ފެނަކައިގެ ނަމުގައި ބިލުތަކުން ފައިސާ ދޭނެކަމަށް ބުނެ ޕޭޖެއް ހިންގާތީ އެކަމަށް ރައްޔިތުން ސަމާލުވުމަށް ފެނަކައިން އިލްތިމާސްކޮށްފިއެވެ.
ފެނަކައިން ރޭ ނެރުނު ބަޔާނުގައި ބުނީ ފެނަކައިގެ ނަމުގައި ބިލުތަކުން ފައިސާ ދޭނެކަމަށް ބުނެ ޕޭޖެއް ހިންގަމުންދާކަމަށާއި މިއީ ފެނަކައިގެ އެއްވެސް ބައިވެރިވުމެއް އޮވެގެން ހިންގާ ޕޭޖެއް ނޫންކަމަށެވެ.
ކުންފުނީގެ ނަމުގައި އޮޅުވާލައިގެން ހިންގާ މި މުއާމަލާތަށް ރައްޔިތުން ސަމާލުވުމަށް ފެނަކައިން ވަނީ އިލްތިމާސްކޮށްފައެވެ.
ފެނަކައިން މި ޚިދުމަތްތައް ދޭނީ ކުންފުނީގެ ރަސްމީ އެކައުންޓްތަކުން އެކަނި ކަމަށާއި މި ލިންކް ނުވަތަ ކޯލެއް ފޮނުވައިގެންވެސް ކުންފުނީގެ ފައިސާ ހޯދުމަށް އޮޅުވާލައިގެން އައިސްފިނަމަ، މިފަދަ ކަންތައްތަކަށް ސަމާލުވެ އެފަދަ ފަރާތްތަކަށް ފައިސާ ނުދިނުމަށާއި، ކަމާބެހޭ ފަރާތްތަކަށް ވީހާވެސް އަވަހަކަށް ރިޕޯޓުކުރުމަށް އެންމެހައި ރައްޔިތުންނަށް އެ ކުންފުނިންވަނީ އިލްތިމާސްކޮށްފައެވެ.
ސްކޭމްގެ މައްސަލަތަކުން ރައްކާތެރިވެ ތިބުމުގެ ގޮތުން އިތުބާރުކޮށް ފައިސާ ދިނުމުގެ ކުރިން އެ ފަރާތެއްގެ ސައްހަކަން އަބަދުވެސް ކަށަވަރުކުރުމަށާއި، ޒާތީ މައުލޫމާތު އެއްވެސް ގޮތަކަށް ހިއްސާނުކުރުމަށާއި އެޕްލިކޭޝަންތަކުގެ ޓޫ ފެކްޓަރ އޮތެންޓިކޭޝަން ހެދުމަކީ މިފަދަ މައްސަލަތަކުން ރައްކާތެރިވެ ތިބުމަށް އެޅިދާނެ މުހިންމު ފިޔަވަޅެކެވެ.
އަދި ސްކޭމަރުން ކާމިޔާބުވަނީ މިފަދަ މައްސަލަތަކުގައި ހަނުހުރުމުން ކަމަށްވާއިރު، މިފަދަ މައްސަލަތައް އަވަހަށް ފުލުހުންނަށް ރިޕޯޓްކުރުމަކީ ފައިސާ އަނބުރާ ހޯދުމަށް ފަސޭހަވެގެންދާނެ ކަމެކެވެ.
ރިއެކްޓް އަދި ކޮމެންޓް ކުރެއްވުމަށް
