ކޮންމެ މީހަކީވެސް އެމީހެއްގެ އަމިއްލަ ޒާތީ ކަންކަމާއި، އާއިލީ ކަންކަން ސިއްރެއްގެ ގޮތުގައި ބޭއްވުމުގެ އިޚްތިޔާރު ލިބިގެންވާ މީހެކެވެ. ނަމަވެސް، މިޒަމާނުގެ ޓެކްނޮލޮޖީއާއި މީސްމީޑިއާގެ ސަބަބުން، އަނެކާގެ ދިރިއުޅުމުގެ ތެރެއަށް ވަދެގަނެ، އެހެން މީހުންގެ އަމިއްލަ ކަންކަމާ ބެހުމަކީ މިއަދު އަޅުގަނޑުމެންގެ މުޖުތަމަޢުގައި އާންމުވަމުންދާ ވަރަށް ނުރައްކާތެރި އާދައެކެވެ.
މިއަދު ފެންނަމުންދާ އެންމެ ހިތާމަވެރި މަންޒަރަކީ، ކަމެއްގެ ދެކޮޅު ނުބަލައި، ނުވަތަ އެކަމެއްގެ ފުރިހަމަ ޙަޤީޤަތް ނޭނގޭ ހާލުގައި، މީހުންގެ އަމިއްލަ ދިރިއުޅުމުގެ ވާހަކަތައް މީސްމީޑިއާގައި ތިލަކުރުމެވެ. މިފަދަ ކަންކަން ކުރަނީ ގިނަ ފަހަރަށް އަނެކާގެ އަބުރު ކަތިލުމަށާ އާންމުންގެ މެދުގައި އެމީހަކާ މެދު ނުރަނގަޅު ތަޞައްވުރެއް އުފެއްދުމަށެވެ.
މީހުން ލައްވައި އެއްޗެހި ކިއުއްވުމަށްޓަކައި ކުރެވޭ މިފަދަ މަސައްކަތްތަކަކީ އަޚްލާޤީ ގޮތުންނާއި ދީނީ ގޮތުން ބެލިޔަސް ވަރަށް ދަށު ދަރަޖައިގެ، ދެރަ ކަންކަމެވެ. އިސްލާމްދީނުގައިވެސް މީހުންގެ އައިބު ހޯދައި ބަލައި، ދޭތެރެ ޖެއްސުމާއި ބެހޭގޮތުން ވަނީ ހަރުކަށިކޮށް ނަހީކުރައްވާފައެވެ.
އަޅުގަނޑުމެން ހަނދާން ބަހައްޓަންޖެހޭ މުހިންމު ކަމަކީ، އެހެން މީހުންގެ ދިރިއުޅުމުގައި ހުންނަ އުނިކަންކަމާއި ކުށްތައް ހޯދައި، އެކަންކަމާ ބެހުމަކުން އަޅުގަނޑުމެންގެ އަމިއްލަ ދިރިއުޅުމުގައި ހުރި ލައްތަކެއް ނުވަތަ އުނިކަންކަމެއް ސާފެއް ނުވާނެ ކަމެވެ.
ކޮންމެ އިންސާނަކީވެސް ކުށް ކުރެވޭނެ، އުނި ސިފަތަކެއް ހުންނާނެ މީހެކެވެ. އެހެން މީހުންގެ ކަންކަމާ ބެހުމަށް ހޭދަކުރާ ވަގުތު، އަމިއްލަ ނަފްސު އިޞްލާޙުކުރުމަށް ހޭދަކޮށްފިނަމަ، މުޖުތަމަޢަށް މާ ބޮޑު ފައިދާއެއް ކުރާނެއެވެ. އަނެކާގެ ދިރިއުޅުމަށް ފާޑުކިޔުމަކީ ތިމާގެ ދަރަޖަ މަތިވާ ކަމެއް ނޫނެވެ.
ސުލްހަވެރި އަދި އުފާވެރި މުޖުތަމަޢެއް ބިނާކުރެވޭނީ އެކަކު އަނެކަކަށް އިޙްތިރާމްކޮށްގެންނެވެ. މީހުންގެ އަމިއްލަ ދިރިއުޅުމަކީ އެމީހުންގެ އަމާނާތެކެވެ. އެހެން މީހުންގެ ކަންކަމާ ނުބެހި، ތިމާގެ އަމިއްލަ ކަންކަން ރަނގަޅުކުރުމަށް މަސައްކަތް ކުރުމަކީ ތަހުޒީބީ މުޖުތަމަޢެއްގެ ސިފައެކެވެ.
ވީމާ، މީސްމީޑިއާގެ ވަސީލަތްތައް ހެޔޮގޮތުގައި ބޭނުންކޮށް، އެހެން މީހުންގެ ދިރިއުޅުމާ ނުބެހި، އަބުރަށް އަރައިނުގަނެ ތިބުމަށް އެންމެން ޢަޒުމް ކަނޑައަޅަންޖެހެއެވެ.
ރިއެކްޓް އަދި ކޮމެންޓް ކުރެއްވުމަށް
