ކުރިއަށް އޮތް ކައުންސިލް އިންތިޚާބުގެ ކެމްޕޭން މަސައްކަތްތައް ފެށިގެން އަންނައިރު، ސިޔާސީ މަޝްރަޙުގައި ފާހަގަކުރެވޭ ބައެއް ކަންތައްތަކާ ގުޅޭގޮތުން ވިސްނާލުމަކީ މުހިންމު ކަމެކެވެ. ޚާއްޞަކޮށް ހުޅުދޫއާއި މީދޫގައި ވަކި ކައުންސިލްތަކެއް އުފެދި ކައުންސިލްތަކަށް ކުރިމަތިލައްވާ ބޭފުޅުންނާއި ދެރަށުގެ ރައްޔިތުންނަށް މި މައުޟޫއަކީ ވަރަށް މުހިންމު މައުޟޫއެކެވެ. މި ލިޔުމުގައި އަޅުގަނޑު ބަލައިލާނީ ކައުންސިލް އިންތިޚާބަށް ފޯރާ ނުފޫޒުގެ ސަބަބުން ކައުންސިލްތަކަށް ކުރިމަތިވެދާނެ ގޮންޖެހުންތަކާއި، ނަޒާހަތްތެރި އަދި ޤާބިލު ބޭފުޅުން ކައުންސިލްތަކަށް އިންތިޚާބުކުރުމުގެ މުހިންމުކަމާ ބެހޭގޮތުންނެވެ.
ކައުންސިލް އިންތިޚާބުގައި ވާދަކުރައްވަން ނިންމަވާފައިވާ ބައެއް ބޭފުޅުން، ކުރީގައި އެބޭފުޅުންނާ ދެކޮޅަށް މަސައްކަތްކުރެއްވި ފަރާތްތަކާ ގުޅިގެން ކެމްޕޭން ކުރަމުންދާކަމުގެ ވާހަކަތައް އަޑުއިވެމުންދެއެވެ. މިއީ ހައިރާންވާންޖެހޭ ކަމެއް ނޫނެވެ. ސިޔާސީ މައިދާނުގައި މިފަދަ 'ޓެކްޓިކަލް އެލައިންސް' އުފެދުމަކީ އާދައިގެ ކަމެކެވެ. ނަމަވެސް، މިފަދަ ގުޅުންތައް ބިނާވެފައި އޮންނަނީ ގިނަފަހަރު ސިޔާސީ މަޞްލަޙަތުގެ މައްޗަށެވެ. އެއްވެސް ހާލެއްގައި ރައްޔިތުންގެ ލާބައާއި މަންފާއަށް ނޫނެވެ.
ތާރީޚު ދައްކައިދޭ ގޮތުގައި، ސިޔާސީ މަޞްލަޙަތު ހާސިލުކުރުމަށް އުފެދޭ ގާތްކަން ގިނަފަހަރަށް ދެމިނުހުރެއެވެ. މިކަން ބައެއް ފަރާތްތަކުން "ކޮޅުކެހި" ކަމުގައި ސިފަކުރަމުންދާއިރު، މިއީ ހަމައެކަނި ސިޔާސީ ގޮތުން ބަލައިލާއިރު ފެންނަ މަންޒަރެކެވެ. އަސްލު މައްސަލައަކީ ކޮޅުކެހި އެއް ނޫނެވެ. މައްސަލައަކީ ރައްޔިތުންގެ ތަރައްޤީއާއި ލާބައަށްވުރެ ސިޔާސީ ޕާޓީގެ އެޖެންޑާ އިސްކުރުމެވެ.
ލާމަރުކަޒީ ޤާނޫނުގެ ރޫޙަކީ ރަށްރަށުގެ ތަރައްޤީގެ ކަންކަން ރަށުފެންވަރުގައި ނިންމުމަށް ބާރުދިނުމެވެ. ކައުންސިލްތަކަކީ ރައްޔިތުންގެ ބޭނުންތަކަށް އަވަސް އަދި ފަސޭހަ ޙައްލުތައް ހޯދައިދިނުމަށް އުފައްދާފައިވާ މުއައްސަސާތަކެކެވެ. ކައުންސިލްގެ ނިންމުންތައް ބިނާވާންޖެހޭނީ ރަށުގެ ތަރައްޤީގެ ޕްލޭނާއި ރައްޔިތުންގެ މަޞްލަޙަތުގެ މައްޗަށެވެ. ވަކި ސިޔާސީ ޕާޓީއެއްގެ އެޖެންޑާގެ މައްޗަކަށް ނޫނެވެ.
ހުޅުދޫއާއި މީދޫގައި ވަކި ކައުންސިލްތަކެއް އުފެދިގެން ދިއުމަކީ އެ ރަށްރަށުގެ ރައްޔިތުންނަށް ލިބޭނެ ބޮޑު ކުރިއެރުމެކެވެ. ނަމަވެސް، މި ކުރިއެރުން ޙަޤީޤަތަކަށް ވާނީ ކައުންސިލަށް ހޮވޭ މެންބަރުންނަކީ:
# ރަށުގެ ތަރައްޤީއަށް ވިސްނައި މަސައްކަތްކުރާ ބަޔަކަށް ވާނަމައެވެ.
# ނަޒާހަތްތެރިކަމާއެކު ޚިދުމަތްކުރާނެ ބަޔަކަށް ވާނަމައެވެ.
# ސިޔާސީ ޕާޓީތަކުގެ ނުފޫޒުން އެއްކިބާވެ، މިނިވަންކަމާއެކު ނިންމުންތައް ނިންމޭ ބަޔަކަށް ވާނަމައެވެ.
ސިޔާސީ ޕާޓީތަކުގެ ނުފޫޒު: ކައުންސިލްތަކަށް ކުރިމަތިވާ ގޮންޖެހުން
ދިވެހިރާއްޖޭގެ ސިޔާސީ ޕާޓީތަކުގެ ވާދަވެރިކަން ވަރަށް ބޮޑެވެ. ވެރިކަމުގައި އޮންނަ ޕާޓީއާއި އިދިކޮޅު ޕާޓީތަކުގެ ދެމެދުގައި އޮންނަ ތަފާތުވުންތަކުގެ ސަބަބުން، ގިނަފަހަރު ކައުންސިލްތަކުގެ މަސައްކަތްތަކަށް ހުރަސްތަކާ ކުރިމަތިވެއެވެ. އިދިކޮޅު ޕާޓީއަކަށް ނިސްބަތްވާ ކައުންސިލަކަށް ސަރުކާރުގެ އެއްބާރުލުން ލިބުމުގައި ދަތިތަކާ ކުރިމަތިވުމަކީ ދިވެހިރާއްޖޭއިން ފެންނަމުންދާ ކަމެކެވެ.
ވެރިކަމުގައި އޮތީ އެހެން ޕާޓީއަކަށް ވާނަމަ، ކައުންސިލުން ނިންމާ ނިންމުންތަކަށް ސަރުކާރުގެ އެއްބާރުލުން ނުލިބުމުގެ ސަބަބުން، ކައުންސިލްތަކުގެ މަސައްކަތްތައް ހުއްޓުމަކަށް އައުމަކީ ނުވަތަ ލަސްވުމަކީ އެކަށީގެންވާ ކަމެކެވެ. މީގެ ނަތީޖާއަކަށް ވެގެންދާނީ ރައްޔިތުންގެ އުންމީދުތައް ފުނޑުފުނޑުވެގެން ދިއުމެވެ. މިހެންކަމުން، ކައުންސިލްތަކަށް ކުރިމަތިލާ ބޭފުޅުންނަކީ ސިޔާސީ ޕާޓީތަކުގެ ނުފޫޒުން މިނިވަންވެ، ރައްޔިތުންގެ މަޞްލަޙަތު އިސްކުރާނެ ބަޔަކަށް ވުމަކީ ވަރަށް މުހިންމު ކަމެކެވެ.
ކައުންސިލްތަކުގެ މަސައްކަތްތައް ކާމިޔާބުވުމަށް އެންމެ މުހިންމު އެއް ކަމަކީ ނަޒާހަތްތެރި އަދި ޤާބިލު ކައުންސިލަރުން ހޮވުމެވެ. ނަޒާހަތްތެރި ކައުންސިލަރުންނަކީ:
# ރައްޔިތުންގެ މުދަލާއި ފައިސާއަށް ޚިޔާނާތްތެރި ނުވާނެ ބައެކެވެ.
# ވަކި ފަރާތަކަށް ނުޖެހި ހަމަހަމަކަމާއެކު ހުރިހާ ރައްޔިތުންނަށް ޚިދުމަތްކުރާނެ ބައެކެވެ.
# ޒާތީ މަޞްލަޙަތަށްވުރެ ރައްޔިތުންގެ މަޞްލަޙަތު އިސްކުރާނެ ބައެކެވެ.
ޤާބިލު ކައުންސިލަރުންނަކީ:
# ރަށުގެ ތަރައްޤީއަށް ބޭނުންވާ ޕްރޮޖެކްޓްތައް ރާވައި ހިންގުމުގެ ޤާބިލުކަން ލިބިފައިވާ ބައެކެވެ.
# ރައްޔިތުންގެ ބޭނުންތައް ދެނެގަނެ، އެކަންކަމަށް ޙައްލު ހޯދުމުގެ ޤާބިލުކަން ލިބިފައިވާ ބައެކެވެ.
# ސަރުކާރުގެ އިދާރާތަކާ ގުޅިގެން މަސައްކަތްކުރުމުގެ ހުނަރު ލިބިފައިވާ ބައެކެވެ.
މިފަދަ ސިފަތައް ހުރި ކައުންސިލަރުން ހޮވުމަކީ ރަށުގެ ތަރައްޤީއަށް މަގުފަހިކުރާނެ ކަމެކެވެ. ސިޔާސީ ޕާޓީތަކުގެ ނުފޫޒުން އެއްކިބާވެ، ރައްޔިތުންގެ މަޞްލަޙަތު އިސްކުރާ ކައުންސިލަރުން ހޮވުމަކީ ރައްޔިތުންގެ ޒިންމާއެކެވެ.
ހުޅުދޫ-މީދޫގެ ޚާއްޞަ ހާލަތް
ހުޅުދޫއާއި މީދޫގައި ވަކި ކައުންސިލްތަކެއް އުފެދިގެން ދިއުމަކީ އެ ދެ ރަށުގެ ރައްޔިތުންގެ އެދުމެކެވެ. މި ދެ ރަށުގައި ވަކިވަކި ކައުންސިލްތަކެއް އުފެދިގެން ދިއުމުން، ރައްޔިތުންނަށް ޚިދުމަތް ލިބުމުގައި ލުއިފަސޭހަކަން ލިބިގެންދާނެއެވެ. ނަމަވެސް، މި ކައުންސިލްތައް ކާމިޔާބުވުމަށް، ރައްޔިތުންގެ އިތުބާރު ލިބިފައިވާ، ނަޒާހަތްތެރި އަދި ޤާބިލު ބޭފުޅުން ކައުންސިލްތަކަށް އިންތިޚާބުކުރުމަކީ މުހިންމު ކަމެކެވެ.
މިހާރު ސިޓީ ކައުންސިލާއެކު އޮތުމަށްވުރެ ވަކި ކައުންސިލްތަކެއްގެ ގޮތުގައި ހިންގުމުން ލިބޭ ފައިދާތައް ގިނަވާނީ އެ ކައުންސިލްތަކުން ރައްޔިތުންގެ މަޞްލަޙަތު އިސްކޮށްގެން މަސައްކަތްކުރާނަމައެވެ. އެހެންނޫންނަމަ، އައު ކައުންސިލްތައް އުފެދުނު ނަމަވެސް، ރައްޔިތުންނަށް ލިބޭނެ ކުރިއެރުމެއް ނޯންނާނެއެވެ. އަދި ހާލަތު ދަށަށް ދިއުމަކީވެސް އެކަށީގެންވާ ކަމެކެވެ.
ކައުންސިލްތަކަށް ނަޒާހަތްތެރި އަދި ޤާބިލު ބޭފުޅުން އިންތިޚާބުކުރުމުގެ ޒިންމާއަކީ ރައްޔިތުންގެ ޒިންމާއެކެވެ. އިންތިޚާބުގެ ދުވަހު ވޯޓުލާއިރު، ރައްޔިތުން ވިސްނަންވާނީ:
# ކެންޑިޑޭޓުންގެ ތަޢުލީމީ ފެންވަރާއި ތަޖުރިބާއަށެވެ.
# ކެންޑިޑޭޓުންގެ ނަޒާހަތްތެރިކަމާއި ތެދުވެރިކަމުގެ ރިކޯޑަށެވެ.
# ކެންޑިޑޭޓުން ހުށަހަޅާ ޕްލޭންތަކާއި ވަޢުދުތަކުގެ ޤާބިލުކަމަށެވެ.
# ކެންޑިޑޭޓުންގެ ސިޔާސީ މަޞްލަޙަތުގެ ބަދަލުގައި ރައްޔިތުންގެ މަޞްލަޙަތަށް އިސްކަންދިނުމުގެ މިންވަރަށެވެ.
ރައްޔިތުން މި ކަންކަމަށް ރިޢާޔަތްކޮށްގެން ވޯޓުދީފިނަމަ، ނަޒާހަތްތެރި އަދި ޤާބިލު ކައުންސިލަރުން އިންތިޚާބުކުރުމުގެ ފުރުޞަތު ބޮޑުވެގެންދާނެއެވެ.
ކައުންސިލަރުންގެ ޒިންމާ: ރައްޔިތުންނަށް ޖަވާބުދާރީވުން
ކައުންސިލްތަކަށް އިންތިޚާބުވާ ބޭފުޅުން ވިސްނަންވާނީ އެބޭފުޅުންގެ ޒިންމާއަކީ ރައްޔިތުންނަށް ޖަވާބުދާރީވާން ޖެހޭބައެއް ކަމަށެވެ. ވަކި ސިޔާސީ ޕާޓީއަކަށް ޖަވާބުދާރީވުމެއް ނޫނެވެ. ކައުންސިލަރުން ނިންމާ ކޮންމެ ނިންމުމަކީ ރައްޔިތުންގެ މަޞްލަޙަތަށް ބިނާކޮށް ނިންމާ ނިންމުމަކަށް ވާންވާނެއެވެ. ކައުންސިލަރުން ޖަވާބުދާރީވާންޖެހޭނީ ރައްޔިތުންނަށެވެ. ސިޔާސީ ޕާޓީއަކަށް ނޫނެވެ.
ކައުންސިލަރުން ނިންމާ ނިންމުންތަކާއި ކުރާ މަސައްކަތްތަކުގެ މަޢުލޫމާތު ރައްޔިތުންނާ ހިއްސާކުރުމަކީ ވަރަށް މުހިންމު ކަމެކެވެ. ރައްޔިތުންނަށް މަޢުލޫމާތު ލިބިގެން، ކައުންސިލްގެ މަސައްކަތްތަކުގައި ބައިވެރިވުމުގެ ފުރުޞަތު ލިބިގެންދާނެއެވެ. މިއީ ޑިމޮކްރަސީގެ އަސާސްތަކުގެ ތެރެއިން އެއް އަސާސެވެ.
ކުރިއަށް އޮތް ކައުންސިލް އިންތިޚާބަކީ ހުޅުދޫއާއި މީދޫގެ ރައްޔިތުންނަށް ވަރަށް މުހިންމު އިންތިޚާބެކެވެ. ރައްޔިތުންގެ މުސްތަޤުބަލާ ގުޅިފައިވާ އިންތިޚާބެކެވެ. މި އިންތިޚާބުގައި ރައްޔިތުން ހޮވާ ކައުންސިލަރުންގެ ސިފަތަކަށް ބަލައި، ރަށުގެ ތަރައްޤީގެ މިސްރާބު ކަނޑައެޅިގެންދާނެއެވެ.
ކައުންސިލަށް ކުރިމަތިލާ ބޭފުޅުންނަކީ ކަމަށް ޤާބިލު، ނަޒާހަތްތެރި އަދި ރައްޔިތުންގެ މަޞްލަޙަތު އިސްކުރާ ބަޔަކަށް ވާންޖެހެއެވެ. ވަކި ޕާޓީއަކަށް ނިސްބަތްވުމުގެ ސަބަބުން، ކަންތައްތައް ނިންމުމުގައި ދެކޮޅުވެރިކަން ފާޅުކޮށް، ތަރައްޤީގެ މަޝްރޫޢުތަކަށް ހުރަސްއަޅާ ބަޔަކަށް ވެގެން ނުވާނެއެވެ.
ރައްޔިތުންވެސް ވޯޓުލާއިރު ވިސްނަންވާނީ ރަށުގެ ތަރައްޤީއަށް އެންމެ ފައިދާހުރި ގޮތަކަށެވެ. ވަކި ޕާޓީއަކަށް ތާއީދުކުރާތީ ނޫނެވެ. ރަށުގެ ތަރައްޤީއަށް މަސައްކަތްކުރާނެ، ނަޒާހަތްތެރި އަދި ޤާބިލު ބޭފުޅުން އިންތިޚާބުކުރުމަކީ ރައްޔިތުންގެ ޒިންމާއެކެވެ.
ހުޅުދޫއާއި މީދޫގެ ރައްޔިތުންގެ މުސްތަޤުބަލު އުޖާލާ ކުރުމަށްޓަކައި، ސިޔާސީ ތަޢައްޞުބުން އެއްކިބާވެ، ރައްޔިތުންގެ މަޞްލަޙަތު އިސްކުރާ ކައުންސިލަރުން އިންތިޚާބުކުރުމަށް މަސައްކަތްކުރަމާ ހިނގާށެވެ. އޭރުން، ދެ ރަށުގެ ކައުންސިލްތައް އުފެދިގެން ދިއުމުން، ރައްޔިތުންނަށް ލިބޭނެ ފައިދާތައް އިތުރުވެގެންދާނެއެވެ. ރައްޔިތުންގެ އުންމީދުތައް ޙަޤީޤަތަކަށް ވެގެންދާނެއެވެ.
ރިއެކްޓް އަދި ކޮމެންޓް ކުރެއްވުމަށް
