ބްރައިޓަން އަތުން ޗެލްސީ ބަލިވި މެޗުގައި އެ ޓީމުގެ ފަރާތުން ފެނުނު ކުޅުމަކީ "ދިފާއުކުރެވޭނެ" ނުވަތަ "ބަލައިގަނެވޭނެ" ކަމެއް ނޫން ކަމަށް ބުނެ، އެ ޓީމުގެ ހެޑް ކޯޗު ލިއަމް ރޮސީނިއޯ ވަރަށް ބޮޑަށް ފާޑުކިޔައިފިއެވެ. މިއީ ސަޕޯޓަރުންގެ ނުރުހުމާއި އަޑުގަދަ ކުރުންތަކާ އޭނާ ކުރިމަތިލާންޖެހުނު ފުރަތަމަ ފަހަރެވެ.
އެމެކްސް ސްޓޭޑިއަމްގައި ކުޅުނު މި މެޗުގެ ފުރަތަމަ ލަނޑު ބްރައިޓަންއިން ޖެހުމާއެކު، ސަޕޯޓަރުން ވަނީ ޓީމާ ދެކޮޅަށް އަޑުއުފުލަން ފަށާފައެވެ. ޗެލްސީން މުޅި މެޗުގައިވެސް ލަނޑެއް ޖެހުމަށް އެދެވޭ މަސައްކަތެއް ކޮށްފައިނުވާއިރު، މެޗު ނިމުނީ 3-0 ގެ ނަތީޖާއަކުން އެ ޓީމު ބަލިވެގެންނެވެ. މިއީ ޗެލްސީގެ ކުޅުން ވަރަށް ބޮޑަށް ދަށަށް ގޮސްފައިވާކަން ހާމަވި މެޗެކެވެ. އެގޮތުން މެޗުގެ 40 ވަނަ މިނެޓާ ހަމައަށް ދިޔައިރުވެސް ލަނޑެއް ޖެހުމަށް އެންމެ ހަމަލާއެއްވެސް އުފެއްދިފައި ނުވާއިރު، ދިފާއީ ގޮތުންވެސް ގިނަ ގޯސްތަކެއް ވަނީ ހަދާފައެވެ.
މިއީ ލަނޑެއް ނުޖެހި ޖެހިޖެހިގެން ޗެލްސީ ބަލިވި ފަސްވަނަ މެޗެވެ. މިއީ 1912 ވަނަ އަހަރަށްފަހު އެ ޓީމުގެ ތާރީޚުގައި މިފަދަ ނަތީޖާތަކެއް ފެނުނު ފުރަތަމަ ފަހަރެވެ.
މެޗަށްފަހު ވާހަކަދައްކަމުން ރޮސީނިއޯ ބުނީ، މެޗުގެ ހުރިހާ ގޮތަކުން ބެލިޔަސް ފެނިގެންދިޔައީ ބަލައިގަނެވޭނެ ކުޅުމެއް ނޫން ކަމަށާއި، ކުޅުންތެރިންގެ ކިބައިގައި އެއްވެސް އަޒުމެއް ނެތް ކަމަށެވެ.
"އަބަދުވެސް އަހަރެން މި އަންނަނީ ކުޅުންތެރިން ދިފާއުކުރަމުން. ނަމަވެސް ރޭގެ ކުޅުމަކީ އެއްވެސް ގޮތަކަށް ދިފާއުކުރެވޭނެ ކަމެއް ނޫން. ލަނޑުތައް ވަދެގެންދިޔަ ގޮތާއި، ބޯޅަ ހޯދުމަށް ކުރި މަސައްކަތް މަދުވުމާއި، ޓީމުގައި ހުންނަންޖެހޭ ފޯރި ނެތުން އެއީ ކަންބޮޑުވާ ކަމެއް. މިހާރުން މިހާރަށް ވަރަށް ބޮޑު ބަދަލެއް އަންނަން އެބަޖެހޭ،"
އޭނާ ބުންޏެވެ.
ރޮސީނިއޯ އިތުރަށް ބުނީ، ކުޅުންތެރިން ދެއްކި ކުޅުމާމެދު އަމިއްލައަށް ވިސްނާލަންޖެހޭ ކަމަށެވެ. ޓެކްޓިކްސްއާ ބެހޭގޮތުން ވާހަކަދެއްކޭނީ ކުޅިވަރުގެ އަސާސީ ކަންކަން ފުރިހަމަކޮށްގެން ކަމަށާއި، ކުޅުމުގެ ހިތްވަރާއި، ހެޑްތަކާއި ޓެކްލްތައް ކާމިޔާބުކުރުމުގެ ރޫހު ނެތި ނަތީޖާ ނުނެރެވޭނެ ކަމަށް އޭނާ ފާހަގަކުރިއެވެ.
މި މެޗު ބަލަން ޗެލްސީގެ ކޯ-އޯނަރު ބެހްދާދު އެގްބާލީ އާއި ކްލަބުގެ ޑައިރެކްޓަރުން ވަޑައިގެން ތިއްބެވިއެވެ. މި ނަތީޖާއާއެކު ރޮސީނިއޯއަށް ކޯޗުގެ މަގާމުގައި ދެމިހުރެވޭނެތޯ ސުވާލު އުފެދިފައިވާއިރު، އަންނަ އާދީއްތަ ދުވަހު އެފް.އޭ ކަޕް ސެމީ ފައިނަލްގައި ލީޑްސް ޔުނައިޓެޑާ ދެކޮޅަށް ކުޅޭ މެޗަކީ މި ސީޒަނުގައި ޗެލްސީއަށް ކާމިޔާބެއް ހޯދުމަށް އޮތް އެންމެ ފަހު ފުރުސަތެވެ.
ލީގު ތާވަލުގެ ފަސްވަނައިގައި އޮތް ލިވަޕޫލަށްވުރެ އިތުރަށް އެއް މެޗު ކުޅެފައިވާއިރު، ޗެލްސީ އޮތީ ހަތް ޕޮއިންޓް ފަހަތުގައެވެ. މީގެ ސަބަބުން ޗެމްޕިއަންސް ލީގުން ޖާގައެއް ހޯދުމުގެ އުންމީދު ވަނީ ވަރަށް ބޮޑަށް ފަނޑުވެފައެވެ.
ރޮސީނިއޯގެ އިންޓަވިއުގެ މުހިންމު ބައިތައް:
ކޯޗާއި ކުޅުންތެރިންނާ ދެމެދު އެއްވެސް މައްސަލައެއް އޮތް ކަމަށް ގަބޫލެއް ނުކުރަން. ޓީމަށް ދެވެން އޮތް ހުރިހާ އެއްޗެއް ދެމުން މިދަނީ.
ޓީމުގައި ރޫހާއި އިތުބާރު ނެތުމުން، ބޭރުފުށުން ކަންކަން ގޯސްކޮށް ފެންނަނީ. މިހާރުގެ ނަތީޖާތަކަށް ބަލާއިރު އެކަމާ ދެކޮޅެއް ނުހެދޭނެ.
މިއީ ޓެކްޓިކަލް މައްސަލައެއް ނޫން. މިއީ މޮޅުވުމުގެ ޝައުގުވެރިކަމާއި، ހިތްވަރު ނެތުމުގެ މައްސަލައެއް.
ރޮސީނިއޯ : އަހަރެން މިހުރީ ވަރަށް ބޮޑަށް ކޯފާވެފައި. ޕްރޮފެޝަނަލް ކަމެއް ކުޅުންތެރިންގެ ކިބަޔަކުން ނުފެނުނު.
ރޮސީނިއޯ ބުނީ 11 ކުޅުންތެރިންގެ ތެރެއިން ހިތްވަރާއެކު ކުޅުނީ އެންމެ 3 ނުވަތަ 4 ކުޅުންތެރިން. މިއީ މިފަދަ ބޮޑު ކްލަބަކަށް އެކަށީގެންވާ މިންވަރެއް ނޫން.
ޗެލްސީގެ ތަފާސްހިސާބުތައް:
1912 ވަނަ އަހަރަށްފަހު ފުރަތަމަ ފަހަރަށް ލަނޑެއް ނުޖެހި ޖެހިޖެހިގެން ލީގު 5 މެޗުން ބަލިވުން.
ޕްރިމިއާ ލީގުގައި އެންމެ ފަހުން ކުޅުނު 9 މެޗުން ލިބުނީ އެންމެ މޮޅެއް.
ފާއިތުވި 12 ލީގު މެޗުގައިވެސް ބައިކޮޅަށް ލަނޑެއް ނުވަދެ ނިންމާލެވިފައެއް ނުވޭ.
މި ސީޒަނުގެ ޕްރިމިއާ ލީގުގައި ކޯނަރުތަކުން 11 ލަނޑު ބައިކޮޅަށް ވަދެފައިވޭ.
ކޯޗުގެ މުސްތަގުބަލާ މެދު ސުވާލު އުފެދުން:
މެޗުގެ ތެރޭގައި ސަޕޯޓަރުން ވަނީ ކްލަބުގެ މެނޭޖްމަންޓަށް ފާޑުކިޔައި، ކުރީގެ ވެރިޔާ ރޯމަން އަބްރަމޮވިޗްގެ ނަމުން ގޮވާފައެވެ. ކޯޗު ރޮސީނިއޯއާ ދެކޮޅަށް ސަޕޯޓަރުން ފާޅުގައި އަޑުއުފުލި މިއީ ފުރަތަމަ ފަހަރެވެ.
ނަމަވެސް ކްލަބުގެ މެނޭޖްމަންޓުން މިހާތަނަށް ބުނަމުން އައީ ރޮސީނިއޯއަށް އިތުބާރު އެބައޮތް ކަމަށާއި، އޭނާގެ މަސައްކަތް ވަޒަންކުރާނީ އަންނަ ސީޒަނުގެ ނިޔަލަށް ކަމަށެވެ. އެކަމަކު ފަހުގެ ނަތީޖާތަކާ އެކު ސަޕޯޓަރުންގެ ނުރުހުން އަމާޒުވުމުން، މެނޭޖްމަންޓަށް މި ނިންމުން ދެމެހެއްޓުމަށް ވަނީ ދަތިތަކަކާ ކުރިމަތިލާން ޖެހިފައެވެ.
ކުރީގެ ކުޅުންތެރިޔާ ކްރިސް ސަޓަން ބުނިގޮތުގައި، ޗެލްސީ ފެންނަނީ މުޅިން އަލަށް އެކުގައި ކުޅޭ ޓީމެއްގެ ގޮތުގައެވެ. އަދި ކުޅުންތެރިންގެ ކިބައިގައި އެއްވެސް ހިތްވަރެއް ނެތް ކަމަށާއި، ޓީމު ދަނީ ފަހަތަށް ކަމަށް އޭނާ ފާހަގަކުރިއެވެ.
ސަޕޯޓަރުންގެ ބައެއް ޝުއޫރުތައް:
ސްޓީވް (ލަންޑަން): "ސީޒަން ނިމެންދެންވެސް ރޮސީނިއޯ ހުންނާނެބާ؟ ލީޑްސް އަތުން ބަލިވެއްޖެނަމަ ވަގުތުން ވަކިކުރަންޖެހޭ."ސްޓުއާޓް (ލަންޑަން): "ވަގުތީ ކޯޗަކު ގެނޭ، މި ސީޒަން މިހާރު މި ނިމުނީ."ޓްރެވާ (އެސެކްސް): "މިއީ ހުތުރު ކަމެއް! ދުނިޔޭގެ ޗެމްޕިއަންގެ ބެޖު ޖަހައިގެން ތިބެ ކުޅޭ ކުޅުމެއް ނޫން މިއީ."ޓިމް (ޕެންޒަންސް): "ޗެލްސީ ސަޕޯޓަރެއްގެ ހައިސިއްޔަތުން މިއީ ބަލަން ކިތަންމެހާވެސް އުނދަގޫ މަންޒަރެއް. ކުޅުންތެރިންގެ ކިބައިގައި އެއްވެސް ކާމިޔާބީއަކަށް އެދޭ ރޫހެއް ނެތް."
ރިއެކްޓް އަދި ކޮމެންޓް ކުރެއްވުމަށް
