ޗެމްޕިއަންސް ލީގުގެ ފައިނަލުގައި ޕެނަލްޓީ ޖަހައިގެން އާސެނަލް ބަލިވި މެޗަށްފަހު، އެންމެ މުހިންމު ޕެނަލްޓީ ގަބްރިއެލް މަގަލްހައެސްއަށް ދޭންޖެހުނު ސަބަބު ކޯޗު މިކޭލް އާޓެޓާ ހާމަކޮށްފިއެވެ.
މި މެޗުގެ ނަތީޖާ ނެރުމަށް ޖެހި ޕެނަލްޓީ ޝޫޓްއައުޓްގައި، ޕީ.އެސް.ޖީ އާ އެއްވަރުކުރުމަށްޓަކައި ގަބްރިއެލް ޖެހި ފަސްވަނަ ޕެނަލްޓީ ވަނީ ގޯލުގެ ހުރަސް ދަނޑިމަތިން ބޭރަށް ގޮސްފައެވެ. މިއާއެކު ޕީ.އެސް.ޖީ އިން ވަނީ ޖެހިޖެހިގެން ދެވަނަ ފަހަރަށް ޗެމްޕިއަންސް ލީގުގެ ތަށި އުފުލާލާފައެވެ. މިއީ އާސެނަލްގެ ޖާޒީގައި ގަބްރިއެލް ޖެހި ފުރަތަމަ ޕެނަލްޓީއެވެ.
އާޓެޓާ ހާމަކުރި ގޮތުގައި، މެޗުގެ އިތުރު ވަގުތުގެ ތެރޭގައި އާސެނަލްގެ ގަވާއިދުން ޕެނަލްޓީ ޖަހާ ކުޅުންތެރިން ކަމަށްވާ މާޓިން އޮޑެގާޑް، ބުކާޔޯ ސަކާ އަދި ކައި ހާވަރޓްޒް ވަނީ ބަދަލުކޮށްފައެވެ.
"އާންމުކޮށް ޕެނަލްޓީ ޖަހާނީ ސަކާ، އޮޑެގާޑް ނުވަތަ ހާވަރޓްޒް. އެކަމަކު މެޗު އިތުރު ވަގުތަށް ގޮސް ޕެނަލްޓީއަށް ހިނގައިދާނެކަން އަހަރެމެންނަށް އެނގޭ. އެހެންވެ ތަފާތު ކުޅުންތެރިން ކުރިއަށް ނުކުންނަން ޖެހުނީ،"
އާޓެޓާ ބުންޏެވެ. އަދި ގަބްރިއެލް އެ ޕެނަލްޓީ ޖަހަން އަމިއްލައަށް އެދުނުކަންވެސް އޭނާ ފާހަގަކުރިއެވެ.
ޕެނަލްޓީ ޝޫޓްއައުޓްގައި އެބެރެޗީ އެޒޭ ޖެހި ޕެނަލްޓީވެސް ނާކާމިޔާބުވިއިރު، ވިކްޓާ ގިޔޮކެރެސް، ޑެކްލަން ރައިސް އަދި ގަބްރިއެލް މާޓިނެލީ ވަނީ ކާމިޔާބުކަމާއެކު ޕެނަލްޓީ ޖަހާފައެވެ.
މެޗަށްފަހު ވާހަކަދައްކަމުން ޑެކްލަން ރައިސް ވަނީ ޕެނަލްޓީ ނާކާމިޔާބުވި އެޒޭ އާއި ގަބްރިއެލްއަށް ހިތްވަރު ދީފައެވެ. އޭނާ ބުނި ގޮތުގައި ޗެމްޕިއަންސް ލީގުގެ ފައިނަލެއްގައި ޕެނަލްޓީއެއް ނާކާމިޔާބުވުމަކީ ހިތްދަތި ކަމެއް ނަމަވެސް، އެ ދެ ކުޅުންތެރިންނާ ނުލައި މި ސީޒަނުގެ ޕްރިމިއާ ލީގު ކާމިޔާބު ނުކުރެވުނީސްކަން ޔަގީނެވެ. "ފުޓްބޯޅައަކީ ބައެއް ފަހަރު ވަރަށް ރަހުމުކުޑަ އެއްޗެއް. އެކަމަކު އަހަރެމެން މި ނާކާމިޔާބީން ހިތްވަރު ލިބިގަނެގެން ކުރިއަށްދާނީ،"
ރައިސް ބުންޏެވެ.
މި ނާކާމިޔާބީއާއެކުވެސް، އާސެނަލްގެ ކުޅުންތެރިންނާއި މެނޭޖްމަންޓުން ދެކެނީ މިއީ ކުރިއަށް އޮތް ތަނުގައި ޓީމު އިތުރަށް ވަރުގަދަ ކުރުމަށް ލިބުނު ފިލާވަޅެއްގެ ގޮތުގައެވެ.
ރިއެކްޓް އަދި ކޮމެންޓް ކުރެއްވުމަށް
