ހޮރްމޫޒް ކަނޑުއޮޅި ބަންދުކުރުމާ ގުޅިގެން އުފެދިފައިވާ ހަކަތައިގެ ކްރައިސިސްއަށް ހައްލެއް ހޯއްދެވުމުގައި އެމެރިކާގެ ރައީސް ޑޮނަލްޑް ޓްރަމްޕް ގެންގުޅުއްވާ އުސޫލުތަކަށް، ބައިނަލްއަގުވާމީ މައިދާނުގައާއި އެމެރިކާގެ އެތެރޭގެ ސިޔާސީ މަސްރަހުގައި ބޮޑެތި ފާޑުކިޔުންތަކެއް އަމާޒުވާން ފަށައިފިއެވެ.
މި މައްސަލައިގައި ޓްރަމްޕް ވަނީ އީރާނަށް ނުހަނު ވަރުގަދަ އިންޒާރެއް ދެއްވާފައެވެ. އެމަނިކުފާނު ވިދާޅުވި ގޮތުގައި، ކުރިއަށް އޮތް 48 ގަޑިއިރުގެ ތެރޭގައި އީރާނުން އެ ކަނޑުއޮޅި އަލުން ހުޅުވައި ނުދީފިނަމަ، އެ ގައުމުގެ އާންމު ހިދުމަތްތައް ފޯރުކޮށްދޭ އިންޖީނުގެތަކަށް ހަމަލާދީ، އެ ތަންތަން މުޅިން ސުންނާފަތިކޮށްލާނެއެވެ. ނަމަވެސް، މި ހަރުކަށި ނިންމެވުމާއެކު ދުނިޔޭގެ މަސްރަހުގައި ބޮޑު ނުތަނަވަސްކަމެއް ވަނީ އުފެދިފައެވެ.
އިދިކޮޅު ސިޔާސީ ލީޑަރުންނާއި ގާނޫނީ މާހިރުން ފާހަގަކުރައްވާ ގޮތުގައި، ޓްރަމްޕްގެ ސިޔާސަތުތައް ދޭތެރެ ދޭތެރެއިން ބަދަލުވަމުން ދިއުމަކީ، އެއްވެސް ރޭވުންތެރިކަމެއް ނެތި، ހާސްކަމުގެ ތެރޭގައި ނިންމަވާ ނިންމެވުންތަކެއް ކަމުގެ ހެއްކެކެވެ. ވަކިން ހާއްސަކޮށް، އާންމު ރައްޔިތުންނަށް ހިދުމަތްދޭ އިންޖީނުގެތަކަށް ހަމަލާދިނުމަކީ 'ހަނގުރާމައިގެ ކުށެއް' ކަމަށް އެމެރިކާގެ ބައެއް ސެނެޓަރުންނާއި އަސްކަރީ ގާނޫނީ ތަޖުރިބާކާރުން ސިފަކުރައްވައެވެ. ބައިނަލްއަގުވާމީ ގާނޫނުތައް ބުނާގޮތުން، ހަނގުރާމައެއްގެ ހާލަތުގައި ވެސް އާންމު ރައްޔިތުންގެ އަސާސީ ބޭނުންތަކާ ގުޅިފައިވާ ތަންތަނަށް ހަމަލާދިނުމަކީ ކަނޑައެޅިގެން މަނާކަމެކެވެ.
ދުނިޔޭގެ ބާޒާރުގައި ތެލުގެ އަގު އިންތިހާއަށް އުފުލެމުން ދިއުމުގެ ސަބަބުން އެމެރިކާގެ އިގްތިސާދަށް ކުރާ ނޭދެވޭ އަސަރުތައް ކުޑަކުރުމަށްޓަކައި، ޓްރަމްޕް ވަނީ ކުއްލި ފިޔަވަޅެއްގެ ގޮތުން އީރާނުގެ ބައެއް ތެލުގެ މުއާމަލާތްތަކަށް އަޅާފައިވާ ދަތިކުރުމުގެ ފިޔަވަޅުތަކަށް ލުއިތަކެއް ދެއްވާފައެވެ. އެހެންނަމަވެސް، މި ފިޔަވަޅުގެ ސަބަބުން ބާޒާރުގެ އަގުތަކަށް ހަގީގީ ބަދަލެއް އަންނާނެތޯއާއި، މީގެ ސަބަބުން އީރާނަށް ލިބޭނެ މާލީ ފައިދާއާ މެދު އިގްތިސާދީ މާހިރުން ގެންދަނީ ޝައްކު އުފައްދަމުންނެވެ.
ވައިޓް ހައުސްއިން މި ސިޔާސަތުތައް ދިފާއުކުރަމުން ބުނެފައިވަނީ، އީރާނުގެ އިންޖީނުގެތަކަކީ ހަމައެކަނި އާންމު ހިދުމަތަށް ބޭނުންކުރާ ތަންތަން ނޫން ކަމަށާއި، އެއީ އެ ގައުމުގެ ރިވޮލިއުޝަނަރީ ގާޑުން އަސްކަރީ އެކި ބޭނުންތަކަށް ބޭނުންކުރާ މަރުކަޒުތަކެއް ކަމަށެވެ. އެހެންކަމުން، އެ ތަންތަނުގެ މަސައްކަތް ހުއްޓުވުމަކީ އީރާނަށް ޕްރެޝަރުކޮށް، ކަނޑުއޮޅި ހުޅުވުމަށް މަޖުބޫރުކުރުވުމަށްޓަކައި ކުރަންޖެހޭ ކަމެއް ކަމުގައި ސަރުކާރުގެ އިސް އޮފިޝަލުން ވިދާޅުވެއެވެ.
އިޒްރޭލާއި އެމެރިކާއިން ގުޅިގެން އިރާނަށް ދެމުންދާ ހަމަލާތަކާ ގުޅިގެން ދުނިޔޭގެ ބާޒާރުގައި ތެލުގެ އަގަށް ބަދަލުތަކެއް އައިސްފައިވީ ނަމަވެސް، ރާއްޖެއަށް ތެޔޮ ގެނައުމުގެ މަސައްކަތް ޝެޑިއުލާ އެއްގޮތަށް ކުރިއަށްދާ ކަމަށާއި، މިދިޔަ ހަފުތާގައިވެސް ތެލުގެ ދެ ޝިޕްމަންޓެއް ރާއްޖެ ގެނެސްފައިވާ ކަމަށް ސަރުކާރުން ބުނެއެވެ.
ރިއެކްޓް އަދި ކޮމެންޓް ކުރެއްވުމަށް
