މަސައްކަތުގެ ބުރަކަމުން ނުވަތަ މުނިފޫހިފިލުވުމަށްޓަކައި ނިދި ގުރުބާން ކުރުމަކީ މިހާރުގެ ދިރިއުޅުމުގައި ވަރަށް އާންމު ކަމެކެވެ. ނަމަވެސް، އެންމެ ރެޔަކުވެސް ހަމަނިދި ނުލިބުމަކީ ޖެހިގެން އަންނަ ދުވަހު އިންތިހާއަށް ވަރުބަލިކަން އިހުސާސްވުމާއި، މަސައްކަތުގެ އުފެއްދުންތެރިކަން ދަށްވުމުގެ އިތުރުން ގޯސްތައް ހެދުމަށް މަގުފަހިވާ ކަމެކެވެ.
ހަމަނިދި ނުލިބޭނަމަ، އިންސާނާގެ ނަފްސާނީ އަދި ޖިސްމާނީ ދުޅަހެޔޮކަމަށް އޭގެ ނޭދެވޭ އަސަރުތައް ފޯރައެވެ. ދިގު މުއްދަތަކަށް ނިދި މަދުވުމުގެ ސަބަބުން ދިރިއުޅުމުގެ ފެންވަރު ދަށްވެ، ހަކުރުބަލި އަދި ހިތުގެ ބަލިތައް ޖެހުމުގެ ފުރުސަތު އިންތިހާއަށް ބޮޑުވެއެވެ.
ނިދި މަދުވުމުން ކުރާ މައިގަނޑު އަސަރުތައް
ދިރާސާތަކުން ދައްކާގޮތުގައި ނިދި މަދުވުމުގެ އަސަރު މުޅި ހަށިގަނޑުގެ ނިޒާމުތަކަށް ފޯރައި، ގިނަގުނަ ނޭދެވޭ ނަތީޖާތަކެއް މެދުވެރިކުރުވައެވެ. އޭގެ ތެރޭގައި:
ދުވާލު ގަޑީގައި ނިދިއައުން:
ރޭގަނޑު ހަމަނިދި ނުލިބުމުގެ ސަބަބުން ދުވާލުގެ ވަގުތުތަކުގައި މާބޮޑަށް ވަރުބަލިވެ ނިދިއަންނަ ގޮތްވެއެވެ. މީގެ ސަބަބުން އަމިއްލަ ދިރިއުޅުމުގެ އުފާވެރިކަން ގެއްލި، ވަޒީފާގައާއި ކިޔެވުމުގައި އަދި އާއިލީ ގުޅުންތަކުގައި ބޮޑެތި މައްސަލަތައް ކުރިމަތިވެއެވެ.
ސިކުނޑީގެ މަސައްކަތްތަކަށް ބުރޫއެރުން:
ނިދި މަދުވުމުން ވިސްނުމާއި ފިކުރުކުރުމުގެ ބާރު ދަށްވެ، ސަމާލުކަން ކުޑަވެގެންދެއެވެ. އަދި އެއްފަހަރާ ގިނަ މަސައްކަތްތަކެއް ކުރުމަށް އުނދަގޫވެ، މަސައްކަތުގެ މާހައުލުގައި ނުވަތަ ދަތުރުފަތުރުގެ ތެރޭގައި ނުރައްކާތެރި ހާދިސާތައް ހިނގުމުގެ ފުރުސަތު އިތުރުވެއެވެ.
މިޒާޖަށް އަންނަ ބަދަލުތައް:
ނިދި ނުލިބުމަކީ މީހާ ފަސޭހައިން ރުޅިއައުމާއި، މާޔޫސްވުމާއި، ނުތަނަވަސްވުން (anxiety) ކުރިމަތިވާ ކަމެކެވެ. އަދި ކަންކަން ކުރުމުގެ ޝައުގުވެރިކަން ކުޑަވެ، އަމިއްލަ އިހުސާސްތައް ކޮންޓްރޯލް ކުރުމަށް ދަތިވެއެވެ.
ދިފާއީ ނިޒާމު ބަލިކަށިވުން:
ހަށިގަނޑުގެ ދިފާއީ ނިޒާމު ދުޅަހެޔޮކޮށް ބެހެއްޓުމަށް ނިދި ކޮންމެހެން މުހިންމެވެ. ނިދި މަދުވުމުން ބަލިތަކާ ދެކޮޅަށް މަސައްކަތްކުރުމުގެ ގާބިލުކަން ދަށްވެ، އަރިދަފުސް ރޯގާ ފަދަ އިންފެކްޝަންތައް ޖެހުމުގެ ފުރުސަތު ބޮޑުވެގެންދެއެވެ.
ބަރުދަން އިތުރުވުން:
ބަރުދަން އެއްވަރެއްގައި ހިފެހެއްޓުމަށް ނިދި އެހީތެރިވެދެއެވެ. ނިދި މަދުވުމުން ބަނޑުހައިވުމުގެ އިހުސާސްތަކާއި ހަށިގަނޑުގެ މެޓަބޮލިޒަމަށް ނޭދެވޭ ބަދަލުތައް އައިސް، ހަށިގަނޑު ފަލަވުމަށް މަގުފަހިވެއެވެ.
ދިގު މުއްދަތަކަށް ނިދި މަދުވުމުން ދިމާވާ ސިއްހީ މައްސަލަތައް
ނިދި މަދުވުމަކީ ދާއިމީ އާދައަކަށް ވެއްޖެނަމަ، ހަށިގަނޑުގެ ނާރުތަކުގެ ނިޒާމަށް ބަދަލު އައިސް، ނުރައްކާތެރި ދިގު މުއްދަތުގެ ބަލިތަކަށް މަގުފަހިވެއެވެ.
ހަކުރުބަލި:
ހަށިގަނޑުގައި ހަކުރު ހަކަތައަށް ބަދަލުކުރުމުގެ ގާބިލުކަން ދަށްވެ، ޓައިޕް 2 ހަކުރުބަލި ޖެހުމުގެ ފުރުސަތު ވަރަށް ބޮޑަށް އިތުރުވެއެވެ.
ހިތުގެ ބަލިތައް:
ނިދީގެ ތެރޭގައި ލޭގެ ޕްރެޝަރު ދަށްވުމަކީ ހިތުގެ ދުޅަހެޔޮކަމަށް މުހިންމު ކަމެކެވެ. ނިދި މަދުވުމުން މި ބަދަލު ނައިސް، ހަށިގަނޑުގައި އިންފްލެމޭޝަން އުފެދި، ހިތުގެ ބަލިތަކާއި ސްޓްރޯކް ޖެހުމުގެ ނުރައްކާ ބޮޑުވެއެވެ.
ނަފްސާނީ ދުޅަހެޔޮކަން:
ނިދި މަދުވުމާއި ނަފްސާނީ ދުޅަހެޔޮކަމާ ދެމެދު ވަރުގަދަ ގުޅުމެއް އޮވެއެވެ. ނިދި މަދުވުމުން ނަފްސާނީ ބަލިތައް ޖެހުމުގެ ފުރުސަތު ބޮޑުވާ ފަދައިން، ނަފްސާނީ މައްސަލަތަކުގެ ސަބަބުން ނިދަން އުނދަގޫވުންވެސް މެދުވެރިވެއެވެ.
ބޭނުންވަނީ ކިހާ ވަރެއްގެ ނީދެއް
ޖިސްމާނީ އަދި ނަފްސާނީ ދުޅަހެޔޮކަން ދެމެހެއްޓުމަށް ކޮންމެ މީހަކަށްވެސް އެކަށީގެންވާ ވަރަކަށް ނިދި ބޭނުންވެއެވެ. އުމުރަށް ބަލާއިރު ނިދި ބޭނުންވާ މިންވަރު ތަފާތުވި ނަމަވެސް، މިއީ މީހާގެ ދިރިއުޅުމުގެ އާދަތަކާއި ސިއްހަތަށްވެސް ބިނާވާ ކަމެކެވެ. ހަމައެކަނި ގިނަ ވަގުތު އެނދުގައި އޮތުމަކުން ނިދި ފުރިހަމައެއް ނުވެއެވެ.
ނިދި މަދުވާކަން އަންގައިދޭ މައިގަނޑު އަލާމާތްތަކުގެ ތެރޭގައި:
ހޭލާއިރު ތާޒާކަން އިހުސާސް ނުވުން.
ދުވާލު ގަޑީގައި މާބޮޑަށް ނިދިއައުން ނުވަތަ ކުއްލިއަކަށް ނިދިޖެހުން.
ކަންކަމަށް ސަމާލުކަން ދިނުމަށް ދަތިވުން އަދި މިޒާޖު އަވަސް އަވަހަށް ބަދަލުވުން.
ނިދަން އޮންނަތާ 30 މިނެޓަށްވުރެ ގިނަ އިރުވާއިރުވެސް ނިދި ނައުން.
ނިދީގެ ތެރޭގައި ނޭވާލާން އުނދަގޫވުން.
ނިދި މަދުވާން ދިމާވާ ސަބަބުތައް
ނުބައި އާދަތައް:
ނިދަން އޮށޯވެ އޮވެ ފޯނު ނުވަތަ ޓީވީ ބެލުމާއި، ނިދާ ގަޑި ކައިރިވެފައި ހުއްޓާ ކެފޭއިން އެކުލެވޭ ބުއިންތައް ބޭނުންކުރުން.
ބުރަ ތާވަލު:
ރޭގަނޑު ލަސްވަންދެން މަސައްކަތް ކުރުމާއި، ހަފްތާ ބަންދުގައި ގިނައިރު ނިދައިގެން ނިދި ހަމަކުރަން އުޅުން.
ސްޓްރެސް:
ނަފްސާނީ ނުތަނަވަސްކަމުގެ ސަބަބުން ހަށިގަނޑުން ދޫކުރާ ހޯމޯންތަކަކީ ނިދުމަށް ހުރަސްއަޅާ އެއްޗެކެވެ.
މާހައުލުގެ މައްސަލަތައް:
ނިދާ ކޮޓަރީގައި އަލިގަދަވުން، އަޑުގަދަވުން ނުވަތަ ފިނިހޫނުމިން މާ މަތިވުން ނުވަތަ މާ ދަށްވުން.
ސިއްހީ މައްސަލަތަކާއި ބޭސް:
ހަށިގަނޑުގައި އަޅާ އެކި ވޭންތަކާއި ބައެއް ވައްތަރުގެ ބޭސްތަކުގެ ސަބަބުން ނިދި ގެއްލެއެވެ.
ހަމަނިދި ހޯދުމަށް ކުރެވިދާނެ ކަންތައްތައް
ނިދީގެ ތާވަލަކަށް އަމަލުކުރުން:
ކޮންމެ ދުވަހަކުވެސް އެއް ގަޑިއެއްގައި ނިދައި، އެއް ގަޑިއެއްގައި ހޭލުމަށް އާދަކުރުން.
ސްޓްރެސް ކުޑަކުރުން:
ނިދުމުގެ ކުރިން ހިތްހަމަޖެހޭ ފަދަ ކަމެއް (މިސާލަކަށް ފޮތް ކިޔުން ފަދަ ކަމެއް) ކުރުން.
އަލި ކޮންޓްރޯލްކުރުން:
ނިދުމުގެ އެއް ގަޑިއިރު ކުރިން ފޯނާއި ޓީވީ ފަދަ ސްކްރީންތައް ނިއްވާލުން.
ކެފޭއިން މަދުކުރުން:
މެންދުރުފަހުގެ ވަގުތުތަކުން ފެށިގެން ކެފޭއިން އެކުލެވޭ ބުއިންތައް ބުއިމުން ދުރުހެލިވުން.
ކަސްރަތުކުރުން:
ދުވާލަކު މަދުވެގެން 30 މިނެޓު ހަރަކާތްތެރިވެ ކަސްރަތު ކުރުން.
ހަމަނިދި ލިބުމަކީ އިންސާނާގެ ޖިސްމާނީ އަދި ނަފްސާނީ ދުޅަހެޔޮކަމަށްޓަކައި ކޮންމެހެން ބޭނުންތެރި ކަމެކެވެ. ނިދި މަދުވުމުގެ މައްސަލައަކީ އަމިއްލަ ދިރިއުޅުމުގެ އާދަތައް ބަދަލުކޮށްގެން ހައްލުނުވާކަމެއްނަމަ، ލަސްނުކޮށް ޑޮކްޓަރެއްގެ އިރުޝާދާއި އެހީތެރިކަން ހޯދުމަކީ ދުޅަހެޔޮ ދިރިއުޅުމަކަށްޓަކައި ވަރަށް މުހިންމު ކަމެކެވެ.
ސިއްހަތު ސަލާމަތުން ބެހެއްޓުމަށްޓަކައި، ކެއިންބުއިމާއި ކަސްރަތަށް ދޭ އަހައްމިއްޔަތުކަން ހަމަނިދި ހޯދުމަށްވެސް ދޭންޖެހެއެވެ.
ރިއެކްޓް އަދި ކޮމެންޓް ކުރެއްވުމަށް
