އަންނަ އެޕްރީލް މަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބުގައި، އެމްޑީޕީގެ ޓިކެޓުގައި މާލޭގެ މޭޔަރުކަމަށް ވާދަކުރައްވާނެ ކެންޑިޑޭޓަކު ހޮވުމަށް ބޭއްވި ފޯރިގަދަ ޕްރައިމަރީ، މިހާރުގެވެސް މޭޔަރު އާދަމް އާޒިމް ކާމިޔާބު ކުރައްވައިފިއެވެ.
މި ކާމިޔާބީއާއެކު، އޭނާއާ ވާދަކުރެއްވި އަލީ އާޒިމް ވަނީ އާދަމް އާޒިމަށް މަރުހަބާ ވިދާޅުވެ، އިންތިޚާބު ކާމިޔާބުކޮށްދިނުމަށް މަސައްކަތް ކުރައްވާނެ ކަމުގެ ޔަގީންކަން ދެއްވާފައެވެ.
އިއްޔެ ބޭއްވުނު އެމްޑީޕީގެ ޕްރައިމަރީގައި، އެންމެ ބޮޑު ސަމާލުކަމެއް ހުއްޓިފައި އޮތީ މާލޭ މޭޔަރުކަމުގެ ޓިކެޓަށެވެ. މި މަގާމަށް ވާދަކުރެއްވީ އާދަމް އާޒިމާއި، މެދުހެންވޭރު ދާއިރާގެ ކުރީގެ މެންބަރު އަލީ އާޒިމެވެ. އަލީ އާޒިމަކީ މިދިޔަ ރިޔާސީ އިންތިޚާބުގެ ދުވަސްވަރު އެމްޑީޕީން ވަކިވެވަޑައިގެން، 'ދަ ޑިމޮކްރެޓްސް' އުފެއްދެވުމުގައި އިސްކޮށް އުޅުއްވައި، އޭރުގެ ސަރުކާރާ ދެކޮޅަށް މަސައްކަތް ކުރެއްވި ބޭފުޅެކެވެ. ނަމަވެސް، ފަހުން އޭނާ ހިމެނޭހެން ޑިމޮކްރެޓްސްގެ އިސް ގިނަ މެންބަރުންތަކެއް ވަނީ އަލުން އެމްޑީޕީއާ ގުޅިވަޑައިގެންފައެވެ.
އިއްޔެ ބޭއްވުނު އެމްޑީޕީގެ ޕްރައިމަރީގައި މާލޭގެ ދާއިރާތަކުން ވޯޓުލުމުގެ ހައްގު ލިބިގެންވާ 5،000 އަށްވުރެ ގިނަ މީހުންނަށް ޚާއްސަކޮށްގެން 17 ވޯޓު ފޮއްޓެއް މާލޭގައި ބަހައްޓާފައިވެއެވެ. އިންތިޚާބުގެ ވަގުތީ ނަތީޖާ ދައްކާގޮތުން، ގިނަ ފޮށިތަކުގެ މެޖޯރިޓީ ހޯއްދަވައިގެން ކުރި ހޯއްދެވީ އާދަމް އާޒިމެވެ.
ނަތީޖާ ސާފުވުމާއެކު، އަލީ އާޒިމް ވަނީ އާދަމް އާޒިމަށް ފޯނުން ގުޅުއްވައި މަރުހަބާ ދަންނަވާފައެވެ. މި ފޯން ކޯލުގައި އަލީ އާޒިމް ވިދާޅުވީ، އޭނާ އެދެނީ އެމްޑީޕީއަށް މި ގޮނޑި ކާމިޔާބުވުމަށް ކަމަށާއި، އާދަމް އާޒިމް އިންތިޚާބު ކާމިޔާބު ކުރެއްވުމަށް ކުރެވެން ހުރި ހުރިހާ މަސައްކަތެއް ކުރައްވާނެ ކަމަށެވެ.
މާލޭ މޭޔަރުކަމުގެ ގޮނޑިއަކީ ސިޔާސީ ގޮތުން ނުހަނު ވާދަވެރި ގޮނޑިއަކަށް ވެފައި، ޕާޓީގެ އެތެރޭގެ ވާދަވެރިކަމުގެ ސަބަބުން މީގެ ކުރިން އެމްޑީޕީއަށް ކުރިމަތިވި ބައިބައިވުންތައް އަލުން ތަކުރާރުވެދާނެތީ ގިނަ ބަޔަކު ކަންބޮޑުވުން ފާޅުކުރިއެވެ. ނަމަވެސް، ޕާޓީގެ ލީޑާޝިޕުން ވަނީ މިފަހަރު އެފަދަ ކަމެއް ތަކުރާރު ނުވާނެ ކަމަށާއި، މުޅި ޕާޓީ އޮތީ އެއްގަލަކަށް އަރައި، އާދަމް އާޒިމްގެ ފަހަތުގައި ކަމުގެ ޔަގީންކަން ދީފައެވެ.
ރިއެކްޓް އަދި ކޮމެންޓް ކުރެއްވުމަށް
