ޤަޠަރުގެ ދޯހާގައި ކުރިއަށްދާ 2026 ވަނަ އަހަރުގެ އެފް.އައި.ވީ.ބީ ވޮލީބޯލް ބޯއީސް އަންޑަރ 17 ވޯލްޑް ޗެމްޕިއަންޝިޕްގެ ދެވަނަ ދުވަހު، ބްރެޒިލުން މެކްސިކޯގެ މައްޗަށް ކުރިހޯދިއިރު، ފްރާންސް، އިންޑިއާ، ޕާކިސްތާން އަދި ބަލްގޭރިއާ އިން ވެސް ވަނީ ސީދާ ތިން ސެޓުން އެޓީމްތައް ކުޅުނު މެޗުތައް ކާމިޔާބުކޮށްފައެވެ.
ގްރޫޕް 'ސީ' ގައި ހިމެނޭ ބްރެޒިލުން މެކްސިކޯ ބަލިކުރީ 3-0 (25-16، 25-16، 25-19) އިންނެވެ. މި މެޗުގައި ބްރެޒިލްގެ ލޫކަސް ޕެރޭރާ ޑި އަބްރޫ ވަނީ 17 ޕޮއިންޓް ހޯދައިދީ ފާހަގަކޮށްލެވޭ ކުޅުމެއް ދައްކާފައެވެ. މީގެ އިތުރުން ލޮރެންޒޯ ޖޯސޭ ޓްރެންޓިން އަދި ލޫކާ ޕެރާޒޯ އަމަރަލް ފެރޭރާ، މިއިން ކޮންމެ ކުޅުންތެރިއަކު 12 ޕޮއިންޓް ހޯދައިދިނެވެ. މެކްސިކޯގެ ފަރާތުން އެންމެ ރަނގަޅު ކުޅުމެއް ފެނުނީ 7 ޕޮއިންޓް ހޯދައިދިން ފްރެންސިސްކޯ ސެބަސްޓިއަން މެރީނޯ ރޮމޭރޯގެ ފަރާތުންނެވެ.
ގްރޫޕް 'އޭ' ގައި ފްރާންސުން ވަނީ ޓިއުނީޝިއާގެ މައްޗަށް 3-0 (25-17، 25-13، 25-19) އިން ކުރިހޯދާފައެވެ. ފްރާންސްގެ ޖޭޑަން އެބޭގްން ޔޮން 19 ޕޮއިންޓް ހޯދައިދިންއިރު، ނޯއޭ ސޮގްނަން ވަނީ 12 ޕޮއިންޓް ހޯދައިދީފައެވެ. ޓިއުނީޝިއާގެ ޔޫސުފް މާލެކް ވަނީ އެ ޓީމަށް 10 ޕޮއިންޓް ހޯދައިދީފައެވެ.
ގްރޫޕް 'ބީ' ގައި އިންޑިއާއިން ވަނީ ކިއުބާއާ ދެކޮޅަށް ކުޅެ 3-0 (25-18، 26-24، 25-22) އިން މެޗު ކާމިޔާބުކޮށްފައެވެ. އިންޑިއާގެ ދައްތާ އަންކިތު 14 ޕޮއިންޓް ހޯދައިދިންއިރު، އަޕްރާތިމް ބަދޯރިއާ 12 ޕޮއިންޓް ހޯދައިދިނެވެ. ކިއުބާގެ ކެޕްޓަން ރެއިނާލްޑޯ މާކޭޒް ވަނީ މުޅި މެޗުގައި އެންމެ ގިނަ ޕޮއިންޓް (16 ޕޮއިންޓް) ހޯދައިދީފައެވެ.
ގްރޫޕް 'ޑީ' ގައި ބަލްގޭރިއާ އިން މިޞްރުގެ މައްޗަށް ކުރިހޯދީ 3-0 (25-22، 25-23، 25-18) އިންނެވެ. ބަލްގޭރިއާގެ ކެޕްޓަން މިލްކޯ ބަގްދަސަރޯވް 16 ޕޮއިންޓް ހޯދައިދިންއިރު، މިޞްރުގެ މުޙައްމަދު އާމިރު ވަނީ އެ ޓީމަށް 14 ޕޮއިންޓް ހޯދައިދީފައެވެ.
ގްރޫޕް 'އީ' ގައި ޕާކިސްތާނުން ވަނީ ޗައިނީޒް ތައިޕޭ 3-0 (25-20، 25-10، 25-23) އިން ބަލިކޮށްފައެވެ. ޕާކިސްތާނުގެ ފަހަދު ޢަލީ 16 ޕޮއިންޓް ހޯދައިދިންއިރު، ކެޕްޓަން މުޙައްމަދު އިރްފާން ވަނީ 12 ޕޮއިންޓް ހޯދައިދީފައެވެ.
ރިއެކްޓް އަދި ކޮމެންޓް ކުރެއްވުމަށް
