮޅުތަކަށް ދަތުރުކުރާ ފަރާތްތަކަށް ބޮޑެތި ލުއިފަސޭހަތަކެއް ލިބިގެންދާނެއެވެ.
އޭޕްރީލް 2 އިން ފެށިގެން ސްރީލަންކަންގެ ދަތުރުތައް ކޮންމެ ހަފުތާއެއްގެ އަންގާރަ، ބުރާސްފަތި އަދި ހޮނިހިރު ދުވަހު ބޭއްވުމަށް ވަނީ ތާވަލުކުރެވިފައެވެ. ފިރާގު އިތުރަށް ފާހަގަކުރެއްވި ގޮތުގައި، މި އާ ފްލައިޓްތަކާ ގުޅުވައިގެން ހާއްސަ ޑިސްކައުންޓް އަގުތަކެއްގައި ޓިކެޓް ލިބޭނެ އިންތިޒާމުވެސް ވަނީ ހަމަޖައްސާފައެވެ. އަދި މި ދަތުރުތަކަކީ ހުވަދު އަތޮޅާއި ފުވައްމުލައް ހިމެނޭހެން ރާއްޖޭގެ ދެކުނުގެ އެތެރޭގެ އުދުހުންތަކާ ފަސޭހަކަމާއެކު ގުޅުވައިދޭނެ ދަތުރުތަކެއްކަންވެސް އޭނާ ފާހަގަކުރެއްވިއެވެ.
މިކަމާ ގުޅޭގޮތުން ފިރާގު ވިދާޅުވީ، "ސްރީލަންކަން އެއަރލައިންސްގެ ޖީ.އެސް.އޭ (GSA) އަދި ސްރީލަންކަން ހޮލިޑޭސްގެ ރާއްޖޭގެ ޕާޓްނަރުގެ ހައިސިއްޔަތުން، މި މަސައްކަތުގައި އެހީތެރިވެދެއްވާ ހުރިހާ ފަރާތްތަކުން ދެއްވާ މެދުނުކެނޑޭ އެއްބާރުލުމަށް އަޅުގަނޑުމެން އިހުލާސްތެރިކަމާއެކު ޝުކުރު ދަންނަވަން. އެ ފަރާތްތަކުގެ ބައިވެރިވުމަކީ ދެކުނުގެ ސަރަހައްދުތަކުގެ ގުޅުން ވަރުގަދަކުރުމަށާއި، އެ ސަރަހައްދުގެ ފަތުރުވެރިކަން ކުރިއެރުވުމުގައި ވަރަށް މުހިންމު ދައުރެއް އަދާކުރާ ކަމެއް،" ކަމަށެވެ.
މި ނިންމުމަކީ ރާއްޖޭގެ ދެކުނުގެ އަތޮޅުތަކަށް ބައިނަލްއަގުވާމީ ދަތުރުފަތުރުގެ ފުރުސަތުތައް ފުޅާކޮށް، އެ ސަރަހައްދުގެ އިގްތިސާދާއި ފަތުރުވެރިކަން ކުރިއެރުވުމަށް އެޅިގެންދިޔަ ވަރަށް މުހިންމު ފިޔަވަޅެކެވެ. މީގެ ސަބަބުން ދެކުނުގެ ރައްޔިތުންނަށް ރާއްޖޭގެ ބޭރަށް ދަތުރުފަތުރު ކުރުމުގައި އިތުރު ދޮރުތަކެއް ހުޅުވިގެންދާނެއެވެ.
ރިއެކްޓް އަދި ކޮމެންޓް ކުރެއްވުމަށް
