ލަލީގާގެ އައު ސީޒަންގައި ރެއާލް މެޑްރިޑުން ކުޅޭ ފުރަތަމަ މެޗު އޮތީ އެ ޓީމަށް ތާރީޚީ ގޮތުން ކާމިޔާބު ނަތީޖާތަކެއް ލިބިފައިވާ ދަނޑެއްގައެވެ.
ޝާލްކޭ އަތުން 3-0 އިން މޮޅުވެ، ޕްރީ ސީޒަން ކާމިޔާބުކަމާއެކު ނިންމާލުމަށްފަހު، 2026-27 ވަނަ އަހަރުގެ ސީޒަންގައި ރެއާލްގެ ފުރަތަމަ މެޗު އޮންނާނީ މިރޭ އެސްޕަންޔޯލްއާ ދެކޮޅަށެވެ.
ލަލީގާގެ އައު ސީޒަން ފެށުނުތާ މިހާރު ހަފުތާއެއް ވެފައިވީ ނަމަވެސް، ވޯލްޑް ކަޕްގައި ގިނަ ކުޅުންތެރިންތަކެއް ބައިވެރިވުމާ ގުޅިގެން ލީގުގެ ބޮޑެތި ޓީމުތަކަށް ފުރަތަމަ ހަފުތާގައި ވަނީ ޗުއްޓީއެއް ދީފައެވެ.
މި ސީޒަންގައި ވެސް ލީގުގެ އެއްވަނައަށް ވާދަކުރާނެކަމަށް ބެލެވެނީ ރެއާލް އާއި ބާސެލޯނާއެވެ. ރެއާލްގެ އަމާޒަކީ މިދިޔަ ސީޒަންގައި އެންމެ ފަހުގެ ޗެމްޕިއަނުންނާ ދެމެދު އޮތް 8 ޕޮއިންޓްގެ ފަރަގު ކުޑަކުރުމެވެ.
ހޯޒޭ މޮރީނިއޯ ދެވަނަ ފަހަރަށް ރެއާލްގެ ކޯޗުކަމާ ހަވާލުވުމާއި، ގިނަ އަދަދެއްގެ އައު ކުޅުންތެރިން ޓީމާ ގުޅުމަކީ ސަޕޯޓަރުންގެ މެދުގައި ބޮޑު ޝައުގުވެރިކަމެއް އުފެދިފައިވާ ކަމެކެވެ.
ލަލީގާގެ ފުރަތަމަ ހަފުތާގެ މެޗު ފަސްކުރުމާ ގުޅިގެން، ރެއާލް މެޑްރިޑުން އަށް ދުވަހުގެ ތެރޭގައި ތިން މެޗު ކުޅެން ޖެހޭނެއެވެ.
މި ސީޒަންގައި ރެއާލް މެޑްރިޑުން އަމިއްލަ ދަނޑުގައި ކުޅޭ ފުރަތަމަ މެޗު އޮންނާނީ އޮގަސްޓް 26 ވާ ބުދަ ދުވަހު ރެއާލް ސޮސިއެޑާޑާ ދެކޮޅަށެވެ. އޭގެ ފަހުން ޖެހިގެން އަންނަ އާދީއްތަ ދުވަހު، އަލަށް ޕްރޮމޯޓްވި މަލާގާ ބާނަބިއުއަށް ޒިޔާރަތްކުރާނެއެވެ.
މީގެ އިތުރުން، އަންނަ ބުރާސްފަތި ދުވަހު ބާއްވާ ޗެމްޕިއަންސް ލީގުގެ ގުރުއަތުލުމުގައި، މި ސީޒަންގެ ލީގު ފޭސްގައި ރެއާލް މެޑްރިޑާ ދެކޮޅަށް ކުޅޭނެ ޓީމުތައް ކަނޑައެޅިގެންދާނެއެވެ.
ރިއެކްޓް އަދި ކޮމެންޓް ކުރެއްވުމަށް
