ސ. ހުޅުމީދޫ ސިއްޙީ މަރުކަޒުގައި މަސައްކަތްކުރައްވާ ތިން ނަރުހަކު މަތީ ތަޢުލީމު ފުރިހަމަކުރައްވައި، މާސްޓަރސް ޑިގްރީ ޙާޞިލުކުރެއްވުމާ ގުޅިގެންނާއި، އެ މަރުކަޒުގެ ޚިދުމަތާ އަލަށް ގުޅުނު މުވައްޒަފުންނަށް ހުޅުމީދޫ ސިއްޙީ މަރުކަޒުން ހޫނު މަރުޙަބާއެއް ކިޔައިފިއެވެ.
މި ކާމިޔާބީތަކާ ގުޅިގެން ހުޅުމީދޫ ސިއްޙީ މަރުކަޒުގެ ރަސްމީ ފޭސްބުކް ޕޭޖުގައި ޝާއިޢުކުރި ޕޯސްޓެއްގައި ވަނީ، މާސްޓަރ އޮފް ސައިންސް އިން ނާރސިންގ (އިންޓަރނޭޝަނަލް) ފުރިހަމަކުރައްވައި ދަސްވެނިވި ނަރުހުންނަށް ތަހުނިޔާއާއި މަރުޙަބާ ދަންނަވާފައެވެ. މަތީ ތަޢުލީމުގެ މި މުހިންމު ސަނަދު ޙާޞިލުކުރައްވާފައިވަނީ:
ފާޠިމަތު ސިޔާނާ މުޙައްމަދު (ސީނިއަރ ރެޖިސްޓަރޑް ނަރުސް)
އާމިނަތު ނައުފާ ވަސީމް (ރެޖިސްޓަރޑް ނަރުސް)
ޙައްވާ އަޒުރާ (ރެޖިސްޓަރޑް ނަރުސް)
ސިއްޙީ ދާއިރާގެ ޚިދުމަތްތެރިން މިފަދަ މަތީ ހަރުފަތްތަކަށް ވާސިލުވުމަކީ، މަރުކަޒުން ރައްޔިތުންނަށް ފޯރުކޮށްދޭ ޚިދުމަތުގެ ފެންވަރު އިތުރަށް ރަނގަޅުވެ، ކުރިއަރައިގެންދާނެ ކަމެކެވެ.
މީގެ އިތުރުން، ހުޅުމީދޫ ސިއްޙީ މަރުކަޒުގެ ޓީމާ އަލަށް ގުޅުނު ތިން މުވައްޒަފަކަށްވެސް އެ މަރުކަޒުން ވަނީ މަރުޙަބާ ކިޔާފައެވެ. މަރުކަޒުގެ ޚިދުމަތާ އަލަށް ގުޅިވަޑައިގެންނެވި މުވައްޒަފުންނަކީ:
ޙަނީފާ ޙަސަން - ހެލްތުކެއަރ އެޓެންޑަންޓް ގްރޭޑް 1
ޝަފީޔާ ޙަސަން - ހެލްތުކެއަރ އެޓެންޑަންޓް ގްރޭޑް 1
މުޙައްމަދު މިއުތާއު ޝަރީފް - އެސިސްޓެންޓް ހެލްތުކެއަރ އެޑްމިނިސްޓްރޭޝަން އޮފިސަރު
ހުޅުމީދޫ ސިއްޙީ މަރުކަޒުން ވަނީ ތަޢުލީމީ ގޮތުން ފާހަގަކޮށްލެވޭ ކާމިޔާބީއެއް ހޯއްދެވި ނަރުހުންނަށާއި، އަލަށް ގުޅުނު މުވައްޒަފުންނަށް ކުރިމަގުގައި އިތުރު ކާމިޔާބީއާއި ކުރިއެރުމަށް އެދި ހެޔޮދުޢާ އަރިސްކޮށްފައެވެ. ސިއްޙީ މަރުކަޒަށް ލިބެމުންދާ މިފަދަ އިންސާނީ ވަސީލަތްތަކުގެ ކުރިއެރުމަކީ ރަށުގެ ޞިއްޙީ ޚިދުމަތް ހަރުދަނާކުރުމަށް އެޅިގެންދާ މުހިންމު ފިޔަވަޅެކެވެ
ރިއެކްޓް އަދި ކޮމެންޓް ކުރެއްވުމަށް
