އެމެރިކާގެ ސިޔާސީ ޙަޔާތުގައި މުހިންމު އަދި ތާރީޚީ ޞަފްޙާއެއް އަނެއްކާވެސް ލިޔެވިގެން ހިނގައްޖެއެވެ. އެމެރިކާގެ މިޝިގަން ސްޓޭޓުން ވާދަކުރެއްވި ޑިމޮކްރެޓިކް ޕާޓީގެ ކެންޑިޑޭޓް ޢަބްދުލް އަލް-ސައްޔިދު ވަނީ އެމެރިކާގެ ޤާނޫނުހަދާ މަޖިލީހުގެ މަތިގެ، ނުވަތަ ސެނެޓްގެ ގޮނޑި ކާމިޔާބުކުރައްވައި، އެ ޤައުމުގެ ސެނެޓަށް އިންތިޚާބުވި ފުރަތަމަ މުސްލިމް ބޭފުޅާގެ ޝަރަފުވެރި ލަޤަބު ހޯއްދަވާފައެވެ.
ފޯރިގަދަ ކެމްޕޭނަކަށްފަހު، މި އިންތިޚާބު ޢަބްދުލް އަލް-ސައްޔިދު ކާމިޔާބުކުރެއްވީ އިދިކޮޅު ރިޕަބްލިކަން ޕާޓީގެ ފަރާތުން ވާދަކުރެއްވި ތަޖުރިބާކާރު ސިޔާސީ ކެންޑިޑޭޓް މައިކް ރޮޖާސްއާ ވާދަކުރައްވައެވެ. މައިކް ރޮޖާސްގެ މައްޗަށް ހޯއްދެވި މި ފުރިހަމަ ކާމިޔާބީއަކީ އެމެރިކާގެ ސިޔާސީ މައިދާނުގައި މުސްލިމުންނަށް ލިބުނު ފާހަގަކޮށްލެވޭ ވަރަށް ބޮޑު ކުރިއެރުމެކެވެ. މިއީ މައިނޯރިޓީ ދަރިކޮޅުތަކަށާއި އިސްލާމީ އުންމަތަށްވެސް ލިބުނު ވަރަށް ބޮޑު ހިތްވަރެކެވެ.
ޢަބްދުލް އަލް-ސައްޔިދަކީ ހަމައެކަނި ސިޔާސީ ބޭފުޅެއް ނޫނެވެ. އޭނާއަކީ މީގެ ކުރިން ޢާންމު ޞިއްޙަތާ ބެހޭ ދާއިރާގައި ގިނަގުނަ ޚިދުމަތްތަކެއް ކޮށްދެއްވާފައިވާ ޤާބިލު ޑޮކްޓަރެކެވެ. ޑިޓްރޮއިޓްގެ ހެލްތު ޑިޕާޓްމަންޓްގެ އެގްޒެކެޓިވް ޑިރެކްޓަރުގެ މަޤާމުގައި ހުންނަވައިގެން، ޞިއްޙީ ދާއިރާގެ ހަމަހަމަކަން ޤާއިމުކުރުމަށް އޭނާ ކުރެއްވި މަސައްކަތްތަކަކީ ޢާންމުންގެ ބޮޑު އިތުބާރެއް ހޯއްދަވައިދިން ސަބަބެކެވެ. ޞިއްޙީ ދާއިރާގެ އިތުރުން ސިޔާސީ ގޮތުންވެސް ފާހަގަކޮށްލެވޭ ޚިދުމަތްތެރިއެއްގެ ގޮތުގައި އަލް-ސައްޔިދު ވަނީ މިޝިގަންގެ ރައްޔިތުންގެ މެދުގައި ބޮޑު މަޤްބޫލުކަމެއް ހޯއްދަވާފައެވެ.
އަލް-ސައްޔިދުގެ މި ކާމިޔާބީ ވެގެންދިޔައީ އެމެރިކާގެ ތާރީޚުގައި ލިޔެވިގެންދިޔަ މުހިންމު ސަފުހާއަކަށެވެ. އެމެރިކާގެ ސެނެޓަކީ އެ ޤައުމުގެ އެންމެ މުހިންމު ނިންމުންތައް ނިންމާ އެއް ބާރު ކަމަށްވާއިރު، އެ ތަނުގައި މުސްލިމުންގެ އަޑު އިއްވުމަށް އަލް-ސައްޔިދު ފަދަ ޢިލްމީ އަދި ހިންގުންތެރި ބޭފުޅަކު އިންތިޚާބުވުމަކީ ދުނިޔޭގެ ސިޔާސީ މަސްރަޙުގައި ވެސް މުސްލިމުންގެ ދައުރު ފުޅާވަމުން އަންނަކަމުގެ ހެއްކެކެވެ. މި ކާމިޔާބީއާއެކު، އޭނާ ވެގެންގޮސްފައިވަނީ އެމެރިކާގައި ދިރިއުޅޭ އެތައް މިލިއަން މުސްލިމުންނަށާއި، ޒުވާން ޖީލުތަކަށް ސިޔާސީ ގޮތުން ކުރިއަށްދިއުމަށް މަގުދައްކައިދިން މުހިންމު މިސާލަކަށެވެ.
ރިއެކްޓް އަދި ކޮމެންޓް ކުރެއްވުމަށް
