އައްޑޫ ސިޓީ ކައުންސިލްގެ ހަތަރުވަނަ ދައުރުގެ ކައުންސިލަރުންނާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުން ވޭތުވެދިޔަ ފަސް އަހަރު ދުވަހު ކޮށްދެއްވި އިޚްލާޞްތެރި ޚިދުމަތުގެ އަގުވަޒަންކުރުމަށް ޚާއްޞަ ހަފްލާއެއް ބާއްވައިފިއެވެ. މެއި މަހުގެ 12 ވަނަ ދުވަހު ކައުންސިލް އިދާރާގެ މުވައްޒަފުންގެ ފަރާތުން އިންތިޒާމުކުރި މި ހަފްލާގައި އައްޑޫ ސިޓީގެ މޭޔަރު ޢަލީ ނިޒާރު ވަނީ ބައިވެރިވެވަޑައިގެންފައެވެ.
މި ހަފްލާގައި މޭޔަރު ނިޒާރު ދެއްކެވި ވާހަކަފުޅުގެތެރޭގައި ނިޒާރު ވަނީ މީދޫ ދާއިރާގެ ކައުންސިލަރު އާމިނަތު ސާލިޙާގެ މަސައްކަތްޕުޅުތަކަށް ވަރަށް ބޮޑަށް ތައުރީފު ކުރައްވާފައެވެ. މޭޔަރު ވިދާޅުވި ގޮތުގައި، ކައުންސިލްގައި ހިމެނޭ މެންބަރުންގެ ތެރެއިން ރައްޔިތުންނާ އެންމެ ގާތުން ކުރަންޖެހޭ މަސައްކަތްތައް އެންމެ ފުރިހަމައަށް ހާސިލްކޮށްފައިވާ ކައުންސިލަރަކީ ސާލިޙާކަމަށެވެ.
ނިޒާރުގެ ވާހަކަފުޅުގައި އިތުރަށް ފާހަގަކުރެއްވި ގޮތުގައި، މީދޫގެ ރައްޔިތުން ބޭނުންވި ކަންކަން ކައުންސިލްގެ ތެރެއިން އެންމެ ރަނގަޅަށް ކޮށްދެއްވުމުގައި ސާލިޙާ ވަނީ ނަމޫނާ ދައްކަވާފައެވެ. ކައުންސިލްގައި ހުރި ވަސީލަތްތައް ހޯދައި، އެ ވަސީލަތްތަކުގެ ބޭނުން އެންމެ ހެޔޮގޮތުގައި ހިފައިގެން ރައްޔިތުންނަށް ބޮޑެތި ކާމިޔާބީތަކެއް ހޯދައިދެއްވި ކައުންސިލަރަކީ ސާލިޙާ ކަމަށް މޭޔަރު ވިދާޅުވިއެވެ.
މި ހަފްލާގައި ނިމިދިޔަ ދައުރުގައި ކައުންސިލަރުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުން ކުރެއްވި ބުރަ މަސައްކަތުގެ އަގުވަޒަންކުރުމުގެ ގޮތުން، އެ ހުރިހާ ބޭފުޅުންނަށް ވަނީ ހަނދާނީ ފިލާ އަރުވާފައެވެ. މި ހަފްލާއަކީ ކައުންސިލްގެ މުވައްޒަފުންނާއި މެންބަރުންގެ މެދުގައި އޮތް ގާތް ގުޅުން ރަމްޒުކޮށްދިން، އަދި ފާއިތުވި ދައުރުގެ ކާމިޔާބީތައް ފާހަގަކުރި މުހިންމު ބައްދަލުވުމެކެވެ.
ރިއެކްޓް އަދި ކޮމެންޓް ކުރެއްވުމަށް
