ޚަބަރު ފަތުރާ ތިން އިދާރާއަކުން ވައިޓް ހައުސްއަށް ވަނުން ރައީސް ޑޮނަލްޑް ޓްރަމްޕް މަނާކުރެއްވި މައްސަލަ، އެއީ ޤާނޫނުއަސާސީއާ ޚިލާފު ކަމެއް ކަމަށް ބަލައި، ފަނޑިޔާރަކު ވަގުތީ ގޮތުން އެ ނިންމުން ހުއްޓުވައި އެ ފަރާތްތަކަށް އަލުން ހުއްދަ ދިނުމަށް އަމުރުކޮށްފިއެވެ.
ސެޕްޓެމްބަރު 18 ވަނަ ދުވަހު ޓްރަމްޕް މި މަނާކުރުން އިޢުލާން ކުރެއްވީ، އެ އިދާރާތަކުން އޭނާގެ ސަރުކާރާ ބެހޭގޮތުން "އަބަދުވެސް ހަދައިގެން ވާހަކަދައްކާ ނުވަތަ ދޮގު ޚަބަރު ފަތުރާ" ކަމަށް ވިދާޅުވަމުންނެވެ. މީގެ ރައްދުގައި، އެ ތިން އިދާރާއިން ހޯމަ ދުވަހު ވަނީ ފެޑެރަލް ކޯޓަށް މައްސަލަ ހުށަހަޅާފައެވެ. އެ ފަރާތްތަކުން ބުނަނީ މިއީ ޚިޔާލުފާޅުކުރުމުގެ މިނިވަންކަމަށް އޮތް ހުރަހެއް ކަމަށާއި، ވަގުތުން ވަގުތަށް އެ ހުއްދަ އަލުން ދޭންޖެހޭނެ ކަމަށެވެ.
ދަޢުވާގައި ބުނެފައިވާ ގޮތުގައި، ޓްރަމްޕާއި ވައިޓް ހައުސްއިން މި ފިޔަވަޅު އެޅީ އެ ފަރާތްތަކުން ގެނެސްދޭ ޚަބަރުތައް ކަމުނުގޮސްގެން ބަދަލުހިފުމުގެ ގޮތުންނެވެ. ނަމަވެސް ޖަސްޓިސް ޑިޕާޓްމަންޓުން ބުނަނީ ވައިޓް ހައުސްއަށް ވަނުމަކީ ލިބިދޭ ޙައްޤެއް ނޫން ކަމަށާއި، އެއީ ދެވޭ އިމްތިޔާޒެއް ކަމަށެވެ. އަދި ޤައުމީ ސަލާމަތާއި ނޫސްވެރިކަމުގެ މިންގަނޑުތައް ހިފެހެއްޓުމަކީ ރައީސްގެ މަސްލަޙަތު އޮތް ކަމެއް ކަމަށްވެސް ބުނެފައިވެއެވެ.
އެހެންނަމަވެސް، ޔޫ.އެސް ޑިސްޓްރިކްޓް ފަނޑިޔާރު ޓިމޮތީ ކެލީ ވަނީ މި މަނާކުރުން 14 ދުވަހަށް ހުއްޓުވާފައެވެ. އޭނާ ވިދާޅުވީ މިއީ ޤާނޫނުއަސާސީއާ ޚިލާފު ކަމެއް ކަމަށް ފެންނަ ކަމަށާއި، ޤައުމީ ސަލާމަތުގެ ނަމުގައި ދެއްކި އުޒުރުތައް ބަލައިނުގަނެވޭ ކަމަށެވެ. ޓްރަމްޕް ވަނީ މި ނިންމުން އިސްތިއުނާފު ކުރައްވާނެ ކަމުގެ އިޝާރާތެއް ދެއްވާފައެވެ.
މި މަނާކުރުމާ ގުޅިގެން، އެމެރިކާގެ ބޮޑެތި ޓީވީ ނެޓްވޯކްތަކުން (އޭ.ބީ.ސީ، ސީ.ބީ.އެސް، އެން.ބީ.ސީ އަދި ފޮކްސް ނިއުސް) ވަނީ ވައިޓް ހައުސްގެ ޕޫލް ރިޕޯޓިންގގައި ބައިވެރިވުމަށް އިންކާރުކޮށްފައެވެ. މީގެ ނަތީޖާއެއްގެ ގޮތުން، ހޯމަ ދުވަހު ބޭއްވި ހަރަކާތެއްގައި ޓްރަމްޕް ދެއްކެވި ވާހަކަފުޅުތައް މީޑިއާތަކަށް ރަނގަޅަށް ސާފުވާ ގޮތެއް ނުވިއެވެ.
ހުކުރު ދުވަހު ޓްރަމްޕް މި މަނާކުރުން އިޢުލާން ކުރެއްވީ "ފޭކް ނިއުސް" ފަތުރާ ކަމަށް ވިދާޅުވަމުންނެވެ. އޭނާ ވިދާޅުވީ ގަސްތުގައި ނެގަޓިވް ޚަބަރު ލިޔާ މީހުން ވައިޓް ހައުސްއަށް ވައްދަން ބޭނުންފުޅު ނުވާ ކަމަށެވެ. ހޮނިހިރު ދުވަހު، މި ތިން އިދާރާގެ ނޫސްވެރިން ވައިޓް ހައުސްއަށް ވަނުން ސީކްރެޓް ސާވިސްއިން ވަނީ ހުއްޓުވާފައެވެ.
މި ފިޔަވަޅު ވައިޓް ހައުސް ކޮރެސްޕޮންޑެންޓްސް އެސޯސިއޭޝަނުން ކުށްވެރިކޮށްފައިވާއިރު، އެހެނިހެން ބޮޑެތި މީޑިއާތަކުންވެސް ވަނީ މި ނޫސްވެރިންނަށް ތާއީދުކޮށް، ޓްރަމްޕްގެ ހަރަކާތްތައް ކަވަރުކުރުމަށް އިންކާރުކޮށްފައެވެ.
މީގެ ކުރިންވެސް ޓްރަމްޕް ވަނީ މިފަދަ ފިޔަވަޅުތައް އަޅުއްވާފައެވެ. 2018 ވަނަ އަހަރު ސީ.އެން.އެންގެ ޖިމް އެކޯސްޓާގެ ހުއްދަ ބާތިލުކުރުމުންވެސް ކޯޓުން ވަނީ އެކަން ހުއްޓުވާފައެވެ. އަދި މިދިޔަ އަހަރު އެސޯސިއޭޓެޑް ޕްރެސް (އޭ.ޕީ) އާ ދެކޮޅަށްވެސް މިފަދަ ފިޔަވަޅެއް އަޅުއްވާފައިވެއެވެ. އަދި ޕެންޓަގަންއިން ނޫސްވެރިންނަށް ކުރި ބައެއް މަޖުބޫރުކުރުންތައްވެސް ދާދި ފަހުން ކޯޓުން ވަނީ ބާތިލުކޮށްފައެވެ.
ރިއެކްޓް އަދި ކޮމެންޓް ކުރެއްވުމަށް
