އައްޑޫސިޓީ މީދޫގައި ގަވާއިދާ ހިލާފަށް އުޅޭ ބޭރުމީހުން ހިންގާ އިމާރާތްކުރުމުގެ މަސައްކަތްތަކާއި، އެމީހުން ކުރަމުންދާ ދަނޑުވެރިކަމުގެ ވިޔަފާރިތައް ހުއްޓުވައި، އެކަންކަން ރަށުގެ ރައްޔިތުންނަށް ފައިދާހުރި ގޮތަކަށް އިންތިޒާމުކުރުމަކީ މުހިންމު ކަމެއް ކަމަށް އައްޑޫސިޓީ ކައުންސިލްގެ މީދޫ ދާއިރާގެ މެންބަރު އާމިނަތު ސާލިހާ ވިދާޅުވެއްޖެއެވެ.
ކުރިއަށް އޮތް ލޯކަލް ކައުންސިލް އިންތިޚާބުގައި މީދޫ ދާއިރާގެ ރައީސްކަމަށް ޕީއެންސީގެ ފަރާތުން ވާދަކުރައްވާ ކެނޑިޑޭޓް، އާމިނަތު ސާލިހާ މިހެން ވިދާޅުވީ އެކަމަނާގެ ރަސްމީ ފޭސްބުކް ޕޭޖްގައި އާންމުކުރެއްވި ލިއުއްވުމެއްގައެވެ.
ސާލިހާ ފާހަގަކުރެއްވި ގޮތުގައި، މީދޫގައި ގަވާއިދާ ހިލާފަށް އުޅޭ ބޭރުމީހުން އިސްވެ ތިބެ ހިންގާ އިމާރާތްކުރުމުގެ ގްރޫޕްތަކުގެ ސަބަބުން ރަށުގެ އިގްތިސާދަށާއި ރައްޔިތުންގެ ފުރުސަތުތަކަށް ވަނީ ހުރަސްތަކެއް ކުރިމަތިވެފައެވެ. އެހެންކަމުން، އެފަދަ ގްރޫޕްތައް ހުއްޓުވުމަކީ ކުރަންޖެހިފައިވާ މުހިންމު މަސައްކަތެއް ކަމަށް އޭނާ ވިދާޅުވިއެވެ.
މީގެ އިތުރުން، ބޭރުމީހުންގެ ބާރުގެ ދަށުގައި މިހާރު އޮތް ކުރުނބާ، ކާށި، އަދި ފަތްކެޔޮ ފަދަ ތަކެތީގެ ވިޔަފާރިތައް ދަނޑުވެރިންގެ ކޯޕަރޭޓިވް ސޮސައިޓީގެ ބެލުމުގެ ދަށަށް ގެނައުމަކީ އެކަމަނާގެ މުހިންމު ތަސައްވަރެކެވެ. ސާލިހާ ވިދާޅުވީ، މި ބާވަތްތައް ވިއްކުމުގައި ރައްޔިތުންނަށް އެންމެ ފައިދާ ބޮޑުވާނެ ގޮތްތަކަކީ ކޮބައިތޯ ބަލައި، އެ ތަކެތި ވިއްކޭނެ ހަރުދަނާ އިންތިޒާމްތަކެއް ހަމަޖެހިގެން ދިއުމަށް ބޭނުންފުޅުވާ ކަމަށެވެ.
"މިއީ ރަށުގެ އިގްތިސާދު ރައްޔިތުންގެ އަތްމައްޗަށް އިއާދަކޮށް، ދަނޑުވެރިންނަށް ހައްގު މިންވަރު ހޯދައިދިނުމަށް އެޅޭނެ މުހިންމު ފިޔަވަޅެއް،"
ސާލިހާގެ ލިއުއްވުމުގައި ފާހަގަކުރައްވާފައިވެއެވެ.
އާމިނަތު ސާލިހާގެ މި ހުށަހެޅުއްވުމަކީ މީދޫގެ ދަނޑުވެރިކަމުގެ ދާއިރާ ހަރުދަނާކޮށް، ގަވާއިދާ ހިލާފަށް އުޅޭ ބޭރުމީހުންގެ ނުފޫޒު ކުޑަކުރުމަށް އެޅޭނެ ހަރުދަނާ ފިޔަވަޅެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ. ކައުންސިލް އިންތިޚާބަށް ކުރިމަތިލައްވާފައިވާ ސާލިހާގެ މައިގަނޑު އަމާޒަކީ ރަށުގެ މުއްސަނދިކަމާއި ވަސީލަތްތަކުން ސީދާ ރައްޔިތުންނަށް ފައިދާ ލިބޭނެ މަގުތައް ފަހިކޮށްދިނުމެވެ.
ރިއެކްޓް އަދި ކޮމެންޓް ކުރެއްވުމަށް
